'മോനേ ആദര്‍ശേ..നീയാണ് മാതൃക....'

തനിക്കും മുന്നേ തന്റെ കൂട്ടുകാരന്റെ വിശപ്പടക്കുന്ന സ്കൂൾ വിദ്യാർത്ഥിയുടെ വിഡിയോ സമൂഹമാധ്യമങ്ങളിൽ വൈറലാവുന്നു. കലോത്സവ വേദിയിൽ മാപ്പിളപ്പാട്ട് മത്സരം നടക്കവേയാണ് ശാരീരിക വെല്ലുവിളി നേരിടുന്ന കൂട്ടുകാരന് ആദർശ് എന്ന മിടുക്കൻ ഭക്ഷണമൂട്ടിയത്. തന്റെ മുന്നിലെ ഭക്ഷണപ്പൊതി തുറക്കുക പോലും ചെയ്യാതെയാണ് ആദർശ് കൂട്ടുകാരനു ഭക്ഷണം നൽകിയത്.  വീൽചെയറിലിരിക്കുന്ന വിദ്യാർത്ഥിക്കു ചോറു കൊടുക്കുന്ന മറ്റൊരു വിദ്യാർത്ഥിയെക്കണ്ട് മനസ്സു നിറഞ്ഞ അധ്യാപകരിലൊരാളാണ് ദൃശ്യം പകർത്തിയത്.കഴിഞ്ഞ ദിവസം സമൂഹമാധ്യമങ്ങളിൽ പ്രചരിച്ച വിഡിയോ ഇതിനോടകം വലിയ ജനശ്രദ്ധയാകർഷിച്ചു. കരുണയോടുള്ള കുട്ടിയുടെ പെരുമാറ്റം ഏവർക്കും മാതൃകയാണെന്നും വളർന്നു വരുമ്പോൾ നല്ലൊരു മനുഷ്യനായിത്തീരുമെന്നുമുള്ള കമന്റുകളാണ് വീഡിയോയ്ക്കു താഴെ നിറയുന്നത്. മലപ്പുറം കോട്ടക്കല്‍ കോട്ടൂര്‍ എ.കെ.എം. ഹയര്‍സെക്കന്‍ഡറി സ്‌കൂളിലെ അധ്യാപികയാണ് ദൃശ്യങ്ങള്‍ പകര്‍ത്തിയത്.

Content Summary : Boy feeding Food to his Friend Viral Video