അമ്മയുടെ തല കമ്പിയിലിടിക്കാതെ ശ്രദ്ധിക്കുന്ന മകൻ. യാത്രക്കാരിയായ മറ്റൊരു അമ്മയ്ക്ക് സീറ്റ് ഒഴിഞ്ഞു കൊടുത്തിട്ടാണ് അവൻ അമ്മയ്ക്കരുകിൽ നിൽക്കുന്നത്.
ഈ അമ്മയ്ക്ക് ലോകത്തിനു മുന്നിൽ ഇനിയെന്നും തലയെടുപ്പോടെ നിൽക്കാം. കാരണം ഒരു ആൺകുട്ടി എങ്ങനെയാകണമെന്നാണ് അവൻ ലോകത്തിനു കാട്ടിക്കൊടുത്തിരിക്കുകയാണ് തന്റെ കുഞ്ഞു പ്രവൃത്തിയിലൂടെ.
ചൈനയിലെ മെട്രോട്രെയിനിൽ വെച്ച് പകർത്തിയ ഒരു ചെറിയ ബാലന്റെയും അവന്റെ അമ്മയുടെയും ചിത്രം ആളുകൾ നോക്കിക്കാണുന്നത് ഏറെ വാത്സല്യത്തോടെയാണ്. ട്രെയിനിലെ സീറ്റിൽ ചാരിയിരുന്നുറങ്ങുന്ന അമ്മയുടെ തല സീറ്റിനു സമീപമുള്ള കമ്പിയിലിടിക്കാതിരിക്കാൻ അവൻ തന്റെ കൈകൊണ്ടു തടയൊരുക്കിയിരിക്കുകയാണ്. മകന്റെ കൈ തലയിണയായപ്പോൾ ഒന്നുമറിയാതെ അവന്റെ അമ്മ ഉറക്കം തുടരുകയാണ്.
മാതൃസ്നേഹം കൊണ്ടു മാത്രമല്ല അവൻ ആൺകുട്ടികൾക്കു മാതൃകയാവുന്നത്. ഒരു കുഞ്ഞുമായി ട്രെയിനിലേക്കു കയറി വന്ന മറ്റൊരു അമ്മയ്ക്ക് തന്റെ സീറ്റ് ഒഴിഞ്ഞുകൊടുത്തുകൊണ്ടാണ് അവൻ അമ്മയ്ക്കരുകിൽ നിന്ന് അമ്മയുടെ ഉറക്കത്തിന് ഭംഗം വരാതെ കാത്തത്.
കുട്ടിയുടെ ചിത്രവും തന്റെ കുഞ്ഞു പ്രവൃത്തിയിലൂടെ അവൻ നൽകിയ വലിയ സന്ദേശവും കണ്ട വെർച്വൽ ലോകം അവനെ അഭിനന്ദനം കൊണ്ടു മൂടുകയാണ്. ചിലർ അൽപ്പം കടന്ന കൈയായി തങ്ങൾക്കു പിറക്കാൻ പോകുന്ന പെൺമക്കൾക്കുവേണ്ടി അവനെ വിവാഹം ആലോചിക്കുക കൂടി ചെയ്യുന്നു.
ചൈനീസ് സമൂഹമാധ്യമമായ വെയ്ബോയിലാണ് ഈ ചിത്രം പ്രചരിച്ചത്. കുട്ടിക്കും അമ്മയ്ക്കുമൊപ്പം ട്രെയിനിലുണ്ടായിരുന്ന സഹയാത്രികരാണ് അവൻ ചെയ്ത നന്മയെപ്പറ്റി പരാമർശിച്ചുകൊണ്ട് ചിത്രം സമൂഹമാധ്യമങ്ങളിൽ അപ്‌ലോഡ് ചെയ്തത്. കുട്ടിയെയും അമ്മയെയും കുറിച്ച് കൂടുതൽ വിവരങ്ങളൊന്നും ഇതുവരെ ലക്ഷ്യമായിട്ടില്ല. ഇരുതോളുകളിലും ബാഗുകളുടെ ഭാരമുണ്ടെങ്കിലും അതൊന്നും കാര്യമാക്കാതെ മറ്റൊരമ്മയ്ക്കുവേണ്ടി സീറ്റ് ഒഴിഞ്ഞുകൊടുത്ത അവനെപ്പോലെ നല്ല സ്വഭാവമുള്ള ആൺകുഞ്ഞിനെ മകനായി ലഭിക്കണമെന്നായിരുന്നു ചിലരുടെയൊക്കെ ആഗ്രഹം.
