മഴ കനത്തു; മലയോര ഗ്രാമങ്ങളിൽ വ്യാപക നാശനഷ്ടം

ബന്തടുക്ക∙ മഴ കനത്തതോടെ മലയോര ഗ്രാമങ്ങളിൽ വിവിധ ഭാഗങ്ങളിൽ വ്യാപക  നാശം. ശക്തമായ  കാറ്റിലും മഴയിലും  മരങ്ങൾ കടപുഴകി വീണ് വീടുകൾ തകർന്നു  വൈദ്യുതി ബന്ധം തകരാറിലായി. വിവിധ സ്ഥലങ്ങളിൽ മരം വീണ് വൈദ്യുതി കമ്പി പൊട്ടി. കരിവേടകം,ഒയോലം , മൊട്ടത്താടി, കാമലം, പറയംപള്ളം എന്നിവിടങ്ങളിലാണ് വൈദ്യുത കമ്പികൾ പൊട്ടി വീണത് കെഎസ്ഇബി ജീവനക്കാരും നാട്ടുകാരും സ്ഥലത്തെത്തി പൊട്ടിവീണ മരച്ചില്ലകൾ മാറ്റി വൈദ്യുതിബന്ധം പുനഃസ്ഥാപിച്ചു.

വട്ടംതട്ടയ്ക്കു അടുത്ത്  ഉണുപ്പുംകല്ലിൽ തെങ്ങ് വീണു വൈദ്യുതി പോസ്റ്റ്കൾ തകർന്നു.ഇതിനെത്തുടർന്ന് വൈദ്യുതി ബന്ധം നിലച്ചു. എരിഞ്ഞിപ്പുഴ- ബേത്തൂർപാറ റോഡരികിലാണ് തെങ്ങ് കടപുഴകി വീണത് .പടുപ്പ് ആനക്കല്ല് പുന്നകാലിൽ പന കടപുഴകി വീണു വൈദ്യുതി തൂൺ  തകർന്നു. പ്രദേശത്തെ ഗതാഗതം  അൽപനേരം തടസ്സപ്പെട്ടു. ജീവനക്കാർ സ്ഥലത്തെത്തി  വൈദ്യുതി ബന്ധം പുനസ്ഥാപിച്ചു. ബന്തടുക്ക കോപ്പാളം മൂലയിലെ ബാബുവിന്റ  വീട് പൂർണമായും തകർന്നു.