ശസ്ത്രക്രിയയ്ക്കു ശേഷം മുറിവ് സ്റ്റേപ്ലർ ചെയ്യുന്നതിനും തുന്നിച്ചേർക്കുന്നതിനും പകരമായി പുതിയ പശ ശാസ്ത്രജ്ഞർ വികസിപ്പിച്ചെടുത്തു. വെറും 60 സെക്കൻഡിനുള്ളിൽ മുറിവ് കൂടിച്ചേരും എന്നതാണ് ഈ പശയുടെ പ്രത്യേകത. സിഡ്നി സർവകലാശാലയിലെയും അമേരിക്കയിലെയും ബയോമെഡിക്കൽ രംഗത്തെ വിദഗ്ധരാണ് ഇൗ കണ്ടുപിടിത്തത്തിനു പിന്നിൽ.
പശയുടെ ഇലാസ്തിക സ്വഭാവം മുറിവ് ഉണക്കുന്നതിനും ആവശ്യമെങ്കിൽ ഈ മുറിവ് വീണ്ടും തുറക്കുന്നതിനും സഹായകരമാണ്. വീണ്ടും തുറക്കുന്നതിൽ അപകട സാധ്യതയുള്ള ശ്വാസകോശം, ഹൃദയം, ഹൃദയധമനികൾ എന്നിവിടങ്ങളിലെ മുറിവുണക്കാനും ഇതുപയോഗിക്കാനാകും. മാത്രമല്ല ശസ്ത്രക്രിയയിലുണ്ടാക്കുന്ന മുറിവുകൾ തുന്നലോ സ്റ്റേപ്പിളോ കൂടാതെ കൂടിച്ചേരാനും ഈ പശ പര്യാപ്തമാണ്.
അൾട്രാവയലറ്റ് ലൈറ്റിന്റെ സഹായത്തോടെയാണ് പശ ശരീരത്തിൽ ഉപയോഗിക്കുന്നത്. മുറിവുണങ്ങാൻ സഹായിക്കുന്ന എൻസൈമുകളിൽ മാറ്റം വരുത്തിയാണ് പശ പ്രവർത്തിക്കുന്നത്.
ദ്രവരൂപത്തിലോ ജെൽ രൂപത്തിലോ ഉള്ള ഈ പശ മുറിവ് പെട്ടെന്ന് കൂടിച്ചേരാൻ സഹായിക്കുമത്രേ. സയൻസ് ട്രാൻസ്‍ലേഷണൽ മെഡിസിൻ എന്ന ജേണലിലാണ് ഇതു സംബന്ധിച്ച പഠനഫലം പ്രസിദ്ധീകരിച്ചിരിക്കുന്നത്.
