ഇടത്തരം ഹാച്ച്ബാക്ക് വിഭാഗത്തിൽ ടാറ്റ മോട്ടോഴ്സിനായി പട നയിക്കാൻ പുതുവർഷത്തിലെത്തുന്ന ‘സിക്ക’യ്ക്കു കൂട്ടായി ഓട്ടമേറ്റഡ് മാനുവൽ ട്രാൻസ്മിഷൻ (എ എം ടി) ഗീയബോക്സും. നിലവിൽ ചെറുകാറായ ‘നാനോ’യിലും കോംപാക്ട് സെഡാനായ ‘സെസ്റ്റി’ലുമാണു ടാറ്റ മോട്ടോഴ്സ് എഫ് ട്രോണിക് എ എം ടി ഗീയർബോക്സ് ലഭ്യമാക്കുന്നത്. ‘നാനോ’യിൽ പെട്രോൾ എൻജിനൊപ്പമാണ് എ എം ടി ട്രാൻസ്മിഷൻ ലഭിക്കുന്നതെങ്കിൽ ‘സെസ്റ്റി’ൽ ഡീസൽ എൻജിന്റെ കൂട്ടായാണ് എ എം ടി എത്തുന്നത്.അതേസമയം ‘സിക്ക’യിൽ പെട്രോൾ, ഡീസൽ ഭേദമില്ലാതെ എഫ് ട്രോണിക് എ എം ടി ലഭ്യമാക്കാനാണു ടാറ്റ മോട്ടോഴ്സ് ഒരുങ്ങുന്നത്. തുടക്കത്തിൽ പെട്രോൾ എൻജിനൊപ്പവും വൈകാതെ ഡീസൽ എൻജിന്റെ കൂടെയും എ എം ടി ഗീയർബോക്സ് ലഭ്യമാവുമെന്നാണു സൂചന.
നിലവിലുള്ള ഇടത്തരം ഹാച്ച്ബാക്കായ ‘ഇൻഡിക്ക’യ്ക്ക് അടിത്തറയാവുന്ന ‘എക്സ് സീറോ’ പ്ലാറ്റ്ഫോം ആധാരമാക്കിയാണു ‘സിക്ക’യുടെ വരവ്. പോരെങ്കിൽ ‘ഇൻഡിക്ക’യുടെ പെഡൽബോക്സും ഫയർവാളും പോലുള്ള ഘടകങ്ങൾ ‘സിക്ക’യിലും ടാറ്റ മോട്ടോഴ്സ് ഉപയോഗിച്ചിട്ടുണ്ട്. അതേസമയം കാറിനു കരുത്തേകാൻ പുത്തൻ എൻജിൻ ശ്രേണിയാണു കമ്പനി അവതരിപ്പിക്കുന്നത്: 1.2 ലീറ്റർ റെവോട്രോൺ പെട്രോളും 1.05 ലീറ്റർ റെവോടോർക് ഡീസലും. ‘ബോൾട്ടി’നും കരുത്തേകുന്ന ഈ പെട്രോൾ എൻജിന് പരമാവധി 83.8 ബി എച്ച് പി വരെയും ഡീസൽ എൻജിന് പരമാവധി 69 ബി എച്ച് പി വരെയും കരുത്ത് സൃഷ്ടിക്കാനാവും. അവതരണവേളയിൽ ‘സീക്ക’യുടെ ട്രാൻസ്മിഷൻ അഞ്ചു സ്പീഡ് മാനുവൽ ഗീയർബോക്സാവും. എന്നാൽ വലിയ കാലതാമസമില്ലാതെ എ എം ടി ഗീയർബോക്സുള്ള ‘സിക്ക’യും വിൽപ്പനയ്ക്കെത്തുമെന്നാണു സൂചന. ‘നാനോ’യ്ക്കായി ഗുജറാത്തിലെ സാനന്ദിൽ സ്ഥാപിച്ച നിർമാണശാലയിൽ നിന്നാവും ‘സിക്ക’ പുറത്തെത്തുക.
എൻട്രി ലവൽ കാറായ ‘നാനോ’യ്ക്കും ഹാച്ച്ബാക്കായ ‘ബോൾട്ടി’നുമിടയിലാണു ടാറ്റ മോട്ടോഴ്സ് ‘സിക്ക’യുടെ സ്ഥാനം നിശ്ചയിച്ചിരിക്കുന്നത്. അതുകൊണ്ടുതന്നെ ഹ്യുണ്ടായ് ‘ഗ്രാൻഡ് ഐ 10’, മാരുതി സുസുക്കി ‘സെലേറിയൊ’തുടങ്ങിയവയോടാവും ‘സിക്ക’യുടെ പോരാട്ടം. വില സംബന്ധിച്ചു വ്യക്തതയില്ലെങ്കിലും 3.5 ലക്ഷം മുതൽ 5.5 ലക്ഷം രൂപ വരെ മുടക്കിയാൽ ‘സിക്ക’യുടെ വിവിധ വകഭേദങ്ങൾ ലഭിക്കുമെന്നാണു പ്രതീക്ഷ.
