Manoramaonline.com no longer supports Internet Explorer 8 or earlier. Please upgrade your browser.  Learn more »

‘തീർഥം’ തളിച്ചു; പിന്നെ ഛായാഗ്രാഹകന്റെ ‘പിറവി'

ശ്രീജിത്ത് കെ. വാരിയര്‍
ചീഫ് സബ് എഡിറ്റര്‍
Sunny Joseph സണ്ണി ജോസഫ്.

വയലാർ രാമവർമ മരിച്ചു. കുറവിലങ്ങാട് ദേവമാതാ കോളജിലെ ബിരുദ വിദ്യാർഥി സണ്ണി ജോസഫ് നേരെ ചേർത്തലയ്‌ക്കു കുതിച്ചു. വന്നവർ വന്നവരൊക്കെ മഹാരഥൻമാർ. ആത്മാവിൽ ഒരു ചിതയായി വയലാർ എരിഞ്ഞടങ്ങുന്നു. വേദനയുടെ രാഘവപ്പറമ്പാകെ ഉദയായിൽനിന്നുള്ള ഒരു ക്യാമറ ഒപ്പിയെടുക്കുന്നു. ചിത അണഞ്ഞടങ്ങിയപ്പോൾ ക്യാമറ ഒരു ഭാഗത്തേക്കു മാറ്റിവച്ചു. ആരും കാണാതെ സണ്ണി ചെന്ന് ആ ഹാരി ഫ്ലക്‌സ് ക്യാമറയൊന്നു തൊട്ടു.

ചേർത്തല ചെറുവള്ളിക്കാട്ട് സി.വി. ജോസഫിന്റെയും ത്രേസ്യാമ്മയുടെയും ഒൻപതു മക്കളിൽ മൂത്തവന് സിനിമ മനസ്സിൽ കയറി തിരശ്ശീല പിടിക്കാൻ ആദ്യം നിമിത്തമായതു നാട്ടിലെ ഭവാനി തിയറ്റർതന്നെ. അച്‌ഛന്റെ മരുമകന്റേതാണ് ആ തിയറ്റർ. പ്രൊജക്‌ടർ ചലിപ്പിക്കുന്ന രാജപ്പൻ ചേട്ടനുമായി സണ്ണി കൂട്ടുകൂടി. ചേർത്തല സെന്റ് മൈക്കിൾസ് കോളജിലെ പ്രീഡിഗ്രിക്കാലത്ത്, കോളജ് വിട്ടുവന്നാൽ പ്രൊജക്‌ഷനിസ്‌റ്റ് രാജപ്പന്റെ സ്‌ഥിരം ശിഷ്യനായി. പലപ്പോഴും സിനിമ മുഴുവൻ പ്രദർശിപ്പിക്കൽ സണ്ണിയായി. 1977 ൽ നാട്ടിൽ ഫ്രീ സർക്കിൾക്‌സ് ഫിലിം സൊസൈറ്റി തുടങ്ങി.

മരുന്നുവ്യാപാരിയായ ജോസഫിനു മകൻ ഡോക്‌ടറാകണമെന്നായിരുന്നു മോഹം. മരുന്നു വാങ്ങാൻ ആലപ്പുഴയിലോ കൊച്ചിയിലോ പോയി ഓർഡർ കൊടുത്തു കാത്തിരിക്കേണ്ട സമയമത്രയും സണ്ണി സിനിമകൾ കണ്ടു. അങ്ങനെ 1974 ൽ സണ്ണി കണ്ട സിനിമ 365 ൽ അധികം വരും! അച്‌ഛന്റെ മോഹവഴി വിട്ട്, പുണെ ഫിലിം ഇൻസ്‌റ്റിറ്റ്യൂട്ടിൽ പഠിക്കാൻ മനസ്സുകൊണ്ടുറപ്പിച്ചു. ആദ്യവർഷം പരീക്ഷ പാസായില്ല. ’75 ലും ’76 ലും ’77 ലും കരകയറിയില്ല. 1979 ൽ ആ പ്രയത്നം ഫലം കണ്ടു. എല്ലാ വർഷവും സണ്ണിക്ക് എഴുത്തുപരീക്ഷയിൽ നല്ല മാർക്കുണ്ട്. അധികം സംസാരിക്കാത്ത പ്രകൃതമായതിനാൽ ഇന്റർവ്യൂവിലാണു പരാജയം. സണ്ണിയെ സ്‌ഥിരമായി നിരീക്ഷിച്ചിരുന്ന മാനുഷ് റോയ്‌ചൗധരിയാണ് ഇന്റർവ്യൂവിൽ 100 മാർക്ക് കൊടുത്തു സണ്ണിയുടെ പ്രതിഭയ്‌ക്ക് ആദ്യ വാതിൽ തുറന്നിട്ടത്. ഇൻസ്‌റ്റിറ്റ്യൂട്ട് പഠനത്തിനൊടുവിൽ സണ്ണിയെടുത്ത ഡിപ്ലോമ ഫിലിമിനു ദേശീയ അവാർഡ് കിട്ടിയപ്പോൾ മാനുഷ് കത്തെഴുതി: എന്റെ തീരുമാനം ശരിയായി, ഞാൻ എത്ര സന്തോഷവാനാണെന്നോ?!

സത്യനെയോ ശിവാജി ഗണേശനെയോ പോലെ വലിയൊരു നടനാവാൻ മോഹിച്ച സണ്ണി എഡിറ്റിങ് പഠിക്കാനാണു പുണെ ഇൻസ്‌റ്റിറ്റ്യൂട്ടിൽ ചേർന്നത്. പഠനം കഴിഞ്ഞപ്പോൾ ഛായാഗ്രഹണത്തിൽ ഒന്നാമൻ! പ്രഫസർ വിളിച്ച് ഉപദേശിച്ചു, ‘സണ്ണീ, താങ്കൾ എന്തിനാണ് എഡിറ്റിങ്ങിനു പോകുന്നത്? ക്യാമറ ചെയ്‌താൽ പോരേ?’ ഇൻസ്‌റ്റിറ്റ്യൂട്ടിലെ ‘വിവേകവൃക്ഷം’ എന്നറിയപ്പെടുന്ന മാവിൻചോട്ടിൽനിന്നു പ്രഫസർ നടത്തിയ ആ ഉപദേശം സണ്ണി സ്വീകരിച്ചു. പക്ഷേ, ഇഷ്‌ടപ്പെട്ട മേഖലയിൽനിന്നുള്ള വഴിമാറ്റത്തിനു മനസ്സൊരുങ്ങാൻ ഒന്നൊന്നര മാസമെടുത്തു. സമ്മർദത്തിന്റെ മൂർധന്യത്തിൽ ഒരു ദിവസം സണ്ണി ഛായാഗ്രഹണ വകുപ്പിന്റെ നോട്ടിസ് ബോർഡ് തല്ലിത്തകർത്തു. കയ്യൊക്കെ മുറിഞ്ഞു തുന്നലിട്ടു.

പിറ്റേന്ന് ഇൻസ്‌റ്റിറ്റ്യൂട്ടിലെ ‘അറിയപ്പെടുന്ന’ കുഴപ്പക്കാരെ ചോദ്യം ചെയ്യുന്നതു കണ്ടപ്പോൾ സണ്ണിക്കു കുറ്റബോധം. നേരെ ഡീൻ ജോൺ ശങ്കരമംഗലത്തിന്റെ മുറിയിൽ ചെന്നു കീഴടങ്ങി. ‘ഒരു മണിക്കൂർ കഴിഞ്ഞു വിളിക്കാം’ എന്നു പറഞ്ഞു ശങ്കരമംഗലം മടക്കിയയച്ചു. സണ്ണി ഹോസ്‌റ്റലിൽ വന്നു പെട്ടി അടുക്കാൻ തുടങ്ങി. ഒരു മണിക്കൂർ കഴിഞ്ഞ് ഡയറക്‌ടർ എൻ.വി.കെ. മൂർത്തിയുടെ മുറിയിലേക്ക്. ‘നീ തന്നെയാണോ ഇതു ചെയ്‌തത്? ആരെയോ രക്ഷിക്കാൻ നീയിത് ഏറ്റെടുക്കുകയാണ്” എന്നു പറഞ്ഞുകൊണ്ടു ഡയറക്‌ടർ ആ കേസ് എഴുതിത്തള്ളി.

ഇൻസ്‌റ്റിറ്റ്യൂട്ടിലെ അവസാനകാലത്തുതന്നെ വേണുവിന്റെ സഹായിയായി ഭവം, പ്രേംനസീറിനെ കാൺമാനില്ല തുടങ്ങിയ സിനിമകളിൽ സണ്ണി പ്രവർത്തിച്ചു. പഴയ ഫിലിം സൊസൈറ്റിക്കാലത്തേ ബന്ധമുള്ള അരവിന്ദന്റെ സഹായിയാകാൻ മോഹിച്ച്, ഇൻസ്‌റ്റിറ്റ്യൂട്ട് കഴിഞ്ഞപ്പോൾ അദ്ദേഹം ഹ്രസ്വചിത്രമെടുക്കുന്ന ലൊക്കേഷനിലേക്ക്. സണ്ണി എത്തുമ്പോഴേക്കു ഷാജി എൻ. കരുണിന്റെ സഹായി കെ.ജി. ജയനെ ക്യാമറാമാനായി നിശ്‌ചയിച്ച് അരവിന്ദൻ പോയി. പിറ്റേന്നു ഷാജിക്കു ‘പഞ്ചവടിപ്പാലം” ഷൂട്ട് ചെയ്യാൻ പോകണം. ജയനില്ലാത്ത ഒഴിവിൽ ഷാജി സണ്ണിയെ സഹായിയാക്കി. ‘ചിദംബരം’ കാലത്തും അരവിന്ദന്റെ സഹായിയാകാൻ പോയ സണ്ണിക്ക്, കെ.ജി. ജയന്റെ അഭാവത്തിൽ ഷാജിയുടെ ക്യാമറാസഹായിയാകേണ്ടിവന്നു.

ജീവിതമെന്ന ദൃശ്യം ക്യാമറയ്‌ക്കു പിന്നിലാകുമെന്നു സണ്ണി ഏറെക്കുറെ മനസ്സിനെ പഠിപ്പിക്കാൻ തുടങ്ങി. 1987 ൽ മോഹൻ ‘തീർഥം’ എന്നൊരു സിനിമയെടുക്കുന്നു. ഷാജി സണ്ണിയെ അതിന്റെ സ്വതന്ത്ര ചുമതലക്കാരനായി പറഞ്ഞുവിട്ടു. സണ്ണിയെ കണ്ടപ്പോൾ നിർമാതാവിനൊരു അങ്കലാപ്പ്, ‘ഇയാൾ ശരിക്കും കാര്യങ്ങളൊക്കെ ചെയ്യുമോ?’ അവർ മധു അമ്പാട്ടിനെ വിളിച്ചു. ഫോൺ സണ്ണിക്കു കൊടുക്കാൻ പറഞ്ഞിട്ട് മധു അമ്പാട്ട് തന്റെ പഴയ സഹായിയെ അനുഗ്രഹിക്കുകയാണു ചെയ്‌തത്.

നിത്യചൈതന്യ യതിക്കും ജി. അരവിന്ദനുമൊപ്പം സണ്ണി ജോസഫ് നിത്യചൈതന്യ യതിക്കും ജി. അരവിന്ദനുമൊപ്പം സണ്ണി ജോസഫ്.

‘തീർഥം’ ചെയ്‌തുകഴിഞ്ഞപ്പോഴും സണ്ണി തൃപ്‌തനായിരുന്നില്ല. പക്ഷേ, അതിന്റെ റഷസ് എങ്ങനെയോ കണ്ട അടൂർ ഗോപാലകൃഷ്‌ണന്റെ അഭിനന്ദനം വലിയ ഊർജമായി. ഈണം മറന്ന കാറ്റ്, ഒരേ തൂവൽ പക്ഷികൾ തുടങ്ങിയ സിനിമകൾ കഴിഞ്ഞപ്പോഴേക്ക് ആത്മവിശ്വാസമായി. ക്യാമറയിലെ ആ വിശ്വാസത്തെയാണു തന്റെ ആദ്യ സംവിധാന സംരംഭമായ ‘പിറവി’യിൽ ഷാജി വിളിച്ചത്. കൽക്കട്ടയിൽ വച്ച്ആ സിനിമ കണ്ട്, സത്യജിത് റേയുടെ സ്‌ഥിരം ഛായാഗ്രാഹകൻ സുബ്രതോ മിത്ര നൽകിയ അഭിനന്ദനപ്പൂച്ചെണ്ടിനപ്പുറം മറ്റൊരു അംഗീകാരവും സണ്ണിക്ക് ഇതുവരെ തോന്നിയിട്ടില്ല. ആ ദിനം മുഴുവൻ തന്നോടൊപ്പം നടന്നു ദൃശ്യങ്ങളെ പുകഴ്‌ത്തിയ സുബ്രതോ പിന്നീടെന്നും സണ്ണിയുടെ ഏറ്റവും വലിയ ഗുരുവായി.

മണിപ്പുരിയും ബംഗാളിയും രാജസ്‌ഥാനിയും കൊങ്കണിയും ഇംഗ്ലിഷുമടക്കം 11 ഭാഷകളിലൂടെയുള്ള സണ്ണിയുടെ ദൃശ്യസഞ്ചാരത്തിൽ ഇതുവരെ അറുപതിലേറെ സിനിമകൾ. പൂരം, ആലീസിന്റെ അന്വേഷണം, വാസ്‌തുഹാര, മങ്കമ്മ, ദയ, ഒരു ചെറുപുഞ്ചിരി, നിഴൽക്കുത്ത്, ട്രെയിൻ ടു പാക്കിസ്‌ഥാൻ, കഹിനി.. . ആ നിരയിലെ തിളക്കങ്ങൾ എത്രയെത്ര! സാക്ഷാൽ ക്രിസ്‌റ്റോഫ് സനൂസിയുടെ സംവിധാന വിഭാഗത്തിൽ നിരീക്ഷകൻ വരെയായ സണ്ണിയുടെ മനസ്സിലെ എക്കാലത്തെയും സംവിധാനമോഹം ഇപ്പോൾ ലക്ഷ്യത്തിലേക്കെത്തുന്നു. അടിയന്തരാവസ്‌ഥക്കാലത്തെ കഥ ദൃശ്യഭാഷയായി ഒരുക്കാനുള്ള തയാറെടുപ്പിലാണിപ്പോൾ. ആനന്ദിന്റെ ‘മരുഭൂമികൾ ഉണ്ടാകുന്നത്’, വിവിധ ഭാഷകളിലായി സിനിമയാക്കാനുള്ള മോഹം പണ്ടേ ഉള്ളിലുണ്ട്. തിരുവനന്തപുരത്തു രേവതി കലാമന്ദിർ ഫിലിം അക്കാദമിയുടെ അക്കാദമിക് ഡയറക്‌ടർ തിരക്കിനിടെ സണ്ണി പുതിയ സിനിമ മനസ്സിലൊരുക്കിക്കഴിഞ്ഞു.

Your Rating:

Disclaimer

ഇവിടെ പോസ്റ്റ് ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ്ണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാറിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.