ഫൂൾ ആക്കി കൂളായി വീട്ടിലെത്തിയ സൽമാൻ കാണിച്ച ‘കൈമുദ്ര’

നാളെ മുതൽ ജയിലിൽ കിടന്നു നരകിക്കും എന്നു പ്രതീക്ഷിച്ചവരെയെല്ലാം ഫൂൾ ആക്കി കൂളായി വീട്ടിലെത്തിയ സൽമാൻ ഭായ് പക്ഷേ ആരാധകരെ വീണ്ടും മുൾമുനയിൽ നിർത്തി. അതും നിസാരമായ ഒരു കാര്യത്തിന്! ഖാൻചേട്ടനെ സ്വീകരിക്കാൻ തടിച്ചുകൂടിയ ആരാധകരെ കാണാനായി വീടിന്റെ ബാൽക്കണിയിലെത്തിയ സൽമാൻ ഖാൻ കാണിച്ച ഒരു കൈമുദ്രയാണ് എല്ലാവരെയും കൺഫ്യൂഷനിലാക്കിയത്. വിജയസൂചകമായി രണ്ടുവിരൽ കാണിക്കുന്നതിനു പകരം മൂന്നുവിരലുകളാണ് അദ്ദേഹം പൊക്കിക്കാണിച്ചത്. അതെന്തിന്? ദിവസങ്ങളെടുത്ത് ചിന്തിച്ച്, തലപുകച്ച് ഒടുവിൽ കഴിഞ്ഞ ദിവസം ആരാധകർ അതിന് ഉത്തരം കണ്ടുപിടിച്ചു. സഹോദരൻ സൊഹൈൽ ഖാന്റെ ജയ് ഹോ (അതെ, അങ്ങനെയുമുണ്ടൊരു സിനിമ) എന്ന ചിത്രത്തിൽ സൽമാൻ ഭായ് നല്ല കാര്യങ്ങൾ ചെയ്യുകയും ആ നല്ല പ്രവൃത്തി മറ്റുമൂന്നു പേർക്കുകൂടി നിങ്ങൾ ചെയ്തുകൊടുക്കൂ എന്നും സൂചിപ്പിച്ച് കാണിക്കുന്ന മുദ്രയാണ് ആ മുദ്ര. എന്തുചെയ്യാം, മനുഷ്യന്മാര് കണ്ട ഏതെങ്കിലും ചിത്രത്തിലെ ഒരു മുദ്രയായിരുന്നെങ്കിൽ ആരാധകരുടെ സമയം ഇങ്ങനെ കളയണ്ടായിരുന്നു ഖാന്.