‘സാമജവരജഗമനാ...’ തെലുങ്കിലും ഒരു കൈ നോക്കി വൃദ്ധിക്കുട്ടി ; വൈറലായി പാട്ട് വിഡിയോ

സീരിയൽ താരം അഖിൽ ആനന്ദിന്റെ വിവാഹവേദിയിൽ ചുവട് വച്ച് താരമായതാണ് വൃദ്ധി വിശാൽ എന്ന കൊച്ചുമിടുക്കി. ഡാൽസിൽ മാത്രമല്ല പാട്ടിലും താനൊരു മിടുക്കിയാണെന്ന് തെളിയിക്കുന്ന ഒരു വിഡിയോ നേരത്തേ ശ്രദ്ധ നേടിയിരുന്നു. കാക്കോത്തിക്കാവിലെ അപ്പൂപ്പൻ താടികൾ എല്ല സിനിമയിലെ ‘കണ്ണാം തുമ്പീ പോരാമോ’ എന്ന പാട്ട് വളരെ ആസ്വദിച്ചു പാടുന്ന വൃദ്ധിയുടെ ഒരു വിഡിയോയായിരുന്നു അത്. എന്നാല്‍ മലയാളത്തിൽ മാത്രമല്ല തെലുങ്കിലും ഒരു കൈ നോക്കിയിരിക്കുകയാണ് വൃദ്ധിക്കുട്ടി.  അല്ലു അർജുൻ സിനിമയിലെ ‘സാമജവരജഗമനാ’  എന്നു തുടങ്ങുന്ന ഗാനമാണ് വൃദ്ധിക്കുട്ടി പാടുന്നത്.

പാട്ടിലെ പല വാക്കുകളും കക്ഷിയ്ക്ക് അത്രയ്ക്കങ്ങ് വഴങ്ങുന്നില്ലെങ്കിലും തകർത്തങ്ങ് പാടുകയാണ് വൃദ്ധി. ഈ സൂപ്പർ ക്യൂട്ട് പാട്ടിനും നിരവധി ആരാധകരാണ്. ഡാൻസ് ചെയ്തും പാട്ടുപാടിയും സോഷ്യൽ ലോകത്ത് താരമായിരിക്കുകയാണ് ഈ കുരുന്ന്. 

വൃദ്ധിയുടെ ഡാൻസും ചിരിയും ഫെയ്സ്ബുക്ക്, വാട്സ്ആപ്പ്, ഇൻസ്റ്റഗ്രാം എന്നിവിടങ്ങളിൽ തരംഗമായിരുന്നു. മഴവിൽ മനോരമയിലെ മഞ്ഞിൽ വിരിഞ്ഞ പൂവ് എന്ന സീരിയലിലെ അനുമോൾ എന്ന കഥാപാത്രമായി വന്ന് കയ്യടി നേടിയ താരം കൂടിയാണ് വൃദ്ധി. യുകെജി വിദ്യാർഥിനിയായ ഈ കുട്ടിത്താരം ഇതിനോടകം രണ്ട് സിനിമകളിലും അഭിനയിച്ചു. കൊച്ചി കുമ്പളങ്ങി സ്വദേശിയായ വിശാലിന്റേയും ഗായത്രിയുടേയും മകളാണ്.

English Summary : Vrithi Vishal singing Telungu song