‘ആ ജോർദാൻ താടിയായിരുന്നു ആലിക്ക് കൂടുതലിഷ്ടം’; രസകരമായ വിഡിയോ പങ്കുവച്ച് സുപ്രിയ

ആദ്യമായി താടി വടിച്ചിട്ട് തന്റെ ഇരട്ടകളായ കുഞ്ഞുമക്കളുടെ മുന്നിലെത്തിയ ഒരു അച്ഛന്റെ വിഡിയോയാണ് സുപ്രിയ പങ്കുവച്ചിരിക്കുന്നത്. താടിയില്ലാത്ത അച്ഛനെ തിരിച്ചറിയാനാകാതെ പകച്ചുനോക്കുകയാണ് ആ കുരുന്നുകൾ. അച്ഛൻ ആ ഇരട്ടകളെ കളിപ്പിക്കാനൊക്കെ നോക്കുന്നുണ്ടെങ്കിലും വൻ കരച്ചിലിലാണ് അതു ചെന്നെത്തിയത്. ഈ ക്യൂട്ട് വിഡിയോ പങ്കുവച്ചു കൊണ്ട് സുപ്രിയ നൽകിയ അടിക്കുറിപ്പാണ് രസകരം.

‘ആടുജീവിതം സിനിമയുടെ ഷൂട്ടിങിന് ശേഷം പൃഥ്വിരാജ് താടി വടിച്ചപ്പോൾ ആലി കുറച്ചു മുതിർന്നിരുന്നു, അവൾ ഇങ്ങനെ പ്രതികരിക്കാതിരുന്നതിന് ദൈവത്തിന് നന്ദി. എങ്കിലും ആ ജോർദാൻ താടിയാണ് തനിക്ക് കൂടുതലിഷ്ടം എന്നാണ് അവൾ പറയുന്നത്’. എന്നാണ് ഈ വിഡിയോ പോസ്റ്റ് ചെയ്തുകൊണ്ട് സുപ്രിയ കുറിച്ചത്.

ആടുജീവിതം എന്ന സിനിമയുടെ ഭാഗമായി പൃഥ്വിരാജ് താടി നീട്ടിവളർത്തിയിരുന്നു. ഷൂട്ടിങിന് ശേഷം ജോർദാനിൽ നിന്നും മടങ്ങിയെത്തിയ പൃഥ്വിയും മകളുമൊപ്പമുള്ള ചിത്രവും താടിയൊക്കെ വടിച്ച പൃഥ്വിയുടെ ചിത്രവും  സുപ്രിയ പങ്കുവച്ചിരുന്നു.

English Summary : Supriya Menon Prithviraj post a cute video