ദി ഡെഫ്, വർത്തമാനങ്ങളില്ലാത്ത, വാക്കുകളില്ലാത്ത ഒരു നിശബ്ദ ചിത്രം മലയാളത്തിലെത്തുന്നു. ചിത്രത്തിന്റെ ടൈറ്റിൽ പ്രകാശനം മനോരമ ഓൺലൈനിൽ ഈ വാർത്തയിലൂടെ നിർവഹിക്കുകയാണ്. ചാപ്ലിൻ മൂവീസിന്റെ ബാനറിൽ റിയാസ് എം.ടിയാണ് ചിത്രം എഴുതി സംവിധാനം ചെയ്യുന്നത്. ഹോളിവുഡ് ഫ്രെയിമിലാവും ചിത്രീകരണമെന്നു സംവിധായകൻ റിയാസ് അവകാശപ്പെട്ടു.
ഊമയും ബധിരനുമായ ഒരു ചിത്രകാരന്റെ ജീവിതത്തിലുണ്ടാകുന്ന സംഭവങ്ങളാണു കഥയ്ക്കാധാരം. ഒരു കാരണം തേടി അദ്ദേഹം ഒരു നഗരത്തിലെത്തുകയും ആ വരവിനു കാരണക്കാരനായ ആളെ അന്വേഷിക്കുകയും ചെയ്യുന്നതിനിടെ സംഭവങ്ങൾ കോർത്തിണക്കിയാവും ചിത്രത്തിന്റെ രൂപകൽപന. പുതുമുഖങ്ങൾക്കൊപ്പം വിവിധ ഭാഷകളിലെ പ്രമുഖരാണു താരനിര. മേയിൽ ചിത്രീകരണം തുടങ്ങുന്ന ചിത്രത്തിന്റെ ക്യാമറ അജയ് പോളും എഡിറ്റിങ് ജിതിൻ മനോഹറും നിർവഹിക്കും.
×
