ചെരിയുന്ന ആനകളുടെ ചിപ്പില്‍ തിരിമറി; ആനക്കടത്തിന്റെ മുഖ്യസൂത്രധാരന്‍ അറസ്റ്റില്‍

മുംബൈ∙ ആനക്കടത്തിന്റെ മുഖ്യസൂത്രധാരന്‍ പുത്തന്‍കുളം ഷാജി മുംബൈയില്‍ അറസ്റ്റില്‍. കൊല്ലം പരവൂര്‍ സ്വദേശിയായ ഷാജി, ബിഹാര്‍, അസം എന്നിവിടങ്ങളില്‍നിന്നാണ് ആനകളെ കടത്തിയത്. ചെരിയുന്ന നാട്ടാനകളുടെ മൈക്രോ ചിപ്പില്‍ തിരിമറി നടത്തിയായിരുന്നു തട്ടിപ്പ്.

ഷാജിക്കെതിരെ വനംവകുപ്പിന്റെ അന്വേഷണം നടന്നുവരികയായിരുന്നു. നാട്ടാന പരിപാല നിയമവും വന്യമൃഗ സംരക്ഷണ നിയമവും ലംഘിച്ചുകൊണ്ട് നാട്ടാനകളെ കേരളത്തിലേക്ക് കൊണ്ടുവരുന്നതിനാണ് പ്രധാനമായും കേസെടുത്തത്. കേരളത്തിലെ ഒരു സ്വകാര്യ ആന പാർക്കിന്റെ ഉടമയാണ് ഷാജി.

ആനകളെ കടത്തികൊണ്ടുവരുന്നത് സംബന്ധിച്ചും ഇരുന്നൂറോളം ആനകളെ കുറിച്ചുമുള്ള വിശദാംശങ്ങൾ അടങ്ങുന്ന ഒരു യുട്യൂബ് വിഡിയോ ഷാജിയുടേതായി പുറത്തുവന്നിരുന്നു. ഇതിന്റെ കൂടി അടിസ്ഥാനത്തിലാണ് പൊലീസിന്റെ കൂടി സഹായത്തോടെ വനം വകുപ്പ് അന്വേഷണം നടത്തിയിരുന്നത്. ആനക്കൊമ്പ് കടത്തുമായി ബന്ധപ്പെട്ടും ഷാജിക്കെതിരെ അന്വേഷണം നടക്കുന്നുണ്ടായിരുന്നു.
 

English Summary : Puthenkulam Shaji arrested for elephant trafficking