കിയാരയുടെ യാത്ര ഇനി ടൊയോട്ടയുടെ സുരക്ഷയിൽ; ആഡംബര എംപിവി സമ്മാനിച്ച് ഭർത്താവ്

സുഖകരമായ യാത്രയ്ക്ക് ആഡംബര വാഹനങ്ങൾ തിരഞ്ഞെടുക്കുന്നവരാണ് സിനിമാതാരങ്ങളിൽ ഏറിയപങ്കും. അതുകൊണ്ടു തന്നെ താരങ്ങളുടെ ഗാരിജുകളും കോടികളുടെ വിലപിടിപ്പുള്ള വാഹനങ്ങൾ കൊണ്ട് സമ്പന്നമായിരിക്കും. ബോളിവുഡിലെ യുവതാരങ്ങളിൽ ശ്രദ്ധേയനായ സിദ്ധാർഥ് മൽഹോത്രയും തികഞ്ഞ ഒരു വാഹന പ്രേമിയാണ്. കോടികൾ വില വരുന്ന വാഹനങ്ങൾ സ്വന്തമായുള്ള താരം ഏറ്റവും ഒടുവിലായി ഗാരിജിലെത്തിച്ചത് ടൊയോട്ടയുടെ ആഡംബര എം പി വി യായ വെൽഫെയർ ആണ്. 

എന്നാൽ ഭാര്യയും നടിയുമായ കിയാര അദ്വാനിക്ക് സമ്മാനമായി നൽകാനാണ് സിദ്ധാർഥ് മൽഹോത്ര ഈ എം പി വി സ്വന്തമാക്കിയിരിക്കുന്നത്. താരം തിരഞ്ഞെടുത്തിരിക്കുന്ന മെറ്റൽ ഷെയ്ഡ് വാഹനത്തിനെ കൂടുതൽ പ്രീമിയമാക്കുന്നുണ്ട്. ഹൈ, വി ഐ പി എന്നിങ്ങനെ രണ്ടു വേരിയന്റുകളിൽ പുറത്തിറങ്ങുന്ന വെൽഫെയറിന്റെ ഏതു വേരിയന്റാണ് താരദമ്പതികൾ തിരഞ്ഞെടുത്തിരിക്കുന്നതെന്നു വ്യക്തമല്ല. ഈ രണ്ടു വേരിയന്റുകൾക്കും യഥാക്രമം 1.22 കോടി രൂപ, 1.32 കോടി രൂപ എന്നിങ്ങനെയാണ് വില വരുന്നത്. 

വെൽഫെയറിന്റെ ആദ്യകാഴ്ചയിൽ കണ്ണുകളിലുടക്കുക മുൻഭാഗത്തെ ഗ്രില്ലുകളാണ്. സ്പ്ളിറ്റ് എൽ ഇ ഡി ഹെഡ് ലാമ്പുകൾ ഒരു ഭാഗമെന്ന് തോന്നിപ്പിക്കുന്ന രീതിയിലാണ് സിക്സ് സ്ലാറ്റ് ഗ്രില്ലിന്റെ രൂപകൽപന. 4995 എം എം നീളവും 1850 എം എം വീതിയും 1950 എം എം ഉയരവുമുള്ള വാഹനത്തിന്റെ വീൽ ബേസ് 3000 എം എം ആണ്. മുൻ മോഡലിനെ അപേക്ഷിച്ചു പുതിയ വെൽഫെയറിനു നീളവും ഉയരവും അല്പം കൂടുതലാണ്. 19 ഇഞ്ച് അലോയ് വീലുകളാണ്.

ഇന്റീരിയറിലേക്കു വരികയാണെങ്കിൽ ഇലക്ട്രിക്കലി അഡ്ജസ്റ്റ് ചെയ്യാവുന്ന, മെമ്മറി ഫങ്ക്ഷൻ ഉള്ള ഡ്രൈവിങ് സീറ്റ്, ഓപൺ - ക്ലോസ് ഇലക്ട്രിക്കലി അഡ്ജസ്റ്റ് ചെയ്യാവുന്ന ഒ ആർ വി എമ്മുകൾ, പ്രീമിയം ലെതർ സീറ്റുകൾ, 14 ഇഞ്ച് ഫ്‌ളോട്ടിങ് ടൈപ്പ് ടച്ച് സ്ക്രീൻ ഇൻഫോടെയ്ൻമെൻറ് സിസ്റ്റം, എ ഡി എ എസ് ഫീച്ചറുകൾ, 360 ഡിഗ്രി ക്യാമറ, വെന്റിലേറ്റഡ് - ഹീറ്റഡ് സീറ്റ്സ്, ഇലക്ട്രിക്കലി അഡ്ജസ്റ്റബ്ൾ സ്റ്റിയറിംഗ് വീൽ, 3 സോൺ ക്ലൈമറ്റ് കൺട്രോൾ തുടങ്ങി നിരവധി ഫീച്ചറുകൾ കൊണ്ട് സമ്പന്നമാണ് വെൽഫെയർ.

ഹൈബ്രിഡ് സിസ്റ്റവുമായി പെയർ ചെയ്തിട്ടുള്ള 2.5 ലീറ്റർ, 4 സിലിണ്ടർ പെട്രോൾ എൻജിനാണ് വാഹനത്തിന്റെ കരുത്ത്. 240 എൻ എം ടോർക്കും 193 പി എസ് കരുത്തും ഉൽപാദിപ്പിക്കുമിത്. ഇ - സി വി റ്റി ഗിയർ ബോക്‌സും നൽകിയിട്ടുണ്ട്.