Manoramaonline.com no longer supports Internet Explorer 8 or earlier. Please upgrade your browser.  Learn more »

നിസ്സാൻ ‘2017 ജി ടി — ആർ’: ഇന്ത്യൻ അരങ്ങേറ്റം 9ന്

nissan-gtr

ജാപ്പനീസ് നിർമാതാക്കളായ നിസ്സാനിൽ നിന്നുള്ള സ്പോർട്സ് കാറായ ‘ജി ടി — ആർ’ നവംബർ ഒൻപതിന് ഇന്ത്യയിൽ അരങ്ങേറ്റം കുറിക്കും. കഴിഞ്ഞ മാസം മുതൽ തന്നെ നിസ്സാൻ കാറിനുള്ള പ്രീ ബുക്കിങ് ആരംഭിച്ചിരുന്നു; 25 ലക്ഷം രൂപ അഡ്വാൻസ് നൽകിയാണു കമ്പനി ‘ജി ടി — ആർ’ ബുക്കിങ് സ്വീകരിച്ചിരുന്നത്. രാജ്യാന്തര വിപണികളിൽ ‘ആർ 35 നിസ്സാൻ ജി ടി — ആർ’ ദശാബ്ദത്തോളം മുമ്പാണു വിൽപ്പനയ്ക്കെത്തിയത്. കാറിന്റെ ആറാം തലമുറ മോഡലാണ് അടുത്ത മാസം ഇന്ത്യയിൽ അരങ്ങേറ്റം കുറിക്കുക. ഇക്കൊല്ലം മാർച്ചിൽ നടന്ന ന്യൂയോർക്ക് ഓട്ടോ ഷോയിലാണു കമ്പനി ‘2017 നിസ്സാൻ ജി ടി — ആർ’ അനാവരണം ചെയ്തത്.

നിസ്സാന്റെ ഫ്ളാഗ്ഷിപ് സ്പോർട്സ് കാർ മോഡലായ ‘ജി ടി — ആർ’ 2007ലാണ് അരങ്ങേറ്റം കുറിച്ചത്; ഇതിനു ശേഷമുള്ള ഏറ്റവും സമഗ്രമായ പരിഷ്കാരങ്ങളോടെയാണു മാർച്ചിൽ പുറത്തെത്തിയ ‘2017 ജി ടി — ആറി’ന്റെ വരവ്. പുത്തൻ രൂപകൽപ്പനയും ആഡംബരം തുളുമ്പുന്ന അകത്തളവും മികച്ച ഡ്രൈവിങ് ക്ഷമതയും കൂടുതൽ സൗകര്യങ്ങളും സംവിധാനങ്ങളുമൊക്കെയുള്ള കാർ ഇന്ത്യയിലും വാഹനപ്രേമികളുടെ മനം കവരുമെന്നാണു നിസ്സാന്റെ പ്രതീക്ഷ.ഇന്ത്യയിലെ നിസ്സാൻ ശ്രേണിക്കു കൂടുതൽ ആവേശം പകരാൻ ‘2017 ജി ടി — ആറി’ന്റെ വരവോടെ സാധിക്കുമെന്നു നിസ്സാൻ ഇന്ത്യ ഓപ്പറേഷൻസ് പ്രസിഡന്റ് ഗിലോം സികാർഡ് നേരത്തെ പ്രതീക്ഷ പ്രകടിപ്പിച്ചിരുന്നു. നിസ്സാന്റെ പ്രകടനക്ഷമതയ്ക്കുള്ള സാക്ഷ്യപത്രമാണു ‘ജി ടി — ആർ’; പുതിയ കാറാവട്ടെ കൂടുതൽ കരുത്തുറ്റതും അഡംബര സമൃദ്ധവുമാണ്. ഇതിഹാസമാനങ്ങളുള്ള ഈ സ്പോർട്സ് കാറിനെ ഇന്ത്യയിൽ അവതരിപ്പിക്കാൻ ഏറെ അഭിമാനമുണ്ടെന്ന് അദ്ദേഹം അന്നു പ്രഖ്യാപിച്ചു.

അത്യാധുനിക 3.8 ലീറ്റർ, വി സിക്സ്, 24 വാൽവ്, ഇരട്ട ടർബോചാർജ്ഡ് എൻജിനാണു ‘ജി ടി — ആറി’നു കരുത്തേകുന്നത്; 6,800 ആർ പി എമ്മിൽ 570 പി എസ് വരെ കരുത്തും 637 എൻ എം വരെ ടോർക്കുമാണ് ഈ എൻജിൻ സൃഷ്ടിക്കുക. ജപ്പാനിൽ ‘ടകുമി’ എന്നറിയപ്പെടുന്ന വിദഗ്ധരുടെ കരവിരുതിൽ പിറക്കുന്ന ഈ എൻജിനൊപ്പമുള്ളത് ആറു സ്പീഡ് ഇരട്ട ക്ലച് ട്രാൻസ്മിഷനാണ്. ഈ സങ്കലനത്തിൽ വെറും മൂന്നു സെക്കൻഡിലാണു ‘ജി ടി — ആർ’ നിശ്ചലാവസ്ഥയിൽ നിന്നു മണിക്കൂറിൽ 100 കിലോമീറ്റർ വേഗത്തിലേക്കു കുതിക്കുക. യൂറോപ്പിനായി വികസിപ്പിച്ച പ്രീമിയം എഡിഷൻ ‘ജി ടി — ആർ’ ആവും ഇന്ത്യയിലും വിൽപ്പനയ്ക്കെത്തുക. 2016 മോഡലിന്റെ പുതുവർണമായ കറ്റ്സുര ഓറഞ്ചിനൊപ്പം വൈബ്രന്റ് റെഡ്, പേൾ ബ്ലാക്ക്, സ്റ്റോം വൈറ്റ്, ഡേടോണ ബ്ലൂ, ഗൺ മെറ്റാലിക്, അൾട്ടിമേറ്റ് സിൽവർ നിറങ്ങളിൽ കാർ ലഭ്യമാവും; നിറത്തോട് കിട പിടിക്കുന്ന ലതറിലാണു കാറിന്റെ അകത്തളവും സജ്ജീകരിക്കുകയെന്ന പ്രത്യേകതയുമുണ്ട്.

Your Rating:
ഇവിടെ പോസ്റ്റു ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.