വാഹന വിൽപന കേന്ദ്രത്തിൽ തീ, പതിനഞ്ച് വാഹനങ്ങൾ കത്തി നശിച്ചു

കൂത്താട്ടുകുളം ∙ കാക്കൂരിൽ പഴയ വാഹനങ്ങളുടെ വിൽപനകേന്ദ്രത്തിൽ ഉണ്ടായ അഗ്നിബാധയിൽ കാറുകൾ ഉൾപ്പെടെ പതിനഞ്ച് വാഹനങ്ങൾ കത്തി നശിച്ചു. എടത്തറ ബാബുവിന്റെ ഉടമസ്ഥതയിലുള്ള വാഹന വിൽപനകേന്ദ്രത്തിലെ ഗാരിജിലാണ് തീപിടിത്തം ഉണ്ടായത്. പഴയ കാറിന്റെ ഭാഗങ്ങൾ ഗ്യാസ് കട്ടർ ഉപയോഗിച്ച് മുറിച്ചു മാറ്റുന്നതിനിടെ സമീപത്തെ പുല്ലിലേക്കും തുടർന്ന് പഴയ ബസി ലേക്കും തീ പടരുകയായിരുന്നു. 

നിയന്ത്രണാതീതമായി പടർന്ന തീ മിനിലോറി ഉൾപ്പെടെ മറ്റു വാഹനങ്ങളിലേക്കും വ്യാപിച്ചു.   കൂത്താട്ടുകുളം, മൂവാറ്റുപുഴ, പിറവം, മുളന്തുരുത്തി എന്നിവിടങ്ങളിൽ നിന്ന് 6 അഗ്നിരക്ഷാ യൂണിറ്റുകൾ മണിക്കൂറുകൾ ശ്രമിച്ചാണ് തീയണച്ചത്. അനൂപ് ജേക്കബ് എംഎൽഎ, പൊലീസ്, മോട്ടർ വാഹനവകുപ്പ് ഉദ്യോഗസ്ഥർ എന്നിവർ സ്ഥലത്തെത്തിയിരുന്നു. കാൽ കോടി രൂപയുടെ നഷ്ടം ഉണ്ടായതായി ഉടമ ബാബു പറഞ്ഞു.