ഡൽഹിയിൽ വാർത്താസമ്മേളനത്തിനിടെ ബിജെപി എംപിക്ക് നേരേ ഷൂസേറ്; വിഡിയോ
Mail This Article
ന്യൂഡൽഹി∙ വാര്‍ത്താസമ്മേളനത്തിനിടെ ബിജെപി എംപിക്കുനേരേ ഷൂസേറ്. ബിജെപി വക്താവും രാജ്യസഭ എംപിയുമായ ജി.വി.എല്‍.നരസിംഹറാവു ഡൽഹിയിലെ പാർട്ടി ദേശീയ ആസ്ഥാനത്തു മാധ്യമങ്ങളോടു സംസാരിക്കവെയാണ് ഹാളിനുള്ളിൽ ഉണ്ടായിരുന്ന ആൾ അദ്ദേഹത്തിനു നേരേ ഷൂസെറിഞ്ഞത്.
മലേഗാവ് സ്ഫോടനക്കേസ് പ്രതി സാധ്വി പ്രജ്ഞയെ ഭോപ്പാലിലെ ബിജ.പി സ്ഥാനാര്‍ഥിയാക്കിയതുമായി ബന്ധപ്പെട്ട വിവാദങ്ങൾ മാധ്യമങ്ങളോടു പ്രതികരിക്കുകയായിരുന്നു നരസിംഹറാവു. ഇതിനിടെ, കാൻപുര്‍ സ്വദേശി ഡോ. ശക്തി ഭാര്‍ഗവ് എന്നയാൾ ഷൂസെറിയുകയായിരുന്നു. ഉടൻ തന്നെ സ്ഥലത്തുണ്ടായിരുന്ന ബിജെപി പ്രവർത്തകരും സുരക്ഷാ ഉദ്യോഗസ്ഥരും ചേർന്നു ശക്തി ഭാര്‍ഗവിനെ പിടികൂടി പൊലീസ് സ്റ്റേഷനിലേക്ക് മാറ്റി.
ബിജെപി നേതാവ് ഭുപേന്ദ്ര യാദവ് ഉൾപ്പെടെയുള്ളവർ സംഭവസമയത്ത് നരസിംഹറാവുവിനൊപ്പമുണ്ടായിരുന്നു. സംഭവത്തിനു ശേഷവും നരസിംഹറാവു വാർത്താസമ്മേളനം തുടർന്നു. ആക്രമണത്തിനു പിന്നില്‍ കോണ്‍ഗ്രസാണെന്ന് ബിജെപി ആരോപിച്ചു.
