ജാപ്പനീസ് ഇരുചക്രവാഹന നിർമാതാക്കളായ സുസുക്കി മോട്ടോർസൈക്കിൾസിൽ നിന്നുള്ള ഓൾ ടെറെയ്ൻ വാഹന(എ ടി വി)ങ്ങൾ ഇന്ത്യയിൽ വിൽപ്പനയ്ക്കെത്തി. ‘ഒസാർക് 250’, ‘ക്വാഡ്സ്പോർട് സെഡ് 400’ എന്നീ മോഡലുകളാണു സുസുക്കി മോട്ടോർ സൈക്കിൾ ഇന്ത്യ പ്രൈവറ്റ് ലിമിറ്റഡ് (എസ് എം ഐ പി എൽ) വിൽപ്പനയ്ക്കെത്തിച്ചത്. ഡൽഹി ഷോറൂമിൽ യഥാക്രമം 5.45 ലക്ഷം രൂപയും 8.50 ലക്ഷം രൂപയുമാണ് ഈ എ ടി വികൾക്കു വില. ഓൾ ടെറെയ്ൻ വാഹന വിപണിയിൽ ഇന്ത്യയിൽ ലഭ്യമായ അവസരങ്ങൾ പ്രയോജനപ്പെടുത്താനാണു സുസുക്കി രണ്ടു മോഡലുകൾ അവതരിപ്പിച്ചത്. ഇവയ്ക്കു ലഭിക്കുന്ന സ്വീകാര്യത വിലയിരുത്തിയാവും കമ്പനി കൂടുതൽ എ ടി വികൾ ഇന്ത്യയിൽ വിൽപ്പനയ്ക്കെത്തിക്കുകയെന്നു സുസുക്കി മോട്ടോർ സൈക്കിൾ ഇന്ത്യ മാനേജിങ് ഡയറക്ടർ മസയോഹി അറിയിച്ചു. ഈ മേഖലയിൽ കമ്പനിക്കുള്ള വൈദഗ്ധ്യവും മികവും വെളിവാക്കാൻ കൂടിയാണു വിദേശത്തു ജനപ്രിയമായ രണ്ട് എ ടി വികൾ അവതരിപ്പിക്കുന്നതെന്നും അദ്ദേഹം വിശദീകരിച്ചു.
ഒസാർക് 250ഉല്ലാസ യാത്രകൾ ഇഷ്ടപ്പെടുന്നവരെയും തുടക്കക്കാരെയും ലക്ഷ്യമിട്ടാണ് സുസുക്കിയിൽ നിന്നുള്ള എൻട്രി ലവൽ മോഡലായ ‘ഒസാർക് 250’ എത്തുന്നത്. 246 സി സി, സംഗിൾ സിലിണ്ടർ, എയർ കൂൾഡ്, എസ് ഒ എച്ച് സി എൻജിനാണ് എ ടി വിക്കു കരുത്തേകുന്നത്; അഞ്ചു സ്പീഡ് ഗീയർബോക്സാണു ട്രാന്സ്മിഷൻ. മുന്നിൽ സ്വതന്ത്രമായ ഡബിൾ വിഷ്ബോൺ, കോയിൽ സ്പ്രിങ്, ഓയിൽ ഡാംപ്ഡ് യൂണിറ്റും പിന്നിൽ കോയിൽ സ്പ്രിങ് സഹിതമുള്ള സ്വിങ് ആമുമാണു സസ്പെൻഷൻ. മുന്നിൽ ഇരട്ട ഡിസ്ക് ബ്രേക്കും പിന്നിൽ ഡ്രം ബ്രേക്കുമാണ്.
ക്വാഡ്സ്പോർട് സെഡ് 400സ്പോർട്ടി ഷാസിയും മികച്ച ടോർക്കുമുള്ള, പ്രകടനക്ഷമതയേറിയ എ ടി വിയാണു ‘ക്വാഡ്സ്പോർട് സെഡ് 400’. നാലു സ്ട്രോക്ക്, സിംഗിൾ സിലിണ്ടർ, 398 സി സി, ലിക്വിഡ് കൂൾഡ്, ഡി ഒ എച്ച് സി എൻജിനാണ് ഈ എ ടി വിക്കു കരുത്തേകുന്നത്. ട്രാൻസ്മിഷനും സസ്പെൻഷനും മുൻ ബ്രേക്കുമൊക്കെ ‘ഒസാർക് 250’ മോഡലിനു സമാനമാണ്; എന്നാൽ പിന്നിൽ സിംഗിൾ ഡിസ്ക് ബ്രേക്കാണെന്ന വ്യത്യാസമുണ്ട്. ആദ്യഘട്ടത്തിൽ ഡൽഹി, മുംബൈ, ബെംഗളൂരു, പുണെ, കൊൽക്കത്ത, ജോധ്പൂർ, ഹൈദരബാദ് നഗരങ്ങളിലാണു സുസുക്കിയുടെ എ ടി വികൾ വിൽപ്പനയ്ക്കുണ്ടാവുക. ഘട്ടംഘട്ടമായി എ ടി വി വിപണനം രാജ്യവ്യാപകമാക്കാനും സുസുക്കിക്കു പദ്ധതിയുണ്ട്.
Disclaimer
ഇവിടെ പോസ്റ്റ് ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ്ണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാറിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.