കെ ടെറ്റ് പരീക്ഷാതീയതി മാറ്റും; ഉദ്യോഗാർഥികളുടെ പരാതി പരിഗണിച്ചാണു നടപടി

തിരുവനന്തപുരം∙അധ്യാപക യോഗ്യതാ പരീക്ഷകളായ സെറ്റും കെ–ടെറ്റും ഒരേ ദിവസം നടത്തുന്നത് ഒഴിവാക്കാൻ കെ– ടെറ്റ് പരീക്ഷാ തീയതി മാറ്റുമെന്നു പരീക്ഷാഭവൻ സെക്രട്ടറി അറിയിച്ചു. ഉദ്യോഗാർഥികളുടെ പരാതി പരിഗണിച്ചാണു നടപടി. പുതുക്കിയ തീയതി പിന്നീട് പ്രഖ്യാപിക്കും. സെറ്റ് പരീക്ഷയും കെ–ടെറ്റ് പരീക്ഷയും ഓഗസ്റ്റ് 24ന് നടത്താൻ തീരുമാനിച്ചിരുന്നത് ഉദ്യോഗാർഥികളെ ബുദ്ധിമുട്ടിലാക്കിയിരുന്നു. സെറ്റിനുള്ള അപേക്ഷ നേരത്തേ ക്ഷണിച്ചതിനാൽ കെ–ടെറ്റിന്റെ പരീക്ഷാ ദിവസം മാറ്റണമെന്നായിരുന്നു ആവശ്യം. ഹയർസെക്കൻഡറി അധ്യാപക യോഗ്യതയായ സെറ്റ് എൽബിഎസും ഹൈസ്കൂൾ അധ്യാപക യോഗ്യതയായ കെ–ടെറ്റ് പരീക്ഷാ ഭവനുമാണ് നടത്തുന്നത്. രണ്ടു പരീക്ഷകളും എഴുതാൻ തയാറെടുക്കുന്ന ഒട്ടേറെപ്പേരുണ്ട്.