അറിയപ്പെടുന്ന എലി, അറിയപ്പെടാത്ത എലിസബെറ്റ !
Mail This Article
ലോക പ്രശസ്തമായ ഒരു കഥാപാത്രത്തെ സൃഷ്ടിക്കുക, അതിനു പിന്നിൽ താനാണെന്ന് ആരെയും അറിയിക്കാതിരിക്കുക. പുസ്തകങ്ങളിൽ രചയിതാവിന്റെ സ്ഥാനത്തു കഥാപാത്രത്തിന്റെ പേരു വയ്ക്കുക....
അത്യപൂർവമായ ഈ ത്യാഗം ചെയ്തത് എലിസബെറ്റ ഡാമി എന്ന എഴുത്തുകാരിയാണ്. കഥാപാത്രം 'ജെറോനിമോ സ്റ്റിൽട്ടൺ' എന്ന 'ഫെയ് മൗസ്' ചുണ്ടെലിയും!
ഇറ്റലിയിലെ ഒരു ബുക്ക് പബ്ലിഷറുടെ മകളാണ് എലിസബെറ്റ ഡാമി. ഒഴിവുസമയങ്ങളിൽ ആശുപത്രി വാർഡുകളിലെത്തി കുട്ടികൾക്കു കഥ പറഞ്ഞു കൊടുക്കുന്ന പതിവുണ്ടായിരുന്നു. അവർക്ക് ജെറോനിമോ സ്റ്റിൽട്ടന്റെ കഥകൾ പിറന്നത് അങ്ങനെയാണ്.
ഇറ്റാലിയൻ ഭാഷയിൽ എഴുതപ്പെട്ട സ്റ്റിൽട്ടന്റെ കഥകൾ 2004 ൽ ഇംഗ്ലീഷിൽ പുറത്തിറങ്ങിയതോടെ ആരാധകർ പതിന്മടങ്ങായി. പിന്നീട് 49 ഭാഷകളിലേക്ക് ഈ കഥകൾ തർജമ ചെയ്യപ്പെട്ടു. ലോകത്ത് ഏറ്റവും കൂടുതൽ വിറ്റഴിക്കപ്പെട്ട പുസ്തകങ്ങളുടെ കൂട്ടത്തിൽ ജെറോനിമോ സ്റ്റിൽട്ടണുമുണ്ട്. പക്ഷെ എഴുത്തുകാരി എലിസബെറ്റ ഡാമിനാണെന്ന് അടുത്ത കാലത്താണ് ലോകം തിരിച്ചറിഞ്ഞത്. ന്യൂ മൗസ് സിറ്റി എന്ന സാങ്കല്പിക നഗരത്തിലെ പ്രശസ്ത പത്രമായ റോഡന്റ് ഗസ്റ്റിന്റെ എഡിറ്ററാണ് ജെറോനിമോ സ്റ്റിൽട്ടൺ.
സാഹസികത ഇഷ്ടമല്ലാത്ത ജെറോനിമോയ്ക്ക് ഏറ്റെടുക്കേണ്ടി വരുന്ന അതിസാഹസികമായ ദൗത്യങ്ങളാണ് ഈ പരമ്പരയിലെ ഓരോ കഥയും. ദൗത്യങ്ങളിലെല്ലാം ജെറോനിമോയ്ക്ക് സഹായികളായി സഹോദരി തിയ മരുമകൻ ബെഞ്ചമിൻ കസിൻ ട്രാപ് തുടങ്ങിയവരുണ്ടാകും.
ജെറോനിമോ സ്റ്റിൽട്ടന്റെ കഥകൾ ഇനി ചിത്രകഥാ രൂപത്തിൽ ബാലരമയിൽ വായിക്കാം. ജൂൺ 25 വിനു പുറത്തിറങ്ങുന്ന ലക്കത്തിൽ ജെറോനിമോ സ്റ്റിൽട്ടൺ ചിത്രകഥ തുടങ്ങുന്നു. ടൈം മെഷീനിൽ കയറി പതിനഞ്ചാം നൂറ്റാണ്ടിൽ കൊളംബസിന്റെ കപ്പലിലെത്തുന്ന രസകരമായ കഥ പറയുന്ന 'അമേരിക്കയെ കണ്ടെത്തൽ' ആണ് ബാലരമ ആദ്യം അവതരിപ്പിക്കുന്നത്.
ലോകപ്രശസ്തമായ നിരവധി കഥാപാത്രങ്ങളെ മുമ്പും ബാലരമ വായനക്കാർക്ക് പരിചയപ്പെടുത്തിയിട്ടുണ്ട്. സ്പൈഡർമാൻ, മിക്കി മൗസ്, അവഞ്ചേഴ്സ്, ഛോട്ടാ ഭീം തുടങ്ങിയ കഥാപാത്രങ്ങളുടെ ചിത്രകഥകൾ ബാലരമയിൽ തുടർച്ചയായി പ്രസിദ്ധീകരിച്ചിരുന്നു.
ജെറോനിമോ സ്റ്റിൽട്ടൺ ചിത്രകഥ മലയാളത്തിൽ ആദ്യമായി പ്രസിദ്ധീകരിക്കുന്നത് ബാലരമയാണ്. മുൻപ് മലയാളത്തിലെ ഒരുടിവി ചാനലിൽ മറ്റൊരു പേരിൽ ജെറോനിമോ സ്റ്റിൽട്ടൺ അനിമേഷൻ കാർട്ടൂണുകൾ വന്നിരുന്നു.
ലോക്ഡൗണും ഓൺലൈൻ ക്ലാസുകളുമൊക്കെയായി വീട്ടിൽ തന്നെ വീട്ടിൽത്തന്നെ അടച്ചിരിക്കുന്ന കുട്ടികൾക്കു ജെറോനിമോ സ്റ്റിൽട്ടൺ കഥകൾ ആവേശം പകരും.
English summary: Geronimo the Stilton Italian comics series in Balarama