യഥാര്ഥ വോട്ടര് അമേരിക്കയില്; കള്ളവോട്ടറെ കയ്യോടെ പിടിച്ചിട്ടും നടപടിയില്ലെന്ന് ആക്ഷേപം
Mail This Article
കണ്ണൂര്∙ കണ്ണൂര് മണ്ഡലത്തിലെ 118-ാം നമ്പര് ബൂത്തില് കള്ളവോട്ടു ചെയ്ത സിപിഎം പ്രവര്ത്തകനെ യുഡിഎഫ്, എന്ഡിഎ പ്രവര്ത്തകര് പിടികൂടി പൊലീസിലേല്പിച്ചിട്ടും നടപടിയുണ്ടായില്ലെന്ന് ആക്ഷേപം. പ്രിസൈഡിങ് ഓഫിസര് പരാതി നല്കാന് തയാറാവാതിരുന്നതാണു കള്ളവോട്ടു ചെയ്ത ആളെ പൊലീസ് വെറുതെ വിടാന് കാരണമെന്ന് യുഡിഎഫ് പോളിങ് ഏജന്റ് പി.ഇന്ദിര പറഞ്ഞു.
അമേരിക്കയിലുള്ള മിഥുന് ഗൗതം എന്ന വിദ്യാര്ഥിയുടെ വോട്ട് തായ്യത്തെരു സ്വദേശി റംസീല് ചെയ്തെന്നാണ് ആക്ഷേപം. തടയാന് യുഡിഎഫ് പോളിങ് ഏജന്റുമാര് ശ്രമിച്ചെങ്കിലും തിരഞ്ഞെടുപ്പ് ഉദ്യോഗസ്ഥര് റംസീലിനു വോട്ട് ചെയ്യാന് സൗകര്യമൊരുക്കി.
കള്ളവോട്ട് ചെയ്ത് പുറത്തിറങ്ങിയ റംസീലിനെ യുഡിഎഫ്, എന്ഡിഎ പ്രവര്ത്തകര് പിടികൂടിയപ്പോള് സിപിഎം നേതാക്കളെത്തി മോചിപ്പിക്കാന് ശ്രമിച്ചു. പ്രിസൈഡിങ് ഓഫിസര് ടി.സി.അജീലേഷിന് യുഡിഎഫ് പോളിങ് ഏജന്റ് രേഖാമൂലം പരാതി നല്കിയിട്ടും നടപടിയെടുക്കാന് തയാറായില്ല. പരാതി ലഭിക്കാത്തതിനാല് പൊലീസും റംസീലിനെ വെറുതെ വിട്ടുവെന്നും ഇന്ദിര ആരോപിച്ചു.