ആലിയ്ക്ക് സുഹൃത്ത് നൽകിയ പിറന്നാൾ സമ്മാനം ; ചിത്രം പങ്കുവച്ച് സുപ്രിയ
Mail This Article
ആലിയുടെ പുസ്തകങ്ങളോടുള്ള ഇഷ്ടത്തെക്കുറിച്ച് സുപ്രിയയും പൃഥ്വിരാജും പല തവണ സമൂഹമാധ്യമങ്ങളിൽ കുറിച്ചിട്ടുണ്ട്. ഈ ചെറിയ പ്രായത്തിൽത്തന്നെ വായനയെ ഏറെ ഇഷ്ടപ്പെടുന്ന ആലിയ്ക്ക് വേണ്ടുന്ന പുസ്തകങ്ങൾ വാങ്ങിക്കൊടുക്കാനും ഇവർ ശ്രദ്ധിക്കാറുണ്ട്. കുട്ടികൾ വായിക്കേണ്ട പുസ്തകങ്ങൾ സുപ്രിയ പലപ്പോഴും പരിചയപ്പെടുത്താറുണ്ട്. പൃഥ്വിയേയും സുപ്രിയയേയും പോലെ നല്ലൊരു വായനക്കാരിയാണ് മകൾ അലംകൃതയും. മകൾ വായിക്കുന്ന പുസ്തകങ്ങൾ സുപ്രിയ മറ്റു കുട്ടികൾക്കായി പരിചയപ്പെടുത്തുക പതിവാണ്. ഇത്തവണ മകൾക്ക് പിറന്നാൾ സമ്മാനമായി സമ്മാനമായി ലഭിച്ച ഒരു പുസ്തകമാണ് സുപ്രിയ പങ്കുവച്ചത്.
‘ഹലോ! ഞാൻ ഒരു പുസ്തകം പരിചയപ്പെടുത്തിയിട്ട് കുറച്ച് നാളായി! ഈ പുസ്തകം ആലിയുടെ ജന്മദിനത്തിൽ ഒരു സുഹൃത്ത് നൽകിയതാണ്. മകൾ അത് വായിച്ചുകഴിഞ്ഞു, അത് ‘അതിശയകരമാണെന്ന്’ പറയുന്നു! ഞാൻ ഇത് ഇതുവരെ വായിച്ചിട്ടില്ലെങ്കിലും എപ്പോഴെങ്കിലും വായിക്കാൻ പ്ലാൻ ചെയ്യുന്നു! നിങ്ങൾ അല്ലെങ്കിൽ നിങ്ങളുടെ കുട്ടികൾ ഇത് വായിച്ചിട്ടുണ്ടോ ’ എന്ന കുറിപ്പുമായാണ് സുപ്രിയ കാരി ഹോപ് ഫ്ലെച്ചറുടെ ‘ഇൻ ടു ദ സ്പോട്ട്ലൈറ്റ് എന്ന പുസ്തകം പരിചയപ്പെടുത്തിയത്.
ഇതിന് മുൻപും ആലിയുടെ പുസ്തകങ്ങളോയുള്ള ഇഷ്ടത്തെക്കുറിച്ച് സുപ്രിയ കുറിപ്പുകൾ പങ്കുവച്ചിട്ടുണ്ട്. പ്രശസ്ത എഴുത്തുകാരൻ റോവാൾഡ് ഡാലിന്റെ മെറ്റിൽഡ എന്ന പുസ്തകം മകൾക്കായി വാങ്ങിയിരുന്നെന്നും അത് ഒറ്റയിരുപ്പിൽ ആലി വായിച്ചു തീർത്തെന്നും. സുപ്രിയ നേരത്തെ ഒരു പോസ്റ്റിൽ കുറിച്ചിരുന്നു. അതുപോലെ ആലിയ്ക്ക് പ്രിയ കൂട്ടുകാരി ആമീറ കുറച്ച് പുസ്തകങ്ങൾ സമ്മാനിച്ചുവെന്നും ഈ പുസ്തകങ്ങൾ കിട്ടിയതിനാൽ മകൾ ഒരുപാട് സന്തോഷവതിയാണെന്നും സുപ്രിയ പറഞ്ഞിരുന്നു. പക്ഷേ വായനയിൽ മുഴുകുന്ന മകളെക്കൊണ്ട് എങ്ങനെ ഹോംവർക്ക് ചെയ്യിക്കുമെന്ന സംശയത്തിലാണ് താനെന്നും സുപ്രിയ ആ പോസ്റ്റിൽ കുറിച്ചിരുന്നു.
പുസ്തക വായനയിൽ മുഴുകിയിരിക്കുന്ന ആലിയുടെ ചിത്രങ്ങൾ സുപ്രിയ പലതവണ പങ്കുവച്ചിട്ടുണ്ട്. വേനൽ അവധിയില് അലംകൃത വായനയിലാണെന്നും നിങ്ങളുടെ കുട്ടികൾ എങ്ങനെയാണ് വേനലവധി ആഘോഷിക്കുന്നതെന്നും ചോദിച്ചാണ് സുപ്രിയ ചിത്രം പോസ്റ്റ് ചെയ്തത്. മകൾ എഴുതിയ കഥകളും പാട്ടുകളും ചെറു കുറിപ്പുകളുമെല്ലാം ഇവർ പങ്കുവയ്ക്കാറുണ്ട്.
English summary : Supriya Menon Prithviraj share the photo of daughter Alankritha's story book