രാമായണ പാരായണം - ഭാഗം 20 : രവീന്ദ്രൻ കളരിക്കൽ

ഈശ്വരനെ തൃപ്തിപ്പെടുത്താൻ എന്താണു നൽകേണ്ടത് എന്ന സംശയം പലർക്കും ഉണ്ടാകും. എന്നാൽ ആ സംശയം സാക്ഷാൽ ശ്രീരാമദേവൻ തന്നെ തീർത്തുതരുന്നു, രാമായണത്തിൽ. 

വനവാസത്തിനിടയിൽ പ്രവർഷണം എന്ന പർവതത്തിൽ കഴിയുന്നതിനിടെ, ദുരിതമോചനത്തിനുള്ള ക്രിയാമാർഗം ഉപദേശിക്കണമെന്നു  ശ്രീരാമദേവനോടു ലക്ഷ്മണൻ അഭ്യർഥിച്ചു. അപ്പോൾ ശ്രീരാമദേവൻ പറയുകയാണ്:

'ശ്രദ്ധയോടുംകൂടെ വാരിയെന്നാകിലും

ഭക്തനായുള്ളവൻ തന്നാലതിപ്രിയം

ഗന്ധപുഷ്പാക്ഷതഭക്ഷ്യഭോജ്യാദിക-

ളെന്തുപിന്നെപ്പറയേണമോ ഞാനെടോ?'

‘ഉള്ളിൽ യഥാർഥ ഭക്തിയുള്ളവൻ ശ്രദ്ധയോടെ വെറും വെള്ളം തന്നാലും എനിക്ക് ഏറ്റവും ഇഷ്ടമാണ്.  ചന്ദനവും പൂക്കളും നെല്ലും അരിയും നിവേദ്യവുമൊക്കെയുള്ള പൂജയെങ്കിൽ ഗംഭീരം’- എന്നാണു ശ്രീരാമദേവന്റെ വാക്കുകൾ. 

പണമോ പാണ്ഡിത്യമോ പദവിയോ പ്രശസ്തിയോ ഒന്നുമല്ല, ഉള്ളിലെ തെളിഞ്ഞ ഭക്തി മാത്രമാണ് ഈശ്വരനിലേക്കുള്ള വഴിയെന്നാണു രാമകഥ നമ്മെ പഠിപ്പിക്കുന്നത്. 

English Summary : Ramayana Parayanam Day 20 By Raveendran Kalarikkal