ജനിതകശുദ്ധിയും കിളിർപ്പും ശേഷിയുള്ളതുമായ വിത്തുകൾ ശേഖരിച്ചു കൃഷിയിറക്കുന്നിടംവരെ സുരക്ഷിതമായി സൂക്ഷിക്കുകയെന്നതാണ് വിത്തുൽപാദനത്തിന്റെ കാതൽ. വിത്തിനുവേണ്ട മേന്മകളെ ഇങ്ങനെ സംഗ്രഹിക്കാം.
∙ കിളിർക്കുന്നതാകണം
∙ കാലാവസ്ഥയ്ക്കും മണ്ണിനും അനുയോജ്യമാകണം
∙ അധിക വിളവുശേഷിയുള്ളതാകണം
∙ കീടരോഗബാധകളെ പ്രതിരോധിക്കാനാകണം
∙ ഉപഭോക്താവിനു പ്രിയമുള്ളതും മാർക്കറ്റിൽ നല്ല വില കിട്ടുന്നതുമാകണം
ഇതിനെല്ലാം വേണ്ടത് ജനിതക ശുദ്ധി, വലിപ്പത്ത‍ിലും ആകൃതിയിലും ഐകരൂപ്യം, കരുത്തോടെയുള്ള കിളിർപ്പ് തുടങ്ങിയ കാര്യങ്ങളാണ്. മുറിവും ചതവും പറ്റാത്തതും കീടരോഗബാധകളേൽക്കാത്തതുമായിരിക്കണം നല്ല വിത്ത്. കളവിത്തോ മറ്റു മാലിന്യങ്ങളോ കലരരുത്. വിത്തു ശേഖരിക്കുന്നതിൽ ശ്രദ്ധിക്കേണ്ട കാര്യങ്ങൾ താഴെക്കൊടുക്കുന്നു.
∙ ഒരു വിളയുടെ വിജയകരമായ കൃഷിക്കു സഹായമായ കാലാവസ്ഥ, മണ്ണ്, ഇനത്തിന്റെ പ്രത്യേക സ്വഭാവങ്ങൾ, അവയെ ബാധിക്കുന്ന കീടരോഗങ്ങൾ, അവയുടെ നിയന്ത്രണ മാർഗങ്ങൾ എന്നിവയെക്കുറിച്ച് ഉത്പാദകൻ അറിവു നേടിയിരിക്കണം.
∙ കേരളത്തിൽ സെപ്റ്റംബർ മുതൽ ജനുവരിവരെയാണ് വിത്തു ശേഖരിക്കുന്നതിനു പറ്റിയ സമയം.
∙ വിത്തിനുവേണ്ടി കൃഷിചെയ്യുന്ന സ്ഥലം തുറസ്സായതും നീർവാർച്ചയുള്ളതും വളക്കൂറുള്ളതുമാകണം.
∙ ഇവിടെ കൃഷിയിറക്കുന്നതിനു നല്ല വിത്തുകൾതന്നെ ഉപയോഗിക്കണം.
∙ വ്യത്യസ്ത ഇനങ്ങൾ അടുത്തടുത്ത് കൃഷി ചെയ്തിട്ടുണ്ടെങ്കിൽ അവ തമ്മിൽ നിശ്ചിത അകലം പാലിക്കണം.
∙ ഇനശുദ്ധി വിട്ടുള്ള ചെടികളെല്ലാം നീക്കം ചെയ്യണം.
∙ കീടരോഗബാധയേറ്റ ചെടികളും തോട്ടത്തിലെ കളകളും നീക്കം ചെയ്യണം.
∙ വിളക്കാലത്ത് ഒന്നോ രണ്ടോ തവണ നടത്തുന്ന വിളവെടുപ്പായിരിക്കും ആദായകരമായ വിത്തുൽപാദനത്തിനു പ്രയോജനപ്പെടുക.
∙ നന, സസ്യസംരക്ഷണം എന്നിവയ്ക്കു പുറമേ നൈട്രജൻ, പൊട്ടാഷുവളങ്ങൾ ഒരു തവണകൂടി കായ് വളർച്ചയുടെ സമയത്തു മേൽവളമായി നൽകുന്നതു നന്നായിരിക്കും.
∙ ഒരോ വിളയ്ക്കും ശുപാർശ ചെയ്തിട്ടുള്ള കൃഷി പരിചരണങ്ങൾ വിത്തിനുവേണ്ടിയുള്ള കൃഷിയിലും അനുവർത്തിക്കുക.
∙ യഥാർഥ മൂപ്പിൽത്തന്നെ വിത്തിനുവേണ്ടി വിളവെടുക്കുക. മൂപ്പു കൂടുന്നതും കുറയുന്നതും കിളിർപ്പിനെ ബാധിക്കും.
