മെസിയെ കാണാൻ ഖത്തറിലേക്ക് നിബ്രാസ്; വൈറലായി അർജന്റീനയുടെ ഈ കുട്ടി ആരാധകൻ

ഖത്തര്‍ ലോകക്കപ്പ് മല്‍സരത്തില്‍ അർജന്റീനയുടെ അപ്രതീക്ഷിത തോൽവിയില്‍ നൊമ്പരപ്പെട്ട നിബ്രാസിനെ ഓർമയില്ലേ. സമൂഹ മാധ്യമങ്ങളിൽ വൈറലായ അർജന്റീനയുടെ ഈ കുട്ടി ആരാധകൻ നിബ്രാസ് ഇനി ഖത്തറിലേക്ക് പറക്കും. പയ്യന്നൂർ ആസ്ഥാനമായി പ്രവർത്തിക്കുന്ന ട്രാവൽ ഏജൻസിയാണ് നിബ്രാസിനെ ഖത്തറിലെത്തിക്കുന്നത്. അർജന്റീന ജയിച്ചതിനൊപ്പം മെസിയെ നേരിട്ട് കാണാൻ അവസരം ഒരുങ്ങിയതിലെ സന്തോഷത്തിലാണ് നിബ്രാസിപ്പോൾ. നാട്ടിലും സ്കൂളിലും താരമായി മാറിയിരിക്കുകയാണ് ഈ പതിമൂന്നുകാരന്‍.

ഖത്തര്‍ ലോകക്കപ്പ് മല്‍സരത്തില്‍ അർജന്റീനയുടെ അപ്രതീക്ഷിത  തോൽവിയില്‍ സങ്കടപ്പെട്ട  നിബ്രാസിന്റെ വിഡിയോ സമൂഹമാധ്യമങ്ങളിൽ വൈറലായിരുന്നു.. കാസര്‍കോട്ടെ തൃക്കരിപ്പൂര്‍ സ്വദേശിയായ ഈ എട്ടാം ക്ലാസുകാരന് ആശ്വാസം പകര്‍ന്ന് വിദ്യാഭ്യാസ മന്ത്രിയും സമൂഹ മാധ്യമങ്ങളില്‍ വിഡിയോ പങ്കുവച്ചിരുന്നു. വിഡിയോ വൈറൽ ആയതിന് പിന്നാലെ നിരവധി ഫുട്ബോൾ ആരാധകരാണ് നിബ്രാസിനെ കാണാനായി എത്തുന്നത്. തൃക്കരിപ്പൂർ മണിയനോടി കദീജയുടെയും നൗഫലിന്റെയും മകനാണ്  ഉദിനൂര്‍ ഗവ ഹയര്‍സെക്കന്‍ഡറി സ്കൂള്‍ വിദ്യാര്‍ഥിയായ നിബ്രാസ്.

Content Summary : Argentina fan Nibras going to Qatar to meet Messi