Manoramaonline.com no longer supports Internet Explorer 8 or earlier. Please upgrade your browser.  Learn more »

ഷാർജയിൽ അക്ഷരോൽസവത്തിന് ഇന്നു തുടക്കം

ഷാർജ ∙ സാംസ്‌കാരിക നഗരിയിൽ അക്ഷരോൽസവത്തിന് ഇന്നു തുടക്കമാകും. 35–ാമത് ഷാർജ രാജ്യാന്തര പുസ്‌തകമേള ഇന്നു രാവിലെ 10ന് അൽ താവൂനിലെ എക്‌സ്‌പോ സെന്ററിൽ യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്‌ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി ഉദ്‌ഘാടനം ചെയ്യും. അദ്ദേഹം ഇന്നലെ വൈകിട്ട് എക്‌സ്‌പോ സെന്റർ സന്ദർശിച്ച് ഒരുക്കങ്ങൾ വിലയിരുത്തി.

കേരളത്തിൽ നിന്നുള്ള പ്രസാധകരടക്കം ലോകത്തിന്റെ വിവിധ ഭാഗങ്ങളിൽ നിന്നുള്ളവർ തങ്ങളുടെ സ്‌റ്റാളുകളിലെ തയാറെടുപ്പുകൾ പൂർത്തിയാക്കി. കേരളത്തിൽ നിന്ന് അൻപതോളം പ്രസാധകരാണുള്ളത്. 25% വിലക്കിഴിവിൽ പുസ്‌തകങ്ങൾ ലഭ്യമാകും. ലക്ഷങ്ങളുടെ പുസ്‌തകങ്ങളാണ് 11 ദിവസം നീണ്ടുനിൽക്കുന്ന മേളയിൽ വിറ്റഴിക്കുക. ഇന്നു പ്രമുഖർ പങ്കെടുക്കുന്ന പരിപാടികളില്ല. നാളെ രാത്രി എട്ടിനു ബെന്യാമിൻ, വി.മുസഫർ അഹമ്മദ് എന്നിവർ പങ്കെടുക്കുന്ന മുഖാമുഖം നടക്കും.

മലയാളത്തിന്റെ പ്രിയ കഥാകാരൻ എം.ടി.വാസുദേവൻ നായർ, ചലച്ചിത്ര നടൻ മമ്മൂട്ടി, നടനും എംപിയുമായ സുരേഷ് ഗോപി, ശശി തരൂർ എംപി, ചേതൻ ഭഗത്, കൈലാഷ് സത്യാർഥി, കെ.സച്ചിദാനന്ദൻ, എം.മുകുന്ദൻ, പ്രഫ. വി.മധുസൂദനൻ നായർ, ശ്രീകുമാരൻ തമ്പി, ഗോപി കല്ലായിൽ, കെ.പി.രാമനുണ്ണി, സുഭാഷ് ചന്ദ്രൻ, ഉണ്ണി ആർ., പി.എൻ.ഗോപീകൃഷ്‌ണൻ, നടനും എംഎൽഎയുമായ മുകേഷ്, ലാൽജോസ്, ഞരളത്ത് ഹരിഗോവിന്ദൻ എന്നിവരടക്കം ഇന്ത്യയിൽനിന്നു പ്രമുഖ കലാ സാഹിത്യ സാംസ്‌കാരിക പ്രവർത്തകർ പങ്കെടുക്കും.

വെള്ളിയാഴ്‌ച ആറിന് ഹിന്ദുസ്‌ഥാനി സംഗീതജ്‌ഞരായ ഉസ്‌താദ് റയിസ് ബാലെ ഖാൻ, ഉസ്‌താദ് ഹാഫിസ് ബാലെ ഖാൻ എന്നിവരുടെ സിതാർ കച്ചേരി ഉണ്ടാകും. ശനിയാഴ്‌ച വൈകിട്ട് ആറിന് ബാൾ റൂമിൽ എം.ടി. വാസുദേവൻ നായർ സദസ്സുമായി സംവദിക്കും. ലോകത്തെ ഏറ്റവും വലിയ മൂന്നാമത്തെ പുസ്‌തകമേള ഷെയ്‌ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ രക്ഷാകർതൃത്വത്തിൽ ഷാർജ ബുക്ക് അതോറിറ്റിയാണ് സംഘടിപ്പിക്കുന്നത്.

ഇന്ത്യയടക്കം 60 രാജ്യങ്ങളിൽ നിന്ന് 1,420 പ്രസാധകർ പങ്കെടുക്കും. 15 ലക്ഷത്തിലേറെ പുസ്‌തകങ്ങളാണ് വിൽപനയ്‌ക്കായി പ്രദർശിപ്പിക്കുക. ആതിഥേയരായ യുഎഇയിൽ നിന്നാണ് ഏറ്റവുമധികം പ്രസാധകർ പങ്കെടുക്കുക–205. ഈജിപ്‌ത് 163 പ്രസാധകരുമായി രണ്ടാം സ്‌ഥാനത്ത് നിൽക്കുന്നു. 110 വീതം പ്രസാധകരുമായി എത്തുന്ന ഇന്ത്യ, ലബനൻ എന്നീ രാജ്യങ്ങൾക്കാണ് മൂന്നാം സ്‌ഥാനം. യുകെ 79, സിറിയ 66, അമേരിക്ക 63, സൗദി അറേബ്യ 61 എന്നിങ്ങനെയും.

Your Rating:
ഇവിടെ പോസ്റ്റു ചെയ്യുന്ന അഭിപ്രായങ്ങൾ മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.