Manoramaonline.com no longer supports Internet Explorer 8 or earlier. Please upgrade your browser.  Learn more »

പൊതുമാപ്പ്: ഒൻപതിനായിരം പേർക്ക് അവസരം ലഭിക്കുമെന്ന് പ്രതീക്ഷ

ദോഹ ∙ ഒൻപതിനായിരം അനധികൃത താമസക്കാരെങ്കിലും ഖത്തർ സർക്കാർ പ്രഖ്യാപിച്ച പൊതുമാപ്പ് സൗകര്യം പ്രയോജനപ്പെടുത്തിയേക്കുമെന്ന് അധികൃതർ. ഡിസംബർ ഒന്നുവരെയാണു പൊതുമാപ്പ്. എത്രപേർ ഇതുവരെ ഇത്തരത്തിൽ നാട്ടിലേക്കു മടങ്ങിയെന്ന് ആഭ്യന്തര മന്ത്രാലയം വ്യക്തമാക്കിയിട്ടില്ല. എന്നാൽ കാലാവധി അവസാനിക്കുമ്പോൾ ഒൻപതിനായിരം പേരെങ്കിലും അവരുടെ നാട്ടിലേക്കു മടങ്ങുമെന്നാണു പ്രതീക്ഷിക്കുന്നതെന്നു സേർച് ആൻഡ് ഫോളോഅപ് വിഭാഗം ഉന്നത ഉദ്യോഗസ്ഥൻ ബ്രിഗേഡിയർ അബ്ദുല്ല ജാബർ അൽ ലബ്ദ പറഞ്ഞു.

സെപ്റ്റംബർ മുതലാണ് പൊതുമാപ്പ് ആരംഭിച്ചതെങ്കിലും ആദ്യ ദിവസങ്ങളിൽ എത്തിയവരുടെ എണ്ണം കുറവായിരുന്നു. എന്നാൽ കാലാവധി അവസാനിക്കുന്ന സമയം അടുത്തതോടെ കൂടുതൽപേർ എത്തുന്നതായും അദ്ദേഹം പറ‍ഞ്ഞു. തൊഴിലുടമയ്ക്കു കീഴിൽനിന്നു തൊഴിലാളികൾ ഒളിച്ചോടുന്നതിന് ഒട്ടേറെ കാരണങ്ങളുണ്ടാകാമെന്ന് അൽ ലബ്ദ പറഞ്ഞു. ഒളിച്ചോടിയവർക്കു പിന്നീട് അധികൃതരെ സമീപിക്കാൻ ഭയമാണ്. ഇതാണ് ഇത്തരക്കാരുടെ എണ്ണം കൂടുന്നതിനു കാരണം. ഇത്തരക്കാരെ ജോലിക്ക് എടുക്കുന്നവർക്കെതിരെ നിയമ നടപടിയെടുക്കാറുണ്ട്. എന്നാൽ നിയമത്തിന്റെ പിടിയിൽ പെടാതെ വർഷങ്ങളായി അനധികൃതമായി കഴിയുന്നവരുണ്ട്.

പൊതുമാപ്പ് തേടിയെത്തിയ ഒരു ഇന്ത്യൻ കുടുംബം രേഖകളൊന്നുമില്ലാതെ 16 വർഷമാണ് രാജ്യത്തു കഴിഞ്ഞതെന്നു സെർച് ആൻഡ് ഫോളോഅപ് വിഭാഗം വ്യക്തമാക്കി. ഡിസംബർ 14നു പ്രാബല്യത്തിൽ വരുന്ന പുതിയ തൊഴിൽ, സ്പോൺസർഷിപ് നിയമത്തിനു മുന്നോടിയായാണിത്.

സ്പോൺസറുടെ പക്കൽനിന്ന് ഒളിച്ചോടി മറ്റു തൊഴിൽ ചെയ്യുന്നവർ, റസിഡൻസ് വീസയുടെ കാലാവധി കഴിഞ്ഞവർ, കുടുംബത്തെ കൊണ്ടുവന്നശേഷം അവരുടെ വീസ പുതുക്കാത്തവർ തുടങ്ങി വിവിധ കാരണങ്ങളാൽ അനധികൃത താമസം നീണ്ടവർക്കാണ് നിയമനടപടികളും പിഴയും ഒഴിവാക്കി നാടുവിടാൻ അവസരം ലഭിക്കുന്നത്.

അനധികൃതമായി താമസിക്കുന്ന ഇന്ത്യക്കാരെ കണ്ടെത്തി പൊതുമാപ്പ് പ്രയോജനപ്പെടുത്താനുള്ള സൗകര്യം ലഭ്യമാക്കാൻ ഇന്ത്യൻ എംബസി നടപടി ആരംഭിച്ചിരുന്നു.

Your Rating:
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.