വാർത്തയും തിരുത്തും അറിയാതെ ടാന്യ യാത്രയായി

ലൊസാഞ്ചലസ് ∙ മരണവാർത്ത മാധ്യമങ്ങളിൽ നിറഞ്ഞ് ഒരു ദിവസത്തിനുശേഷം പ്രശസ്ത ഹോളിവുഡ് നടി ടാന്യ റോബർട്സ് (65) അന്തരിച്ചു. 1985 ലെ ജയിംസ് ബോണ്ട് ചിത്രം ‘എ വ്യൂ ടു എ കിൽ’, ടിവി സീരിയലായ ‘ദാറ്റ് സെവന്റീസ് ഷോ’ എന്നിവയിലൂടെ പ്രശസ്തയായ ടാനിയ കഴിഞ്ഞ ഞായറാഴ്ച മരിച്ചതായി അവരുടെ പ്രതിനിധി അറിയിക്കുകയും തിങ്കളാഴ്ച അതു തിരുത്തുകയും ചെയ്തിരുന്നു. 

ക്രിസ്മസ് തലേന്ന് സായാഹ്ന സവാരിക്കിടെ കുഴഞ്ഞുവീണതിനെ തുടർന്നാണ് ടാന്യയെ ആശുപത്രിയിലാക്കിയത്. രക്തത്തിലെ അണുബാധയാണ് മരണ കാരണമെന്നു സ്ഥിരീകരിച്ചു. 

1980 ൽ ജനകീയ പരമ്പരയായ ‘ചാർളീസ് എയ്ഞ്ചൽസി’ലെ ജൂലി റോജേഴ്സിന്റെ വേഷത്തിലൂടെ പ്രശ്സ്തിയിലേക്കുയർന്ന ടാന്യ 2005 ൽ ‘ബാർബർ ഷോപ്’ എന്ന സീരിയലിലാണ് അവസാനം അഭിനയിച്ചത്.