കുട്ടികൾക്കു ഭക്ഷണം നൽകുമ്പോൾ ശരീരവളർച്ച മാത്രമാകരുത് ലക്ഷ്യം. അവരുടെ ബുദ്ധിവളർച്ച ഉറപ്പാക്കേണ്ടതും അമ്മമാരുടെ കടമയാണ്. എന്നാൽ ഏതൊക്കെ ഭക്ഷണമാണ് കുഞ്ഞിന്റെ ബുദ്ധിവളർച്ചയ്ക്കായി നൽകേണ്ടത് എന്നതിനെക്കുറിച്ച് മിക്ക അമ്മമാർക്കും ധാരണയില്ല. അവരോട് ഡോക്ടർമാർ നിർദേശിക്കുന്ന ചില ഭക്ഷണങ്ങൾ ചുവടെ;
∙ധാന്യങ്ങൾ– കുട്ടികൾക്കു നൂഡിൽസും ബ്രെഡും മറ്റു ബേക്കറി വിഭവങ്ങളും നൽകുന്നതിനു പകരം ധാന്യങ്ങൾകൊണ്ട് പാകം ചെയ്ത ഭക്ഷണം ഉറപ്പാക്കുക. അരി മാത്രമല്ല ഗോതമ്പും ചോളവും എള്ളും എല്ലാം ഓരോ ദിവസവും മാറിമാറി ഉൾപ്പെടുത്തണം.
∙മുട്ട– ആഴ്ചയിൽ അഞ്ചുദിവസമെങ്കിലും ഓരോ മുട്ട വീതം നൽകാം. എല്ലാ ദിവസവും ഓംലറ്റ് രൂപത്തിൽ നൽകുന്നതിനു പകരം മുട്ട റോൾ, മുട്ട ബജി, മുട്ട സമോസ അങ്ങനെ വൈവിധ്യമാർന്ന വിഭവങ്ങൾ നൽകാം.
∙നട്സ്– എല്ലാ ദിവസവും ഒരു കൈക്കുമ്പിൾ നട്സ് നൽകുക. ഇതിൽ കശുവണ്ടി, കപ്പലണ്ടി, ബദാം എന്നിവ ഉൾപ്പെടുത്താൻ ശ്രദ്ധിക്കുക. പച്ചയ്ക്കു കഴിക്കുന്നില്ലെങ്കിൽ വറുത്തു കൊറിക്കാൻ നൽകാം.
∙ഇലക്കറികൾ– ദിവസവും ഒരു നേരം ഇലക്കറികൾ ഭക്ഷണത്തിൽ ഉൾപ്പെടുത്തുക. തോരനായി തയാറാക്കി ഉച്ചയൂണിനു കൊടുത്തുവിടാം.
∙ ചോക്ക്‌ലേറ്റ്– കുട്ടികളല്ലേ, അൽപം ചോക്ക്‌ലേറ്റ് കഴിക്കുന്നതുകൊണ്ട് ദൂഷ്യമില്ല. മിതമായ അളവിൽ നൽകണമെന്നു മാത്രം. ദിവസവും വേണ്ട, ക്ലാസ് ടീച്ചറുടെ ‘വെരി ഗുഡ് കമന്റുമായി വരുമ്പോൾ അല്ലെങ്കിൽ ഒരു ഗെയിമിൽ ജയിച്ചുവരുമ്പോൾ അങ്ങനെ എന്തെങ്കിലും പ്രത്യേക സാഹചര്യങ്ങളിൽ നൽകുക. ഇതു പ്രചോദനമാകും.
∙പാൽ– എല്ലാ ദിവസവും രാവിലെയോ രാത്രി കിടക്കാൻ നേരത്തോ ഒരു ഗ്ലാസ് പാൽ നൽകാൻ മറക്കരുത്. ഇത് ഉത്തമമായ സമീകൃതാഹാരമാണ്.
∙വാഴപ്പഴം– എല്ലാ പഴങ്ങളും നല്ലതുതന്നെ, പക്ഷേ കഴിവതും കീടനാശിനികൾ കുറച്ചുപയോഗിച്ചു വിളഞ്ഞ നാടൻ ഏത്തപ്പഴം പുഴുങ്ങി നൽകുന്നതു നന്നായിരിക്കും.
