പിഞ്ചുകുഞ്ഞുമായി കൂട്ടുകൂടുന്ന വളർത്തുനായ: മനം കവരും ഈ ദൃശ്യങ്ങൾ

വളർത്തു നായകൾക്ക് അതിന്റെ വീട്ടുകാരോടുള്ള സ്നേഹം മറ്റെന്തിനെക്കാളും മുകളിലാണ്. വീട്ടിൽ പുതിയതായി എത്തുന്ന കുഞ്ഞതിഥികളുടെ കാര്യമാണെങ്കിൽ പറയുകയും വേണ്ട. വീട്ടിലുള്ളവർക്കൊപ്പം തന്നെ അവ കുഞ്ഞുമായി കൂട്ടുകൂടും. അത്തരത്തിൽ ഒരു വളർത്തു നായയും ഏതാനും മാസങ്ങൾ മാത്രം പ്രായമുള്ള കുഞ്ഞും തമ്മിൽ കൂട്ടുകൂടുന്ന ദൃശ്യങ്ങളാണ് സമൂഹമാധ്യമങ്ങളിലൂടെ ജനങ്ങളുടെ മനം കവരുന്നത്.

തറയിൽ കളിപ്പാട്ടവുമായി ഇരുന്ന് കളിക്കുന്ന കുഞ്ഞിന്റെ അരികിൽ നിന്നും മാറാതെ നിൽക്കുകയാണ് നായ. കുഞ്ഞ് ഏറെ കൗതുകത്തോടെ തന്നെ നോക്കി ഇരിക്കുന്നത് കണ്ട് കുഞ്ഞിനെ ചിരിപ്പിക്കാനായി തന്നാൽ ആവുന്നതെല്ലാം നായ ചെയ്യുന്നുണ്ട്. രണ്ടുകാലിൽ പൊങ്ങി ചാടിയും തലയിട്ട് ആട്ടിയും രസിപ്പിക്കാനാണ് ശ്രമിക്കുന്നത്. അതിനൊത്ത് കുഞ്ഞു കുടുകുടെ ചിരിക്കുന്നുമുണ്ട്.

കുഞ്ഞ് രസിക്കുന്നുണ്ട് എന്ന് കണ്ടതോടെ നിർത്താതെ ഓരോ പ്രകടനങ്ങൾ കാണിക്കുകയാണ് നായ. ഇടയ്ക്ക് അരികിലെത്തി സ്നേഹത്തോടെ മണക്കുകയും ചെയ്യുന്നത് കാണാം. മനോഹരമായ ഈ വിഡിയോ ഇതിനോടകം സമൂഹ മാധ്യമങ്ങളിൽ വൈറലായി കഴിഞ്ഞു. കുഞ്ഞും നായയും തമ്മിലുള്ള ബന്ധം മനസ് കുളിർപ്പിച്ചു എന്നാണ് പലരും പ്രതികരിക്കുന്നത്.

English summary: Adorable video of pet dog makes toddler laugh