Manoramaonline.com no longer supports Internet Explorer 8 or earlier. Please upgrade your browser.  Learn more »

ഇ ബി ആറിനെ സ്വന്തമാക്കി ലിക്വിഡ് അസറ്റ് പാർട്ണേഴ്സ്

ebr-bike EBR 1190RX

സാങ്കേതിക മേഖലയിൽ ഹീറോ മോട്ടോ കോർപിന്റെ പങ്കാളിയായിരുന്ന, യു എസിലെ എറിക് ബ്യുവൽ റേസിങ്(ഇ ബി ആർ) ലേലത്തിൽ വിറ്റു. മൂന്നാം വട്ട ലേലത്തിൽ 20.50 ലക്ഷം ഡോളറി (ഏകദേശം 13.90 കോടി രൂപ)ന് ഇ ബി ആറിനെ ഏറ്റെടുക്കാമെന്ന ലിക്വിഡ് അസറ്റ് പാർട്ണേഴ്സിന്റെ വാഗ്ദാനം വോൾവർത്ത് കൺട്രി സർക്യൂട്ട് കോർട്ട് അംഗീകരിച്ചു. അതേസമയം കമ്പനിയെ ലേലത്തിലെടുത്ത ലിക്വിഡ് അസറ്റ് പാർട്ണേഴ്സിനു കീഴിൽ ഇ ബി ആറിന്റെ പ്രവർത്തനങ്ങൾ തുടരാൻ സാധ്യത കുറവാണ്. ഇ ബി ആറിനു പുതിയ ഉടമസ്ഥരെ കണ്ടെത്താനുള്ള ഇടനിലക്കാർ എന്നതു മാത്രമാവും ലിക്വിഡ് അസറ്റ് പാർട്ണേഴ്സിന്റെ ദൗത്യം. കമ്പനിക്കു മോട്ടോർ സൈക്കിളുകൾ നിർമിക്കാൻ പദ്ധതിയില്ലെന്ന് ലിക്വിഡ് അസറ്റ് പാർട്ണേഴ്സ് ഉടമ ബിൽ മെൽവിൻ ജൂണിയർ വ്യക്തമാക്കി. എന്നാൽ ഈ രംഗത്തു വൈഗ്ധ്യമുള്ളവരുമായി സഹകരിക്കാൻ ഇ ബി ആറിന് അവസരമൊരുക്കാനുള്ള ശ്രമങ്ങളാവും കമ്പനി നടത്തുകയെന്നും അദ്ദേഹം വെളിപ്പെടുത്തി.

ebr-bike-1 EBR 1190SX

ന്യൂ ജഴ്സിയിലെ അറ്റ്ലാന്റിക് മെറ്റൽ ഗ്രൂപ്പിൽ നിന്നുള്ള ബ്രൂസ് ബെൽഫറായിരുന്നു ഇ ബി ആറിനായുള്ള ആദ്യഘട്ട ലേലത്തിൽ വിജയിച്ചത്. എന്നാൽ ലേല വ്യവസ്ഥകൾ പാലിച്ചില്ലെന്ന കാരണത്താൽ ബ്രൂസ് ബെൽഫറുടെ പേര് കോടതിയുടെ പരിഗണനക്കെത്തിയില്ല. ഇ ബി ആറിലെ മുൻ ജീവനക്കാരുടെ വേതന കുടിശിക തീർക്കാനാവും ലേലത്തുക വിനിയോഗിക്കുക. ജപ്പാനിലെ മൈകോ ടെക് കമ്പനിക്കും പോർഷെ എൻജിനീയറിങ് ഗ്രൂപ്പിനുമൊക്കെ ഇ ബി ആർ പണം നൽകാനുണ്ട്; മൈകോ ടെക്കിന് 7.33 ലക്ഷം ഡോളറും(4.96 കോടി രൂപ) പോർഷെയ്ക്ക് 3.90 ലക്ഷം ഡോളറും (2.64 കോടി രൂപ) ആണ് ഇ ബി ആറിന്റെ കടബാധ്യത. കടക്കെണിയിലായതോടെ പ്രവർത്തനം നിർത്തുകയാണെന്ന് 2015 ഏപ്രിലിലാണ് ഇ ബി ആർ പ്രഖ്യാപിച്ചത്. തുടർന്ന് ഇ ബി ആറിൽ 43% ഓഹരി പങ്കാളിത്തമുണ്ടായിരുന്ന ഹീറോ മോട്ടോ കോർപ് ജൂലൈയിൽ കമ്പനിയുടെ കൺസൽറ്റിങ് ബിസിനസ് 28 ലക്ഷം ഡോളറി(19 കോടിയോളം രൂപ)ന് ഏറ്റെടുത്തിരുന്നു.

സ്വന്തമായി ഏറ്റെടുത്ത ഗവേഷണ, വികസന മേഖലകളിൽ മുന്നേറാൻ സഹായിക്കുമെന്ന പ്രതീക്ഷയിലായിരുന്നു ഹീറോയുടെ ഈ നടപടി. ഹീറോ മോട്ടോ കോർപിനായി ഇ ബി ആർ ഏറ്റെടുത്തു നടത്തിയിരുന്ന കൺസൽറ്റിങ് പദ്ധതികൾക്കും ഈ നടപടി ഗുണകരമാവുമെന്നാണു കണക്കുകൂട്ടൽ. എൻജിൻ ശേഷിയേറിയ ബൈക്കുകൾ പുറത്തിറക്കാനായി 2012 മുതൽ തന്നെ ഹീറോ മോട്ടോ കോർപും ഇ ബി ആറുമായി സഹകരിക്കുന്നുണ്ട്. സ്വന്തം ഗവേഷണ, വികസന വിഭാഗങ്ങൾ ശക്തമാക്കുന്നതിനൊപ്പം വ്യത്യസ്ത വിഭാഗത്തിൽപെട്ട ബൈക്കുകൾക്കുള്ള സാങ്കേതികവിദ്യകൾക്കായി വിഭിന്ന സ്രോതസ്സുകളെ ആശ്രയിക്കുകയെന്ന തന്ത്രമാണു ഹീറോ മോട്ടോ കോർപ് സ്വീകരിച്ചിരുന്നത്.

Your Rating:

Disclaimer

ഇവിടെ പോസ്റ്റ് ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ്ണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാറിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.