കണ്ണൂരിൽ ആറ് വയസ്സുകാരന് ഷിഗെല്ല സ്ഥിരീകരിച്ചു

ചിറ്റാരിപ്പറമ്പ് ∙ ജില്ലയിൽ ആദ്യമായി ഷിഗെല്ല കേസ് സ്ഥിരീകരിച്ചു. കോഴിക്കോട് ലാബിൽ നടത്തിയ പരിശോധനയിലാണു ചിറ്റാരിപ്പറമ്പ് പൂവത്തിൻ കീഴിൽ സ്വദേശിയായ 6 വയസ്സുകാരന് ഷിഗെല്ല സ്ഥിരീകരിച്ചത്. കുടുംബത്തിലെ 4 പേർ കൂടി ലക്ഷണങ്ങളുമായി ചികിത്സയിലുണ്ട്.

കഴിഞ്ഞ മാസം അവസാനത്തോടെ പൊതുസ്ഥലത്ത് നിന്നും മുന്തിരി വാങ്ങി കഴിച്ചതിനുശേഷം 29ന് ആണ് ഗൃഹനാഥനു ലക്ഷണങ്ങൾ കണ്ടു തുടങ്ങിയത്. തുടർന്ന് 2ന് 3 കുട്ടികൾക്ക് കൂടി ലക്ഷണങ്ങൾ കണ്ടതോടെ കൂത്തുപറമ്പിലെ ആശുപത്രിയിൽ പ്രവേശിപ്പിക്കുകയായിരുന്നു.

ഇവിടെ നിന്നും രോഗം മാറാത്തതിനെത്തുടർന്നു 6 വയസ്സുകാരനെ കണ്ണൂരിലെ സ്വകാര്യ ആശുപത്രിയിലേക്കു മാറ്റി. തുടർന്ന് നടത്തിയ പരിശോധനയിലാണു ഷിഗെല്ല സ്ഥിരീകരിച്ചത്.