ട്രെയിൻ യാത്രയ്ക്കിടെ പ്രസവവേദന; വൺ റുപ്പി ക്ലിനിക്കിൽ സുഖപ്രസവം
Mail This Article
മുംബൈ ∙ താനെ റെയിൽവേ സ്റ്റേഷനിലെ വൺ റുപ്പി ക്ലിനിക്കിൽ യുവതി കുഞ്ഞിന് ജന്മം നൽകി. കൊങ്കൺ കന്യ എക്സ്പ്രസിൽ മുംബൈയിലേക്ക് വരികയായിരുന്ന 20 വയസുകാരി പൂജ ചൗഹാനാണ് ട്രെയിനിൽവച്ച് പ്രസവവേദന വന്നത്. അപ്പോഴേക്കും ട്രെയിൻ താനെ സ്റ്റേഷനിലെത്തിയിരുന്നു.
റെയിൽവേ അധികൃതർ ഇക്കാര്യം സ്റ്റേഷൻ മാസ്റ്ററെ അറിയിക്കുകയും യുവതിയെ വൺ റുപ്പി ക്ലിനിക്കിലേക്ക് എത്തിക്കാൻ സ്റ്റേഷൻ മാസ്റ്റർ നിർദേശിക്കുകയും ചെയ്തു. ക്ലിനിക്കിൽ യുവതി ആൺകുഞ്ഞിന് ജന്മം നൽകി.
2017ലാണ് മഹാരാഷ്ട്ര സർക്കാർ വൺ റുപ്പി ക്ലിനിക്ക് പദ്ധതിക്ക് തുടക്കമിടുന്നത്. സംസ്ഥാനത്തിന്റെ വിവിധ റെയിൽവേ സ്റ്റേഷനുകളിൽ അടിയന്തര വൈദ്യസഹായം ആവശ്യമുള്ളവർക്കായാണ് വൺ റുപ്പി ക്ലിനിക്ക്.
24 മണിക്കൂറും പ്രവർത്തിക്കുന്ന ക്ലിനിക്ക് വലിയ ആശ്വാസമാണ് യാത്രക്കാർക്ക് പകരുന്നത്. ഒരു മാസത്തിനിടെ ഇതു രണ്ടാം തവണയാണ് താനെ റെയിൽവേ സ്റ്റേഷനിലെ വൺ റുപ്പി ക്ലിനിക്കിൽ കുഞ്ഞ് ജനിക്കുന്നത്.
English Summary: Woman Goes Into Labour In Mumbai Train, Delivers Baby At Thane Station's 'Rs 1 Clinic'