അടി തെറ്റിയാൽ ലേഡിഗാഗയും വീഴും

ഗായികയാണെന്നും സ്റ്റേജിൽ ഇതല്ല ഇതിനപ്പുറവും പെർഫോം ചെയ്തിട്ടുണ്ടെന്നു പറഞ്ഞിട്ടൊന്നും കാര്യമില്ല, വീണാൽ വീണതു തന്നെയാണ്. പോപ് ഗായിക ലേഡി ഗാഗയുടെ കാര്യമാണ് പറഞ്ഞു വരുന്നത്. ആസ്വദിച്ച് പാടിക്കൊണ്ടിരിക്കുന്നതിനിടെയാണ് കക്ഷി തെന്നിവീണത്. അടിതെറ്റി വീണതിന്റെ വീഡിയോ ഇപ്പോൾ യു-ട്യൂബിൽ വൈറലാകുകയാണ്. സഹഗായകൻ ടോണി ബെന്നറ്റിനൊപ്പം പാടിക്കൊണ്ടിരിക്കുന്നതിനിടെയായിരുന്നു താരത്തിന്റെ വീഴ്ച്ച. ഗാഗയുടെ നീളൻ ഗൗൺ തന്നെയാണ് വീഴ്ചയ്ക്കു വില്ലനായത്.

സദസിനെ കയ്യിലെടുക്കാനായി സ്റ്റേജിനു മുമ്പിലേക്കു നടക്കുന്നതിനിടെ ഗൗൺ തടഞ്ഞാണ് ഇരുപത്തൊമ്പതുകാരിയായ ഗാഗ മുട്ടുകുത്തി വീണത്. വീഴ്ച്ചയിൽ കാര്യമായ പരിക്കുകളൊന്നും സംഭവിച്ചിട്ടില്ല. മാത്രമല്ല, വീണയുടൻ തന്നെ ചാടിയെഴുന്നേറ്റ് ഗാനം മുമ്പത്തേതിലും ഉൗർജസ്വലയായി പാടി മുഴുമിപ്പിക്കുകയും ചെയ്തു. ടോണി ബെന്നറ്റിന്റെയും ലേഡി ഗാഗയുടെയും ആൽബം ചീക് ടു ചീക്കിന്റെ പ്രചരണാർത്ഥം സംഘടിപ്പിച്ച ചീക് ടു ചീക് ടൂറിന്റെ പരിപാടിയ്ക്കിടെയായിരുന്നു സംഭവം.