കഴിച്ചുകൊണ്ട് ധ്യാനിക്കാം

ഒരു ഉണക്കമുന്തിരിക്ക് മാനസിക സമ്മർദം, ഉത്കണ്ഠ എന്നിവയെ ക്രമപ്പെടുത്താൻ കഴിയുമോ? മൈൻഡ്ഫുൾ ഈറ്റിങ് മെഡിറ്റേഷൻ (മനസ്സർപ്പിച്ച്, ആഹാരം കഴിച്ചുകൊണ്ടുള്ള ധ്യാനരീതി) അതാണു പഠിപ്പിക്കുന്നത്.

പരിശീലിക്കുന്ന വിധം

∙ ശല്യങ്ങളൊന്നുമില്ലാത്ത എവിടെയെങ്കിലും സ്വസ്ഥമായിരിക്കുക. ഒരു ഉണക്കമുന്തിരി (ഏതു ഭക്ഷണ പദാർത്ഥവും ആകാം) എടുത്തതിനു ശേഷം കണ്ണുകൾ അടയ്ക്കുക.

∙ വലതുകയ്യിലെ രണ്ടു വിരലുകൾക്കു മുകളിൽ മുന്തിരി കൊണ്ടുവന്ന് അതിന്റെ ആകൃതി തൊട്ടു മനസ്സിലാക്കാൻ ശ്രമിക്കുക.

∙ പിന്നീടു മുന്തിരി മണത്തു നോക്കുക. മണം വളരെ സാവധാനം ആസ്വദിക്കുക.

∙ വീണ്ടും വിരലുകളിലേക്കു കൊണ്ടുവന്ന് ആകൃതി തൊട്ടറിയുക.

∙ വീണ്ടും മണം ആസ്വദിക്കുക.

∙ പിന്നീട് ഇതു രണ്ടു കൈവിരലുകൾ കൊണ്ടു തന്നെ എടുത്തു ചുണ്ടിൽ ഉരസുക. രണ്ടുവട്ടം ചെയ്യുക.

∙ മുന്തിരി വായിലേക്കിടുക. നാക്കുകൊണ്ടു വായിലെ എല്ലാ ഭാഗത്തേക്കും ചലിപ്പിക്കുക.

∙ വലതു മോണപ്പല്ലിൽ ഒരുവട്ടം കടിക്കുക. തുടർന്നു മുന്തിരി വായിൽ മുഴുവനായി ചലിപ്പിക്കുക. (ഉമിനീര് ഇറക്കരുത്)

∙ ഇടതു മോണയിലും ഇത് ആവർത്തിക്കുക.

∙ വീണ്ടും വലതുമോണയിൽ രണ്ടുവട്ടം കടിക്കുക.

∙ തുടർന്ന് മുന്തിരി വായിൽ മുഴുവൻ ഓടിക്കുക. ഇടതുമോണയിലും ഇത് ആവർത്തിക്കുക.

∙ ഇതിനു ശേഷം മുന്തിരി സാവധാനം ചവച്ച് അതിന്റെ നീരു വായിൽ നിറയണം. ഇതു വായിൽ മുഴുവന്‍ ചലിപ്പിക്കുക.

∙സമയമെടുത്ത്, വളരെ സാവധാനം ഈ നീര് ഇറക്കുക.

∙ പരിശീലനസമയത്തു ടിവിയും മൊബൈലും ഒന്നും പാടില്ല. ദിവസവും ചെയ്യാൻ കഴിയാത്തവർ അവധി ദിവസമെങ്കിലും പരിശീലിച്ചാൽ ഗുണം ലഭിക്കുമെന്നാണു മൈൻഡ്ഫുൾ മെഡിറ്റേഷൻ ട്രെയിനർമാർ പറയുന്നത്.

ഗുണങ്ങൾ

∙ പൂർണ ശ്രദ്ധയോടെ ചെയ്താൽ ധ്യാനത്തിന്റെ ഗുണങ്ങൾ ശരീരത്തിനും മനസ്സിനും സ്വന്തമാകുമെന്നു വിദഗ്ധർ.

∙ ഭക്ഷണം മിതമായും ആസ്വദിച്ചും കഴിക്കാൻ ശീലിക്കാനാകും.

∙ ക്രമം തെറ്റിയ ആഹാരരീതി (ഈറ്റിങ് ഡിസോർഡർ) ഉള്ളവർക്ക് ഏറെ പ്രയോജനപ്പെടും.

∙ ദഹനപ്രക്രിയയെ സഹായിക്കുന്നു. അമിതവണ്ണത്തെയും നിയന്ത്രിക്കാം.

∙ മനസ്സിനെ വർത്തമാനനിമിഷത്തിലേക്കു കൊണ്ടുവരാൻ സാധിക്കുന്നു.

∙ സ്വയം നിയന്ത്രണം, ഏകാഗ്രത എന്നിവ ലഭിക്കുന്നതിലൂടെ പിരിമുറുക്കം കുറയ്ക്കാം പോസിറ്റീവ് ഊർജം നേടാം.

വിവരങ്ങൾ :

സനോജ് ഇലവുങ്കൽ,

ട്രെയിനർ ആൻഡ് കോ–ഓർഡിനേറ്റർ ഇൻ മൈൻഡ്ഫുൾനസ്, ശ്രീരാമകൃഷ്ണാശ്രമം ചാരിറ്റബിൾ ഹോസ്പിറ്റൽ, തിരുവനന്തപുരം