പാചകവാതക സിലിണ്ടറുമായി വന്ന ലോറിക്കു തീപിടിച്ചു; തീപടരാത്തതിനാൽ വൻ അപകടം ഒഴിവായി
Mail This Article
കോഴിക്കോട്∙ മംഗളൂരുവിൽ നിന്ന് കോഴിക്കോട്ടേക്കു പാചകവാതക സിലിണ്ടറുകളുമായി വന്ന ലോറിക്കു തീപിടിച്ചു. അത്തോളിക്കടുത്ത് കൊടശ്ശേരിയിൽ ഇന്നലെ വൈകിട്ടാണ് സംഭവം. സിലിണ്ടറുകളിലേക്ക് തീപടരാത്തതിനാൽ വൻ അപകടം ഒഴിവായി. എൻജിൻ ഭാഗത്തുനിന്ന് പുക ഉയരുന്നത് കണ്ട ഡ്രൈവർ വണ്ടി റോഡരികിൽ നിർത്തി ഇറങ്ങി. ഈ സമയം തന്നെ തീ ആളിക്കത്തി. കൊയിലാണ്ടി, നരിക്കുനി, വെള്ളിമാടുകുന്ന്, പേരാമ്പ്ര എന്നിവിടങ്ങളിൽ നിന്ന് അഗ്നിരക്ഷാ യൂണിറ്റെത്തി രക്ഷാപ്രവർത്തനം നടത്തി.
പ്രദേശത്തെ വൈദ്യുതി ബന്ധം വിച്ഛേദിച്ചു. ഒരു മണിക്കൂർ നീണ്ട പരിശ്രമത്തിനൊടുവിൽ തീ നിയന്ത്രണ വിധേയമായി. അമിതമായി ചൂടേറ്റ ഒരു സിലിണ്ടർ പൊട്ടാറായ അവസ്ഥയിലായിരുന്നു. ഇത് അഗ്നിരക്ഷാ സേന സുരക്ഷിതമായി മറ്റൊരിടത്തേക്ക് മാറ്റി നിർവീര്യമാക്കി. എം.കെ.രാഘവൻ എംപി, ആർഡിഒ വി.പി.അബ്ദുറഹ്മാൻ, പഞ്ചായത്ത് പ്രസിഡന്റ് ഷീബ രാമചന്ദ്രൻ എന്നിവർ സ്ഥലത്തെത്തി. പന്തീരാങ്കാവ് സ്വദേശിയായ രാധാകൃഷ്ണനാണ് ലോറി ഓടിച്ചിരുന്നത്.