ഇരുന്ന് കാലാട്ടരുത്
പാലൂട്ടിത്തൊട്ടിലാട്ടീ ജനി മുതൽ വിഷയാ-
സക്തി; തായാട്ടു കാട്ടാൻ
വാലാട്ടിക്കാത്തുനിൽപ്പാ,യരുതുക, ളൊരു കീ-
റോല കൊണ്ടാട്ടെ നോവാൻ
മേലെറ്റീലാ വിവേകം-ഗുരുവര! കലഹി-
ക്കായ്ക, നിൻ നേർക്കിരിക്കേ
കാലാട്ടിപ്പോകി, ലൽപ്പാഭ്യസനചപലനാ-
മെന്റെ ഞാനെന്ന ഭാവം!
ഇട്ട ഷർട്ടിന്റെ ബട്ടനുകൾ തുറന്നിടരുത്
അൽപ്പായുസ്സുകളായ് കുടുക്കുകൾ പൊഴി,
ഞ്ഞേറെത്തുറന്നുള്ളൊരെൻ
കുപ്പായത്തൊടലോഹ്യമോ? സദഭിജോ-
താചാര്യ! ഞാൻ പ്രാകൃതൻ;
ഇപ്രായത്തിലുമിന്ദ്രിയക്കറ വീഴും
മാർ മൂടുമെൻ ചട്ടമേൽ
തപ്പായ് ‘തയ്ച്ചവ’നിട്ടതില്ലൊരു കൊളുത്ത്
എന്തേ കയർക്കാത്തു നീ?
ഉടുത്ത മുണ്ട് എടുത്തു കുത്തരുത്
അല്ലേ ദേശിക! നാളെ, നിന്നുടുതുണി-
ച്ചീളിന്റെ കീഴ്ക്കുത്തഴി-
ച്ചില്ലേൽ’...എന്നവിടുന്നു ചില്ലികൾ ചുളി
ച്ചെന്നാൽ...പരുങ്ങുന്നു ഞാൻ;
ഇല്ലേതാണ്ടൊരുറപ്പെനിക്കൊരുതരം
കുത്തിന്നും- ആശാൻ ഭവാൻ
തല്ലേണ്ടോൻ, ചില തല്ലുകൊള്ളിയിലൊരാൾ
ഞാൻ-ഹൃദ്യമീ നാടകം!
Disclaimer
ഇവിടെ പോസ്റ്റ് ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ്ണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാറിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.