മഹി എന്നു ടാറ്റൂ ചെയ്ത സുന്ദരി ആര്?

എെ.പി.എൽ ഫൈനലിൽ മുംബൈ ചെന്നൈയെ തകർത്തു വാരുന്നതിനിടയിലാണ് ഗ്യാലറിയിൽ മഹിയെന്ന് ടാറ്റൂ ചെയ്ത സുന്ദരി ക്യാമറക്കണ്ണുകൾ കവർന്നത്. മുഖം വ്യക്തമായിരുന്നില്ലെങ്കിലും മഹിയുടെ നല്ലപാതി സാക്ഷി തന്നെയായിരുന്നു അതെന്ന് അധികം വൈകാതെ വ്യക്തമാവുകയും ചെയ്തു. ചെവിയ്ക്കു താഴെ കഴുത്തിൽ മഹേന്ദ്ര സിംഗ് ധോണിയുടെ ഓമനപ്പേരായ മഹി എന്നു ഹിന്ദിയിലാണ് ടാറ്റൂ ചെയ്തിരിക്കുന്നത്. കടുത്ത ക്രിക്കറ്റ് ആരാധികയായ സാക്ഷി 2010ൽ ഇരുവരുടയെും വിവാഹശേഷം മുതൽ ധോണിയുടെ മിക്ക കളികൾക്കും പിന്തുണയായി എത്താറുണ്ട്. കഴിഞ്ഞ എെ.പി.എൽ ഫൈനൽ മാച്ചിൽ സാക്ഷിക്കൊപ്പം മകൾ കുഞ്ഞു സിവയും എത്തിയിരുന്നെങ്കിലും ടാറ്റൂ തന്നെയായിരുന്നു മുഖ്യ ആകർഷണം. ക്യാമറയിൽ മുഖം പതിയാതിരിക്കാനായി കൈ കൊണ്ടുമുഖം മറയ്ക്കുന്ന ചിത്രത്തിലാണ് മഹി എന്നു ടാറ്റൂ ചെയ്തിരിക്കുന്നത് വ്യക്തമായി തെളിഞ്ഞത്.