Manoramaonline.com no longer supports Internet Explorer 8 or earlier. Please upgrade your browser.  Learn more »

ധന്‍തേരസ്: മാരുതി വിറ്റത് 30,000 വാഹനങ്ങൾ

brezza-1

രാജ്യത്തെ കാർ നിർമാതാക്കൾക്കു തകർപ്പൻ നേട്ടം സമ്മാനിച്ചു നവരാത്രി, ദീപാവലി ഉത്സവകാലം. പ്രമുഖ നിർമാതാക്കളായ മാരുതി സുസുക്കി ഇന്ത്യ ലിമിറ്റഡും എതിരാളികളായ ഹ്യുണ്ടേയ് മോട്ടോർ ഇന്ത്യ ലിമിറ്റഡും ചേർന്ന് ധൻതേരസ് നാളായ വെള്ളിയാഴ്ച മാത്രം 45,000 യൂണിറ്റ് വിറ്റഴിച്ചെന്നാണു കണക്ക്. പുതിയ വസ്തുക്കൾ വാങ്ങാൻ അത്യുത്തമമായി പരിഗണിക്കപ്പെടുന്ന ധൻതേരസ് നാളിൽ മാരുതി സുസുക്കി ഇന്ത്യ ലിമിറ്റഡ് തന്നെ മുപ്പതിനായിരത്തോളം കാറുകൾ വിറ്റിട്ടുണ്ട്. മുൻവർഷത്തെ വിൽപ്പനയെ അപേക്ഷിച്ച് 20 ശതമാനത്തോളം അധികമാണത്രെ ഇത്. പുതിയ അവതരണങ്ങളായ ‘ബലെനൊ’യോടും ‘വിറ്റാര ബ്രേസ’യോടുമുള്ള വിപണിയുടെ താൽപര്യമാണു കമ്പനിക്കു തുണയായതെന്നാണു വിലയിരുത്തൽ.

അതേസമയം, മുൻ വർഷത്തെ ധൻതേരസിനെ അപേക്ഷിച്ച 26% വർധനയോടെ 15,153 കാറുകളാണു കമ്പനി ഇക്കൊല്ലം വിറ്റതെന്ന് ഹ്യുണ്ടേയ് മോട്ടോർ സീനിയർ വൈസ് പ്രസിഡന്റ് (സെയിൽസ് ആൻഡ് മാർക്കറ്റിങ്) രാകേഷ് ശ്രീവാസ്തവ അറിയിച്ചു. മാത്രമല്ല, ഈ മാസത്തെ മൊത്തം വിൽപ്പന അര ലക്ഷം യൂണിറ്റിലേറെയാവുമെന്നും അദ്ദേഹം പ്രതീക്ഷ പ്രകടിപ്പിച്ചു. മികച്ച മഴ ലഭിച്ചതിനൊപ്പം ഏഴാം ശമ്പള കമ്മിഷൻ ശുപാർശ നടപ്പായതാണു രാജ്യത്തെ വാഹന വിൽപ്പന മെച്ചപ്പെടാൻ വഴിയൊരുക്കിയത്.നവരാത്രി, ദീപാവലി ഉത്സവകാല വിൽപ്പന 10 ലക്ഷം യൂണിറ്റ് പിന്നിട്ടതായി രാജ്യത്തെ ഏറ്റവും വലിയ ഇരുചക്രവാഹന നിർമാതാക്കളായ ഹീറോ മോട്ടോ കോർപ് കഴിഞ്ഞ ദിവസം പ്രഖ്യാപിച്ചിരുന്നു; ധൻതേരസിനു മുമ്പേയാണു കമ്പനി ഈ നേട്ടം കൈവരിച്ചത്.ധൻതേരസിനു മുമ്പേ വിൽപ്പന 10 ലക്ഷം യൂണിറ്റ് പിന്നിട്ട സാഹചര്യത്തിൽ ഈ നവരാത്രി, ദീപാവലി ഉത്സവകാലം മികച്ച നേട്ടം സമ്മാനിക്കുമെന്നു ഹീറോ മോട്ടോ കോർപ് പ്രതീക്ഷ പ്രകടിപ്പിച്ചു. പോരെങ്കിൽ ഉത്സവകാലം പൂർത്തിയാവാൻ ഇനിയും ഒരാഴ്ചയോളം അവശേഷിക്കെ വിൽപ്പനയും ഇനിയും കുതിച്ചുയരുമെന്നും കമ്പനി കരുതുന്നു.

കഴിഞ്ഞ മാസം റെക്കോഡ് വിൽപ്പനയായിരുന്നു ഹീറോ മോട്ടോ കോർപ് കൈവരിച്ചത്. 6,74,961 യൂണിറ്റാണു സെപ്റ്റംബറിൽ കമ്പനി വിറ്റത്; 2015 സെപ്റ്റംബറിൽ വിറ്റ 6,06,744 ഇരുചക്രവാഹനങ്ങളെ അപേക്ഷിച്ച് 11.41% അധികമാണിത്. 2015 ഒക്ടോബറിൽ നേടിയ 6,39,802 യൂണിറ്റ് വിൽപ്പനയായിരുന്നു ഹീറോ മോട്ടോ കോർപിനെ സംബന്ധിച്ചിടത്തോളം ഇതുവരെയുള്ള റെക്കോഡ്. മാത്രമല്ല തുടർച്ചയായ രണ്ടാം മാസവും ആറു ലക്ഷത്തിലേറെ യൂണിറ്റ് വിൽക്കാൻ കഴിഞ്ഞത് ഹീറോ മോട്ടോ കോർപിനു നേട്ടമായി. ഓഗസ്റ്റിൽ 6,16,424 യൂണിറ്റായിരുന്നു കമ്പനി നേടിയ വിൽപ്പന. ഇക്കൊല്ലത്തെ കണക്കെടുത്താൽ ഇതു നാലാം തവണയാണു കമ്പനിയുടെ പ്രതിമാസ വിൽപ്പന ആറു ലക്ഷം യൂണിറ്റ് പിന്നിടുന്നത്; കഴിഞ്ഞ മാർച്ചിൽ 6,06,542 യൂണിറ്റും ഏപ്രിലിൽ 6,12,739 യൂണിറ്റുമായിരുന്നു ഹീറോ മോട്ടോ കോർപ് കൈവരിച്ച വിൽപ്പന. ദീപാവലി, നവരാത്രി ഉത്സവകാല വിൽപ്പന മികച്ച നിലയിൽ പുരോഗമിക്കുന്നതിനാൽ ഈ മാസവും ഹീറോ മോട്ടോ കോർപ് തകർപ്പൻ പ്രകടനം ആവർത്തിക്കുമെന്ന് ഏറെക്കുറെ ഉറപ്പാണ്.

Your Rating: