Grand i10 Special Edition
ഇന്ത്യയിലെത്തിയതിന്റെ 20—ാം വാർഷികാഘോഷം പ്രമാണിച്ചു കൊറിയൻ നിർമാതാക്കളായ ഹ്യുണ്ടേയ് മോട്ടോർ ഇന്ത്യ ലിമിറ്റഡ്(എച്ച് എം ഐ എൽ) ഹാച്ച്ബാക്കായ ‘ഗ്രാൻഡ് ഐ ടെന്നി’ന്റെ പ്രത്യേക പതിപ്പ് അവതരിപ്പിച്ചു. പുത്തൻ ഗ്രാഫിക്സ്, കറുപ്പു നിറമുള്ള ബി പില്ലർ തുടങ്ങി കാറിനെ കാഴ്ചയിൽ കൂടുതൽ സ്പോർട്ടി ആക്കുന്ന നടപടികളാണ് ഈ പ്രത്യേക പതിപ്പിലെ വ്യത്യാസം. ഒപ്പം പിന്നിൽ സ്പോയ്ലറും ഘടിപ്പിച്ചിട്ടുണ്ട്. ഇതോടൊപ്പം ‘ട്വന്റിയത്ത് ആനിവേഴ്സറി സ്പെഷൽ എഡീഷൻ’ എന്ന ബാഡ്ജിങ്ങും കാറിൽ ഇടംപിടിക്കും. 6.2 ഇഞ്ച് ഓഡിയോ — വിഡിയോ സിസ്റ്റം, റെഡ് ആൻഡ് ബ്ലാക്ക് ട്രിം അപ്ഹോൾസ്ട്രി എന്നിവയാണ് കാറിന്റെ അകത്തളത്തിലെ പുതുമ. തൂവെള്ള(പ്യുവർ വൈറ്റ്) നിറത്തിൽ മാത്രമാവും ‘ഗ്രാൻഡ് ഐ 10 പ്രത്യേക പതിപ്പ്’ വിൽപ്പനയ്ക്കുണ്ടാവുക.
Grand i10 Special Editionപെട്രോൾ, ഡീസൽ എൻജിനുകളോടെ ‘ഗ്രാൻഡ് ഐ 10 പ്രത്യേക പതിപ്പ്’ ലഭ്യമാവും; സ്പോർട്സ് വകഭേദം ആധാരമാക്കിയാണു ഹ്യുണ്ടേയ് പ്രത്യേക പതിപ്പ് സാക്ഷാത്കരിച്ചിരിക്കുന്നത്. ഡീസൽ എൻജിനുള്ള ‘ഗ്രാൻഡ് ഐ 10’ സ്പെഷൽ എഡീഷൻ സോളിഡിന് 6,60,062 രൂപയും സ്പെഷൽ എഡീഷൻ മെറ്റാലിക്കിന് 6,63,793 രൂപയുമാണു ഡൽഹി ഷോറൂമിൽ വില. പെട്രോൾ എൻജിനോടെയാവുമ്പോൾ സ്പെഷൽ എഡീഷൻ സോളിഡിന് 5,68,606 രൂപയും സ്പെഷൽ എഡീഷൻ മെറ്റാലിക്കിന് 6,63,793 രൂപയുമാണു ഡൽഹിയിലെ വില.
Grand i10 Special Editionഇന്ത്യയിലെ ഏറ്റവും ജനപ്രിയമായ ഹാച്ച്ബാക്കായ ‘ഗ്രാൻഡ് ഐ 10’ അവതരണവേളയിൽ തന്നെ ഈ വിഭാഗത്തിൽ തരംഗം സൃഷ്ടിച്ചിരുന്നെന്ന് ഹ്യുണ്ടേയ് മോട്ടോർ ഇന്ത്യ സീനിയർ വൈസ് പ്രസിഡന്റ് (സെയിൽസ് ആൻഡ് മാർക്കറ്റിങ്) രാകേഷ് ശ്രീവാസ്തവ അഭിപ്രായപ്പെട്ടു. 2014ൽ ‘ഇന്ത്യൻ കാർ ഓഫ് ദ് ഇയർ’ ബഹുമതി സ്വന്തമാക്കിയ ‘ഗ്രാൻഡ് ഐ 10’ ഇതുവരെ 3,08,000 യൂണിറ്റിന്റെ വിൽപ്പനയാണു കൈവരിച്ചതെന്നും അദ്ദേഹം വെളിപ്പെടുത്തി.
