ജൂൺ മാസത്തിൽ ഓരോ നാളുകാരും അനുഷ്ഠിക്കേണ്ട പരിഹാരങ്ങൾ
Mail This Article
ലോകം മുഴുവൻ കഠിനമായ പ്രതിസന്ധി കാലഘട്ടത്തിൽ കൂടി കടന്നു പൊയ്ക്കോണ്ടിരിക്കുകയാണല്ലോ ? മനസ്സർപ്പിച്ചുള്ള ഈശ്വരഭജനത്തിലൂടെയല്ലാതെ ഈ ദുരിതകാലം മറികടക്കുവാൻ കഴിയില്ല . ജൂൺ മാസത്തിൽ ഓരോ നാളുകാരും അനുഷ്ഠിക്കേണ്ട പരിഹാരങ്ങൾ ചേർക്കുന്നു :
അശ്വതി:
ദോഷശമനത്തിനായി ഭവനത്തിൽ വിഷ്ണു ഭജനം നടത്തുക. ഭവനത്തിൽ ഭഗവതപാരായണം സ്വയംചെയ്യക. ജന്മനാളിൽ ഒരുനേരം ഉപവസിച്ച് ലക്ഷ്മീ നാരായണ മൂർത്തിയെ വീട്ടിലിരുന്നു ഭജിക്കുക .
ഭരണി :
സ്വഭാവനത്തിലിരുന്ന് സുബ്രമണ്യസ്വാമിയെ ഭജിക്കുക. ചൊവ്വാഴ്ച്ചകളിൽ വീട്ടിൽ നിലവിളക്കിനു മുൻപിൽ സുബ്രഹ്മണ്യ സ്വാമിക്ക് തൃമധുരം നിവേദിച്ച് പ്രാർഥിക്കുക . നിത്യേന ഭവനത്തിൽ സുബ്രഹ്മണ്യ അഷ്ടോത്തരം ജപിക്കുക.
കാർത്തിക:
ശനിയുടെയും രാഹുവിന്റേയും ദോഷം അനുഭവിക്കുന്ന കാലമാണ് . ഹനുമദ് ഭജനം നടത്തുക . ജന്മനാളിൽ ഹനുമാൻ സ്വാമിയേ വണങ്ങി അവൽ നിവേദ്യം നടത്തുക ഒപ്പം പഴുത്തു തുടങ്ങിയ ഞാലിപ്പൂവൻ കായ നിവേദിക്കുക. വീട്ടിൽ രാമായണം സുന്ദര കാണ്ഡം നിത്യേന പാരായണം ചെയ്യുക.
രോഹിണി:
രാഹു കേതു ദോഷങ്ങൾ അനുഭവത്തിൽ വരുന്ന കാലമാണ് . ദോഷശമനത്തിനും ഗുണവർധനവിനുമായി ശിവ ഭജനം നടത്തുക . ശിവനെ കിരാതമൂർത്തിയായി സങ്കൽപ്പിച്ച് നിത്യേന പ്രാർഥിക്കുക . ഭവനത്തിൽ ശിവാഷ്ടോത്തര ജപം നടത്തുക .
മകയിരം:
നിത്യേന ശ്രീകൃഷ്ണ ഭജനം നടത്തുക. നിത്യേന ഭവനത്തിൽ നാരായണീയ പാരായണം നടത്തുക.
തിരുവാതിര:
ശനി അഷ്ടമത്തിൽ സഞ്ചരിക്കുന്ന കാലമാണ് . ഭവനത്തിൽ ശാസ്താ ഭജനം നടത്തുക. നിത്യേന അഷ്ടോത്തരം ജപിക്കുക . ക്ഷേത്രത്തിൽ നീരാജനം കത്തിച്ചുതൊഴുത്തു പ്രാർഥിക്കുക .
പുണർതം:
ദോഷശമനത്തിനായി ഗണപതി ഭജനം നടത്തുക . നിത്യേന ഉദയത്തിൽ വീട്ടിൽ വിളക്കു കൊളുത്തി ഗണപതിയെ സ്മരിച്ച് പ്രാർഥിക്കുക. ജന്മനാളിൽ ഗണപതിക്ക് കൽക്കണ്ടം നെയ്യ് ഇവ സമർപ്പിച്ചു പ്രാർഥിക്കുക.
പൂയം:
ദോഷ ശമനത്തിനായി ദേവീ ഭജനം നടത്തുക. ദേവീമാഹാത്മ്യത്തിലെ പതിനൊന്നാം അദ്ധ്യായം നിത്യേന വീട്ടിൽ പാരായണം ചെയ്യുക.
ആയില്യം:
എതിരാളികളിൽ നിന്നുള്ള ശല്യം വർധിക്കാവുന്ന കാലമാണ് . ഭവനത്തിൽ വിളക്ക് കൊളുത്തി ഭദ്രകാളി അഷ്ടകം പാരായണം ചെയ്യുക.
മകം:
ചെറിയ ആരോഗ്യ വിഷമതകൾ നേരിടാവുന്ന കാലമാണ് . നിത്യേന ശിവ ഭജനം നടത്തുക . വീട്ടിൽ നെയ്വിളക്ക് കത്തിച്ച് ദക്ഷിണാമൂർത്തി സങ്കൽപ്പത്തിൽ പ്രാർഥിക്കുക .
പൂരം:
ധനപരമായ വിഷമതകൾ അലട്ടുന്ന കാലമാണ് . മഹാവിഷ്ണു ഭജനം നടത്തുക. വ്യാഴാഴ്ചകളിൽ വ്രതമെടുക്കുക. വിഷ്ണു അഷ്ടോത്തര ജപം നടത്തുക. ജന്മനാളിൽ വിഷ്ണു സഹസ്രനാമം പാരായണം ചെയ്യുക.
ഉത്രം:
മാനസികമായ വിഷമതകൾ അധികരിക്കുന്ന കാലമാണ് . നിത്യേന സുബ്രഹ്മണ്യ അഷ്ടോത്തരം ജപിക്കുക. കൂടാതെ . കൂടാതെ ജന്മ നാളിൽ ഒരുനേരം ഉപവസിച്ച് സുബ്രഹ്മണ്യ ഭജനം നടത്തുക.
അത്തം:
ദോഷ പരിഹാരത്തിനായി ശിവനെ ഭജിക്കുക . നിത്യേന കാലത്ത് മൃത്യുംജയ മന്ത്രം ശിവാഷ്ടോത്തര ജപം ഇവ നടത്തുക.
ചിത്തിര:
ആരോഗ്യ വിഷമതകൾ അലട്ടാവുന്ന കാലമാണ് ദോഷശമനത്തിനായി ധർമ്മ ശാസ്താവിനെ ഭജിക്കുക . നിത്യേന ശാസ്താ അഷ്ടോത്തര ജപം നടത്തുക .
ചോതി:
ശിരസ്സുമായി ബന്ധപ്പെട്ട ആരോഗ്യ വിഷമതകൾ ഉണ്ടാവാം . വീട്ടിൽ ദേവീ ഭജനം നടത്തുക . ജന്മ നാളിൽ വീട്ടിൽ നിലവിളക്കു കൊളുത്തി മഹിഷാസുരമർദിനീ സ്തോത്രം പറയണം ചെയ്യുക.
വിശാഖം:
ധനപരമായ വിഷമതകൾ അനുഭവിക്കുന്ന കാലമാണ് . മഹാഗണപതി ഭജനം നടത്തുക. നിത്യേന ഭവനത്തിൽ ഗണപതി അഷ്ടോത്തര ജപം നടത്തുക .
അനിഴം:
വാത ജന്യ രോഗ ബാധ അലട്ടാവുന്ന കാലമാണ് . ദോഷശമനത്തിനായി ഹനുമദ് ഭജനം നടത്തുക. വ്യാഴാഴ്ചകളിൽ ഹനുമാൻസ്വാമിക്ക് സങ്കൽപ്പിച്ച് സമർപ്പിച്ച അവിൽ , പഴം ഒരുനേരം കഴിക്കുക മത്സ്യ മാംസം പാടില്ല .
തൃക്കേട്ട:
വീഴ്ച , പരിക്ക് ഇവയ്ക്കുള്ള സാധ്യതെ നിലനിൽക്കുന്നു . നിത്യേന വിഷ്ണു ഭജനം നടത്തുക. അഷ്ടോത്തരം നിത്യേന പാരായണം ചെയ്യുക . വ്യാഴാഴ്ചകളിൽ നെയ്വിളക്ക് കത്തിച്ചുതൊഴുത്തു പ്രാർഥിക്കുക .
മൂലം:
കാര്യ പ്രതിബന്ധം നിലനിൽക്കുന്നു . ദോഷശമനത്തിനായി ദേവീ ഭജനം നടത്തുക . നിത്യേന ലളിതാസഹസ്രനാമ ധ്യാന ഭാവത്തിൽ ദേവിയെ സ്മരിച്ച് ഭാവത്തിൽ നെയ്വിളക്ക് കൊളുത്തി പ്രാർഥിക്കുക .
പൂരാടം:
സാമ്പത്തിക വിഷമതകൾ അധികരിക്കാവുന്ന കാലമാണ് . ദോഷ ശമനത്തിനായി മഹാലക്ഷ്മീ ഭജനം നടത്തുക. വെള്ളിയാഴ്ചകളിൽ നെയ്വിളക്ക് കത്തിച്ച് മഹാലക്ഷ്മീ അഷ്ടോത്തര ജപം നടത്തുക . ഒപ്പം ഗണപതി അഷ്ടോത്തരജപം നടത്തുന്നത് ഗുണഫലങ്ങൾ പെട്ടെന്നു ലഭിക്കുന്നതിന് ഉപകരിക്കും .
ഉത്രാടം:
ശ്വാസകോശ സംബന്ധിയായ അലർജി പിടിപെടാവുന്ന കാലമാണ് . നിത്യേന ശിവനെ ഭജിക്കുക. അഘോരമന്ത്രം ജപിപ്പിച്ച ഭസ്മം ധരിക്കുന്നത് വളരെ ഗുണകരമാണ് .
തിരുവോണം:
കാര്യപ്രതിബന്ധം നേരിടാവുന്ന കാലമാണ് . നിത്യേന ശബരിമല ശാസ്താവിനെ ഭജിക്കുക .
ശനിയാഴ്ചകളിൽ വ്രതമെടുത്ത് ശാസ്താ അഷ്ടോത്തര ജപം നടത്തുക .
അവിട്ടം:
അവിചാരിത പണച്ചെലവ് നേരിടാം . ദോഷശമനത്തിനായി ദുർഗ്ഗാ ഭജനം നടത്തുക . നിത്യേന ദുർഗാ അഷ്ടോത്തര ജപം നടത്തുക .
ചതയം:
തൊഴിൽ പരമായ തടസ്സം നേരിടാം . ദോഷശമനത്തിനായി ദേവീ ഭജനം നടത്തുക. ഭവനത്തിൽ ദേവീ നാമ ജപം നടത്തുക . ജന്മനാളിൽ ദേവീ ക്ഷേത്രത്തിൽ ജയാ ദുർഗ്ഗാ മന്ത്ര പുഷ്പാഞ്ജലി നടത്തുക.
പൂരുരുട്ടാതി:
ദോഷശമനത്തിനും ഗുണവർധനവിനുമായി മഹാവിഷ്ണു ഭജനം നടത്തുക . വ്യാഴാഴ്ചകളിൽ വിഷ്ണു ക്ഷേത്ര ദർശനം നടത്തി പ്രാർഥിക്കുക. നെയ്വിളക്ക് കൊളുത്തുന്നതും തുളസിമാല ചാർത്തിക്കുന്നതും ഉത്തമം.
ഉത്രട്ടാതി:
ദോഷശമനത്തിനായി ലക്ഷ്മീ വിനായക സങ്കൽപ്പത്തിൽ ഭജിക്കുക. ജന്മ നാളിൽ ക്ഷേത്രത്തിൽ ദർശനം നടത്തി ഗണപതി ഹോമം നടത്തിക്കുക. നിത്യേന ഭവനത്തിൽ ഗണപതി അഷ്ടോത്തര ജപം നടത്തുക .
രേവതി:
ഗുണവർധനവിനായി ശ്രീകൃഷ്ണ ഭജനം നടത്തുക. വ്യാഴാഴ്ചകളിൽഒരു നേരം ഉപവസിച്ച് ശ്രീകൃഷ്ണസ്വാമിക്ക് വെണ്ണ ,അവൽ ഇവ നിവേദിക്കുകയും ഉപവാസം അവസാനിപ്പിക്കുമ്പോൾ അത് ഭക്ഷിക്കുകയും ചെയ്യുക .
English Summary : Dosha Remedy in June 2021