ആഭ്യന്തര, വിദേശ വിപണികളിൽ നിന്നുള്ള വർധിച്ച ആവശ്യം പരിഗണിച്ചു കൊറിയയിൽ നിന്നുള്ള ഹ്യുണ്ടേയ് മോട്ടോർ ഇന്ത്യ ലിമിറ്റഡ്(എച്ച് എം ഐ എൽ) കോംപാക്ട് സ്പോർട് യൂട്ടിലിറ്റി വാഹന(എസ് യു വി)മായ ‘ക്രേറ്റ’യുടെ ഉൽപ്പാദനം ഉയർത്തുന്നു. നവംബർ മുതൽ ‘ക്രേറ്റ’യുടെ പ്രതിമാസ ഉൽപ്പാദനം 10,000 യൂണിറ്റായാണ് ഉയർത്തുക; കഴിഞ്ഞ മാസം 9,020 ‘ക്രേറ്റ’ ഉൽപ്പാദിപ്പിച്ച സ്ഥാനത്താണിത്.
കഴിഞ്ഞ മാസമാണു ഹ്യുണ്ടായ് ഇന്ത്യയിൽ നിർമിച്ച ‘ക്രേറ്റ’യുടെ കയറ്റുമതി തുടങ്ങിയത്; മധ്യപൂർവ രാജ്യങ്ങളിലേക്കും ആഫ്രിക്കയിലേക്കുമായി 3,800 യൂണിറ്റാണ് ആദ്യമായി കപ്പൽ കയറിയത്. ഈ വിപണികളിൽ നിന്ന് 15,770 ‘ക്രേറ്റ’യ്ക്കുള്ള ഓർഡറാണു നിലവിൽ എച്ച് എം ഐ എല്ലിന്റെ പക്കലുള്ളത്. ആഭ്യന്തര വിപണിയിൽ ലഭിച്ച മികച്ച സ്വീകരണം കൂടിയാവുന്നതോടെ ആകെ ഏഴുപതിനായിരത്തിലേറെ ഉപയോക്താക്കളാണു ‘ക്രേറ്റ’യ്ക്കായി ബുക്കിങ് നടത്തി കാത്തിരിക്കുന്നത്. എച്ച് എം ഐ എൽ മോഡൽ ശ്രേണിയിൽ മികച്ച പ്രകടനം കാഴ്ചവയ്ക്കുന്ന ‘ക്രേറ്റ’യുടെ കഴിഞ്ഞ മാസത്തെ ആഭ്യന്തര വിൽപ്പന 7,225 യൂണിറ്റായിരുന്നു. മൂന്ന് എൻജിൻ സാധ്യതകളോടെയാണു ‘ക്രേറ്റ’ വിൽപ്പനയ്ക്കുള്ളത്: 1.6 ഗാമ വി ടി വി ടി, 1.6 യു ടു സി ആർ ഡി ഐ വി ജി ടി, 1.4 യു ടു സി ആർ ഡി ഐ.
ചെന്നൈയ്ക്കടുത്ത് ഇരിങ്ങാട്ടുകോട്ടൈയിലുള്ള എച്ച് എം ഐ എൽ ശാലയുടെ വാർഷിക ഉൽപ്പാദനശേഷി 6.80 ലക്ഷം യൂണിറ്റാണ്. നിലവിൽ ഈ ശാലയുടെ സ്ഥാപിത ശേഷിയുടെ 98 ശതമാനത്തോളം ഹ്യുണ്ടായ് വിനിയോഗിക്കുന്നുണ്ട്. അതുകൊണ്ടുതന്നെ ഏതെങ്കിലും മോഡലിന്റെ ഉൽപ്പാദനം വർധിപ്പിക്കേണ്ട ഘട്ടത്തിൽ മറ്റൊരു മോഡലിനെ തഴയേണ്ട സ്ഥിതിയിലാണു കമ്പനി.
ഉൽപ്പാദനത്തിലെ ഈ പരിമിതി മറികടക്കാൻ ഇന്ത്യയിൽ പുതിയ നിർമാണശാല സ്ഥാപിക്കാനും ഹ്യുണ്ടേയ് ഒരുങ്ങുന്നുണ്ട്. നിർമാണത്തിലെ പരിമിതികളുടെ ഫലമായി ഒക്ടോബറിലെ കയറ്റുമതിയിൽ കമ്പനിക്ക് 18.4% ഇടിവു നേരിട്ടിരുന്നു; ഏപ്രിൽ — ഒക്ടോബർ കാലത്തെ കയറ്റുമതിയിലാവട്ടെ മുൻവർഷം ഇതേ കാലത്തെ അപേക്ഷിച്ച് 12.66% ഇടിവും നേരിട്ടു.
Disclaimer
ഇവിടെ പോസ്റ്റ് ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ്ണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാറിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.