റമദാൻ സ്പെഷൽ തേങ്ങാപ്പാൽ പുഡ്ഡിങ്

ജെലാറ്റിൻ, ചൈനാഗ്രാസ് ഒന്നും ഉപയോഗിക്കാതെ തേങ്ങാപ്പാൽ കൊണ്ട് ഒരു അടിപൊളി പുഡ്ഡിങ്.

ചേരുവകൾ :

1. നാളികേരം ചിരകിയത് -2 കപ്പ്‌
2. പാൽ -500 മില്ലി
3. പഞ്ചസാര -4 ടേബിൾ സ്പൂൺ
4. കണ്ടൻസ്ഡ് മിൽക്ക് -4 ടേബിൾ സ്പൂൺ
5. വാനില പൊടി /എസ്സെൻസ് -1 ടീസ്പൂൺ
6. കോൺഫ്ലോർ -4 ടേബിൾ സ്പൂൺ
7. ഡെസിക്കേറ്റഡ് നാളികേരം -2 തൊട്ടു 3 ടേബിൾ സ്പൂൺ(നിർബന്ധമില്ല ) പകരം നാളികേരം നന്നായി വറത്തിട്ട് ഉപയോഗിക്കാം
8. കടല മിട്ടായി പൊടിച്ചെടുത്തത്

തയാറാക്കുന്ന വിധം :

• പാൽ നന്നായി തിളപ്പിച്ചെടുത്ത് ചെറുതായിട്ട് ഒന്ന് ചൂടാറാൻ വയ്ക്കുക.
• മിക്സിയുടെ ജാറിലേക്ക് നാളികേരം ഇട്ട് ചൂടുള്ള പാലിൽ നിന്ന് കുറച്ചു ഒഴിച്ച് നന്നായി അടിച്ചെടുക്കുക.
• അതിനു ശേഷം നാളികേര പാൽ അരിച്ചെടുക്കുക. അതിലേക്കു ബാക്കി ഉള്ള പാൽ കൂടി ഒഴിച്ച് പഞ്ചസാരയും ഇട്ട് നന്നായി ഇളക്കുക.
• ഒരു പാത്രത്തിൽ കോൺഫ്ളോർ എടുത്ത് അതിലേക്ക്  മിക്സ്‌ ചെയ്തു വച്ച പാൽ ഒഴിച്ച് നന്നായി ഇളക്കി കട്ടയില്ലാതെ എടുക്കുക.
• യോജിപ്പിച്ചു വച്ച തേങ്ങാപ്പാലിലേക്ക് വാനിലാ പൊടി അല്ലെങ്കിൽ വാനില എസൻസ്, കണ്ടൻസ്ഡ് മിൽക്ക്, കോൺഫ്ലോർ കലക്കിയത് എന്നിവ ഇട്ട് നന്നായി ഇളക്കി യോജിപ്പിക്കുക. അതിനു ശേഷം തീ കത്തിച്ച് ചെറിയ തീയിൽ കട്ട പിടിക്കാതെ ഇളക്കി കൊടുക്കുക.
• കുറച്ചു കട്ടിയായ് ഒരു ക്രീം പരുവത്തിൽ തീ അണച്ച് പുഡ്ഡിങ് ട്രെയിലേക്ക് അല്ലെങ്കിൽ ഏതെങ്കിലും ഗ്ലാസ്‌ പാത്രത്തിൽ നന്നായി തണുക്കാൻ വയ്ക്കുക.
• തണുത്ത ശേഷം 3 തൊട്ട് 4 മണിക്കൂർ ഫ്രിഡ്‌ജിൽ സെറ്റാക്കി എടുക്കുക.
• അതിനുശേഷം അലങ്കരിക്കാൻ മുകളിൽ ഡെസികേറ്റഡ് നാളികേരമോ /വറുത്ത നാളികേരമോ ഇട്ട് കൊടുക്കാം. മുകളിൽ കടല മിഠായി പൊടിച്ചെടുത്തതും മുകളിൽ വിതറി വിളമ്പാം.

English Summary : Coconut Milk Pudding Recipe.