‘വെള്ളത്തിലിറങ്ങിയാലും കൈയെല്ലാം സോപ്പിട്ട് കഴുകും കലക്ടര്‍ മാമാ'; ‘താങ്ക്യൂ മോനൂ’വെന്ന് കലക്ടര്‍

ആലപ്പുഴ കലക്ടറായി ചുമതലയേറ്റ അന്നു തന്നെ കുട്ടികൾക്കായി ആദ്യ ഉത്തരവിറക്കി മുതിർന്നവർക്കിടയിലും കുട്ടികൾക്കിടയിലും ഒരുപോലെ താരമായതാണ് വി ആര്‍ കൃഷ്ണ തേജ ഐഎഎസ്. കുട്ടികളുെട 'കലക്ടര്‍ മാമ'നായ ഇദ്ദേഹം കഴിഞ്ഞ ദിവസം പങ്കുവച്ച ഒരു കുരുന്നിന്റെ വിഡിയോ ഇപ്പോൾ സമൂഹമാധ്യമങ്ങളും ഏറ്റെടുത്തിരിക്കുകയാണ്. അവധിയെക്കുറിച്ചും എലിപ്പനിയെ പ്രതിരോധിക്കുന്നതിനെക്കുറിച്ചുമൊക്കെ സമൂഹമാധ്യം വഴി കുട്ടികളുമായി അദ്ദേഹം കുഞ്ഞുങ്ങളുമായി സംവദിച്ചിരുന്നു. അതേ തുടർന്ന് ഒരു കുട്ടി തനിക്ക് അയച്ച വിഡിയോയാണ് കലക്ടര്‍ ഇപ്പോൾ പങ്കുവച്ചിരിക്കുന്നത്.  'വെള്ളത്തിലിറങ്ങിയാലും കൈയെല്ലാം സോപ്പിട്ട് കഴുകും കലക്ടര്‍ മാമാ' എന്നാണ് കുട്ടി കലക്ടറോട് പറയുന്നത്. ഹരിപ്പാട് സ്വദേശി ദക്ഷിത് ജി.കെ.പി ആണ് ഈ കൊച്ചു മിടുക്കൻ.

വി ആര്‍ കൃഷ്ണ തേജ ഐഎഎസ്. പങ്കുവച്ച കുറിപ്പ്

കഴിഞ്ഞ ദിവസങ്ങളിൽ സ്കൂൾ അവധിയെക്കുറിച്ചും എലിപ്പനിയെ പ്രതിരോധിക്കുന്നതിനെക്കുറിച്ചുമൊക്കെ ഫെയ്സ്ബുക്ക് വഴി എന്റെ പ്രിയപ്പെട്ട കുഞ്ഞുങ്ങളുമായി സംവദിച്ചിരുന്നു. നിരവധി കുട്ടികൾ ഫെയ്സ്ബുക്കിലൂടെ എനിക്ക് പഴ്സണൽ മെസേജും കമൻറുമൊക്കെ അയച്ചിരുന്നു. 

എലിപ്പനി പ്രതിരോധത്തിനായി കൃത്യമായി കൈ കഴുകുമെന്നൊക്കെ പറഞ്ഞ് ഒരു കുഞ്ഞ് എനിക്ക് അയച്ച ഒരു വിഡിയോ കണ്ടപ്പോൾ വളരെ സന്തോഷം തോന്നി. അതിവിടെ നിങ്ങളുമായി പങ്കുവെയ്ക്കുന്നു.

താങ്ക്യൂ മോനൂ 😘

എന്റെ എല്ലാ കുഞ്ഞു മക്കളും മിടുക്കരായി വളരണം കേട്ടോ,

ഒത്തിരി സ്നേഹത്തോടെ,

നിങ്ങളുടെ സ്വന്തം

English Summary : Alappuzha collector V R Krishna Teja post video of kid