ആരോഗ്യകരമായ ശരീരഭാരം നിലനിർത്തുവാൻ കാലറിബാലൻസ് അത്യാവശ്യമാണ്. പക്ഷേ, ഒരു ദിവസം എത്ര കാലറി ഉള്ളിൽ ചെല്ലണമെന്ന് എങ്ങനെ കണക്കാക്കും?
പ്രായം, ലിംഗം, അധ്വാനം, ഭാരം തുടങ്ങിയ കാര്യങ്ങളെ അടിസ്ഥാനപ്പെടുത്തിയാണ് ഒരാൾക്കു വേണ്ട കാലറി തീരുമാനിക്കുന്നത്.
പ്രായം : പ്രായം കൂടുന്നതിനനുസരിച്ച് ഒരാളിന്റെ ബി എം ആർ (അടിസ്ഥാന ഉപാപചയ നിരക്ക്) കുറയും. തൽഫലമായി ആവശ്യമുള്ള കാലറിയുടെ അളവും കുറയും.
ലിംഗം : ആണുങ്ങൾക്ക് എൽ ബി എം (Lean Body Masss) കൂടുതലും കൊഴുപ്പിന്റെ അളവ് കുറവുമായിരിക്കും. സ്ത്രീകൾക്കു തിരിച്ചും. ഇക്കാരണം കൊണ്ട് ആണുങ്ങൾക്കു കൂടുതൽ കാലറി ആവശ്യമുണ്ട്.
അധ്വാനം : ശാരീരിക അധ്വാനം കൂടിയവർക്കു കൂടുതൽ കാലറി ഉള്ളിൽ ചെല്ലണം. ഉദാഹരണത്തിന് ഇരുന്നു ജോലി ചെയ്യുന്ന ഒരാൾക്ക് ഒരു ദിവസം അയാളുടെ ശരീരത്തിന്റെ ഓരോ കിലോയ്ക്കും 25—30 കലോറി ആണു വേണ്ടത്. പക്ഷേ, നല്ലതുപോലെ അധ്വാനിക്കുന്നവർക്കു 35—40 കലോറി വേണം.
ഭാരം : വണ്ണം കൂടിയവർക്കു കുറച്ചു കലോറി മതി— 20 കലോറി ഒരു കിലോ ശരീരഭാരത്തിന്. പക്ഷേ, വേണ്ടത്ര ശരീരഭാരം ഇല്ലാത്ത ഒരാൾക്ക് ഇത് 35 കലോറിയാണ്.