എവിടെ തിരിഞ്ഞു നോക്കിയാലും കാണുന്നതും കേൾക്കുന്നതുമെല്ലാം ബീഫ് കഥകൾ. ബീഫിന്റെ പേരിൽ എന്തെല്ലാം പൊല്ലാപ്പുകളാണ് അരങ്ങേറിക്കൊണ്ടിരിക്കുന്നത്. എന്തിന് അന്യന്റെ അടുക്കളയിൽ വരെ കയറി പരിശോധന നടന്നു. ബീഫ് കഴിക്കുന്നതു കൊണ്ടുള്ള ഗുണങ്ങളും ദോഷങ്ങളും എന്തൊക്കെയാണെന്നു നോക്കാം.
ബീഫ് പ്ലസ്‌
∙ നമ്മുടെ ശരീരത്തിന് എളുപ്പത്തിൽ സ്വീകരിക്കാൻ കഴിയുന്ന ഹീം അയൺ ബീഫിൽ ധാരാളമുണ്ട്. ഇതു വിളർച്ച(അനീമിയ) തടയാൻ സഹായിക്കും. ഇതിനായി മിതമായ അളവിൽ ബീഫ് കഴിക്കുന്നതു നല്ലതാണ്. പ്രത്യേകിച്ച് സ്ത്രീകളും കുട്ടികളും.
∙ ശരീരത്തിന്റെ വളർച്ച, മസിലുകളുടെ ആരോഗ്യം എന്നിവയ്ക്കു സഹായിക്കുന്ന അമിനോ ആസിഡ് ബീഫിൽ ധാരാളമുണ്ട്.
∙ ബീഫിലെ ബി12 വൈറ്റമിനുകൾ ചുവന്ന രക്താണുക്കളുടെ ഉൽപാദനത്തിനു സഹായിക്കും. ഞരമ്പ്, തലച്ചോർ തുടങ്ങിയവയുടെ ആരോഗ്യത്തിനും ഇത് അത്യാവശ്യം വേണ്ട ഘടകമാണ്.
∙ വൈറ്റമിൻ ബി3 വലിയ അളവിൽ ബീഫിലുണ്ട്. ബി3യുടെ അഭാവം ഹൃദ്രോഗങ്ങൾക്കു കാരണമാകാറുണ്ട്.
∙ പ്രതിരോധശേഷി വർധിപ്പിക്കാൻ സഹായിക്കുന്ന സിങ്ക് ബീഫിലുണ്ട്.
∙ പ്രോട്ടീൻ നിർമിക്കുന്നതിനു സഹായിക്കുന്ന ഒൻപത് എസൻഷ്യൽ അമിനോ ആസിഡുകൾ മാംസങ്ങളിൽ അടങ്ങിയിട്ടുണ്ട്.
ബീഫ് മൈനസ്
∙ ശരീരത്തിന് ഏറെ ഹാനികരമായ പൂരിതകൊഴുപ്പുകൾ ബീഫിൽ ധാരാളം അടങ്ങിയിട്ടുണ്ട്.
∙ കൊളസ്ട്രോൾ ഉള്ളവർ ബീഫ് സൂക്ഷിച്ചുവേണം കഴിക്കാൻ. ബീഫിൽ കൊളസ്ട്രോൾ അളവ് കൂടുതലാണ്.
∙ സോസേജ് പോലുള്ള സംസ്കരിച്ച മാംസത്തിന്റെ നിരന്തര ഉപഭോഗം കോളറെക്ടറൽ കാൻസറിനു( വൻകുടലിന് അറ്റത്ത് ഉണ്ടാകുന്ന കാൻസർ) കാരണമാകാറുണ്ട്.
∙ ബീഫിൽ അടങ്ങിയിട്ടുള്ള പൂരിത കൊഴുപ്പ്, കാൽസ്യം തുടങ്ങിയവ ഹൃദയാഘാതത്തിനു കാരണമാകും.
∙ പ്രമേഹരോഗികളും ബീഫ് കഴിക്കുമ്പോൾ ശ്രദ്ധിക്കണം
വിവരങ്ങൾക്കു കടപ്പാട്
ശാലിനി വി
സീനിയർ ഡയറ്റീഷൻ
മെട്രോ ഇന്റർനാഷനൽ കാർഡിയാക് സെന്റർ, കാലിക്കറ്റ്
