സോഷ്യൽ മീഡിയയിൽ കുറച്ചു ദിവസങ്ങളായി നേരിടുന്ന ആക്രമണങ്ങൾക്കും വിവാദങ്ങൾക്കും മറുപടിയുമായി യുവതാരം ടൊവിനോ തോമസ് രംഗത്ത്. മോശമായി പെരുമാറിയ ആരാധകരിലൊരാളോട് ക്ഷുഭിതനാകുന്ന താരത്തിന്റെ വിഡിയോ സമൂഹമാധ്യമങ്ങളിൽ പ്രചരിച്ചിരുന്നു. പുതിയ ചിത്രം മെക്സിക്കന് അപാരതയുടെ പ്രചരണത്തിനെത്തിയപ്പോഴായിരുന്നു സംഭവം. വളരെ സാധാരണമായ ഒരു സംഭവമായിട്ടും ടൊവിനോയ്ക്കെതിരെ സമൂഹമാധ്യങ്ങളിൽ കരുതിക്കൂട്ടിയുള്ള ആക്രമണം നടന്നു. വിഷയത്തിൽ പ്രതികരണവുമായി ഒടുവിൽ ടൊവീനോ തന്നെ രംഗത്തെത്തിയിരിക്കുന്നു
ടൊവിനോയുടെ ഫെയ്സ്ബുക്കിൽ പങ്കു വച്ച കുറിപ്പ് വായിക്കാം–
പ്രിയപെട്ടവരെ,
നിങ്ങളില് ഒരാളും നിങ്ങളെപ്പോലെ ഒരാളുമാണ് ഞാന്. ആഗ്രഹം കൊണ്ടുമാത്രം സിനിമാക്കൊതി മൂത്ത്, സിനിമയിലെത്തിയ ഒരാള്. പ്രേക്ഷകരില്നിന്ന് നല്ല വാക്കുകള് കേള്ക്കാനാകുന്ന കഥാപാത്രങ്ങള് എന്നും ചെയ്യാന് കഴിയണമെന്നാണ് ഓരോ സിനിമയ്ക്ക് മുന്പും ശേഷവും ആഗ്രഹിക്കുന്നത്.
നല്ല സിനിമകളെ ജീവനുതുല്യം സ്നേഹിക്കുന്ന എത്രയോ പേരുടെ അനുഗ്രഹത്താലാണ് സിനിമയില് നിലനില്ക്കുന്നതെന്ന് നല്ല ബോധ്യമുണ്ട്. പ്രൊമോഷന് വേണ്ടി തീയേറ്ററുകളിലും ക്യാമ്പസുകളിലുമൊക്കെ പോയപ്പോള് എത്രയോ പേര് സിനിമകളോടുള്ള അവരുടെ ഇഷ്ടം ഞങ്ങള്ക്ക് വേണ്ടിയുള്ള കാത്തിരിപ്പും കയ്യടിയുമാക്കി മാറ്റിയിരുന്നു. ഇനിയുള്ള സിനിമകളിലൂടെയും നല്ല കഥാപാത്രങ്ങളിലൂടെയും മാത്രമേ നിങ്ങളുടെ അളവില്ലാത്ത സ്നേഹത്തിനു പകരം നല്കാനാവൂ.
ഇതിനിടയില് ചില മോശം അനുഭവങ്ങള് കൂടിയുണ്ടായി. വീട്ടിലൊരാളെയോ കൂട്ടുകാരനെയോ പോലെ കണ്ട് എത്രയോ പേര് സ്നേഹം പ്രകടിപ്പിക്കുന്നതിനിടെ ആരോ ഉപദ്രവിച്ചപ്പോള് പ്രതികരിച്ചിരുന്നു. വേദനിച്ചപ്പോള് ഒരു പച്ചമനുഷ്യനായി പ്രതികരിച്ചുപോയതാണ്.
അത് ജാടയോ അഹങ്കാരമോ കൊണ്ടായിരുന്നില്ല . അതാരെയെങ്കിലും വേദനിപ്പിച്ചെങ്കില് ക്ഷമ ചോദിക്കുന്നു.സിനിമയ്ക്കൊരു സത്യമുണ്ട്. നല്ല സിനിമകളും നല്ല കഥാപാത്രങ്ങളും മാത്രമേ എല്ലാ കാലത്തേക്കും നിലനില്ക്കൂ. മറ്റെല്ലാം കാലം തെളിയിക്കട്ടെ.–ടൊവിനോ പറഞ്ഞു.