നാഗേശ്വരസ്വാമിക്ഷേത്രം – ഈ നക്ഷത്രക്കാർ ദർശിച്ചാൽ ഇരട്ടിഫലം!
Mail This Article
തമിഴ്നാട്ടിലെ തഞ്ചാവൂരിലെ കുംഭകോണത്താണ് തിരുനാഗേശ്വരം സ്വാമി ശിവക്ഷേത്രം. ചോള ക്ഷേത്രങ്ങളിൽ ഏറ്റവും പഴക്കമേറിയതാണ് ഈ ക്ഷേത്രം. രാഹു ഇവിടെ ഉപദേവനാണ്.
9-ആം നൂറ്റാണ്ടിൽ ചോളരാജവംശ കാലത്താണ് ഇന്ന് കാണുന്ന കൊത്തുപണിയുടെ ഏറ്റവും പഴക്കമുളള ഭാഗങ്ങൾ നിർമ്മിച്ചത്.
ഉയർന്ന ഗോപുരങ്ങൾ ഉൾപ്പെടെ ഉള്ളവ 16- ആം നൂറ്റാണ്ടിൽ നിർമിച്ചതാണ്. മൂന്ന് ഗോപുരങ്ങൾ ഉളള ഈക്ഷേത്ര സമുച്ചയം തമിഴ്നാട്ടിൽ ഏറ്റവും വലുതാണ്.
നാഗേശ്വരർ, പ്രളയംകാത്തനാഥർ, പെരിയനായകി എന്നിവരുടെ പ്രതിഷ്ഠകളുള്ള ഇവിടെ നിരവധി ശ്രീകോവിലുകൾ ഉണ്ട്.
ക്ഷേത്ര സമുച്ചയത്തിൽ നിരവധി ഹാളുകളും നിരവധി ശില്പങ്ങളും ഉണ്ട്. രാവിലെ 5:30 മുതൽ രാത്രി 10 വരെ ആറ് നേരം പൂജകളുണ്ട്.
പന്ത്രണ്ട് വാർഷിക ഉത്സവങ്ങളും ഇവിടെകൊണ്ടാടുന്നു. പുരാണത്തിലെ സർപ്പങ്ങളായ ദക്ഷനും കാർക്കോടകനും ഇവിടെ ശിവനെ ആരാധിച്ചിരുന്നെന്നാണ് ഐതിഹ്യം.
രാവിലെ 6 30 മുതൽ ഉച്ചയ്ക്ക് 12 വരെയും വൈകിട്ട് അഞ്ചു മുതൽ എട്ടു വരെയുമാണ് ദർശനസമയം. ഫെബ്രുവരി - മാർച്ച് മാസങ്ങളിലെ മഹാ ശിവ രാത്രിയാണ് ഇവിടത്തെ പ്രധാന ഉത്സവം.
തമിഴ് മാസമായ പംഗുനിയിൽ സൂര്യരശ്മികൾ നേരിട്ട് ശ്രീകോവിലിലെ പ്രതിമയിൽ പതിക്കുന്നു എന്ന പ്രത്യേകതയുണ്ട്.
ജാതകത്തിലെ രാഹു ദോഷത്തിനും സർപ്പ ദോഷങ്ങൾക്കും പരിഹാരമായി ഇവിടെ ദർശനം നടത്തി വഴിപാടുകൾ കഴിച്ചാൽ മതിയാകും.
തിരുവാതിര, ചോതി, ചതയം നാളുകാരുടെ നക്ഷത്രദേവത രാഹു ആയതിനാൽ അവർ തിരുനാഗേശ്വരം രാഹു ക്ഷേത്രത്തിൽ ദർശനം നടത്തി വഴിപാടുകൾ നടത്തുന്നത് ഉത്തമമാണ്.
ത്വക്ക് രോഗശമനത്തിനായും ഭക്തർ ഇവിടെ വഴിപാടുകൾ നടത്തുന്നു.
രാഹു ഗായത്രി :
"ഓം നാഗാധ്വജായ വിദ്മഹേ
പദ്മ ഹസ്തായ ധീമഹി
തന്നോ രാഹു പ്രചോദയാത്."
ലേഖകൻ
Dr. P. B. Rajesh
Rama Nivas ,Poovathum parambil,
Near ESI Dispensary Eloor East ,
Udyogamandal.P.O, Ernakulam 683501
email : rajeshastro1963@gmail.com
Phone : 9846033337
English Summary : Significance of Nageswaraswamy Temple Kumbakonam