'ഞാനുമുണ്ട് സ്കൂളിലേയ്ക്ക്' : പെൺകുട്ടിക്ക് പിന്നാലെ കൂടിയ ആട് - വിഡിയോ
Mail This Article
'മേരിക്കുണ്ടൊരു കുഞ്ഞാട് മേനി കൊഴുത്തൊരു കുഞ്ഞാട്..' ഈ നഴ്സറി പാട്ടിൽ കേട്ടുപരിചയിച്ച കുഞ്ഞാടിനെ നേരിട്ട് കാണണമെങ്കിൽ നേരെ ഹിമാചൽപ്രദേശിലേക്ക് പോയാൽ മതി. മേരിക്കൊപ്പം പള്ളിക്കൂടത്തിൽ എത്തിയ കുഞ്ഞാടിനെക്കുറിച്ചുള്ള പാട്ട് സങ്കൽപത്തിൽ നിന്ന് ഉണ്ടാക്കിയത് ആണെങ്കിൽ ഇവിടെ ആട് യഥാർത്ഥത്തിൽ കൂട്ടുകാരിക്കൊപ്പം സ്കൂളിലേക്ക് പോകാൻ തന്നെ തുനിഞ്ഞിറങ്ങിയിരിക്കുകയാണ്.
ഹിമാചൽ പ്രദേശിലെ ഒരു മലയോര മേഖലയിൽ സ്കൂൾ യൂണിഫോം ധരിച്ച് ഇടവഴിയിലൂടെ നടന്നു നീങ്ങുന്ന ഒരു പെൺകുട്ടിയാണ് വിഡിയോയിലുള്ളത്. അവൾക്ക് തൊട്ടുപിന്നാലെ വെളുത്ത് തുടുത്ത ഒരു ആടിനെയും കാണാം. പെൺകുട്ടിയുടെ നടത്തത്തിന് വേഗം കൂട്ടിയാൽ അപ്പോൾ ആടും അതിനൊപ്പം ഓടിത്തുടങ്ങും. എന്തുവന്നാലും കൂട്ടുകാരിയെ പിരിയില്ലെന്ന് ഉറപ്പിച്ച മട്ടിലാണ് ആടിന്റെ പോക്ക്.
അജയിത എന്ന ഡോക്ടറാണ് ട്വിറ്ററിലൂടെ ഈ ദൃശ്യങ്ങൾ പങ്കുവെച്ചിരിക്കുന്നത്. സെപ്റ്റംബർ 20ന് സമൂഹമാധ്യമങ്ങളിൽ എത്തിയ വിഡിയോ ഇതിനോടകം പതിനായിരക്കണക്കിനാളുകൾ കണ്ടുകഴിഞ്ഞു. സ്കൂളിലേക്ക് പോകുന്ന രണ്ടു കൂട്ടുകാർ എന്ന അടിക്കുറിപ്പോടെയാണ് ഡോക്ടർ അജയിത വിഡിയോ പങ്കുവെച്ചിരിക്കുന്നത്. മനുഷ്യനും മൃഗങ്ങളും തമ്മിലുള്ള ബന്ധം പലപ്പോഴും അനിർവചനീയമാണെന്നും വിഡിയോ ഏറെ ആസ്വദിച്ചു എന്നുമെല്ലാം നിരവധി ആളുകൾ പ്രതികരണങ്ങൾ അറിയിക്കുന്നുണ്ട്.
English summary : Viral video of- a goat follows young girl to school in Himachal Pradesh