ആപ്പിൾ സോഫ്റ്റ്വെയറിന് പേരുനൽകിയ മരം: കലിഫോർണിയയിലെ വമ്പൻമാർ

Mail This Article
ആപ്പിളിന്റെ കംപ്യൂട്ടറുകൾക്കുള്ള ഓപ്പറേറ്റിങ് സിസ്റ്റമുകൾക്ക്(മാക് ഒഎസ്) പല പേരു നൽകാറുണ്ട്. ഏറ്റവും അടുത്തിറങ്ങിയ മാക് ഒഎസിന്റെ പേര് സെക്കോയ എന്നാണ്. എന്താണ് സെക്കോയ? ഇവ മരങ്ങളാണ്, ആകാശത്തേക്കു തലയുയർത്തി നിൽക്കുന്ന വൻമരങ്ങൾ. കലിഫോർണിയയിൽ വൻ സെക്കോയമരങ്ങൾ ഇടതൂർന്ന് നിൽക്കുന്ന സെക്കോയ നാഷനൽ പാർക്കുണ്ട്. ഇവിടങ്ങളിൽ ഇടയ്ക്കിടെ ഉണ്ടാകുന്ന കാട്ടുതീ ഈ വമ്പൻ മരങ്ങൾക്ക് ഭീഷണിയാകും. ഇപ്പോൾ കലിഫോർണിയയിൽ ഉടലെടുത്തിരിക്കുന്ന കാട്ടുതീ ഈ നാഷനൽ പാർക്കിൽ വീശുന്നില്ല.
സെക്കോയ നാഷനൽ പാർക്കിൽ കാട്ടുതീ ഉടലെടുക്കുന്നത് യുഎസ് വനംവകുപ്പ് അതീവ ജാഗ്രതയോടെയാണു കാണുന്നത്. വൻ പ്രതിരോധം അവർ ഇവിടെ പടുത്തുയർത്തും. അതിനൊരു കാരണമുണ്ട്. ഇവിടെയാണ് ലോകത്തിലെ ഏറ്റവും വലിയ മരവും 2700 വർഷത്തോളം പഴക്കം അവകാശപ്പെടുന്നതുമായ ജനറൽ ഷെർമാൻ എന്ന മരം നിൽക്കുന്നത്. ഏകദേശം മുപ്പതു നിലക്കെട്ടിടത്തിന്റെ പൊക്കവും, മൂന്ന് ടെന്നിസ് കോർട്ടുകളുടെ വീതിയുമുള്ള മരം അമൂല്യമായ ജൈവവിശേഷമാണ്. സെക്കോയ മരങ്ങൾ പൊതുവെ വരൾച്ച, കടുത്ത ചൂട്, അഗ്നിബാധ എന്നിവയെ പ്രതിരോധിക്കുന്നവയാണ്. എന്നാൽ അതിതീവ്രമായ കാട്ടുതീകളിൽ ഇവ നശിച്ചേക്കും.
കാട്ടുതീ ഉണ്ടാകുമ്പോൾ ജനറൽ ഷെർമാന്റെ തടിമുഴുവൻ അലുമിനിയം ഫോയിൽ കൊണ്ടു മൂടും. പരിസരത്തെ അഗ്നിബാധയുടെ കനത്ത ചൂടേറ്റ് നശിച്ചുപോകാതിരിക്കാനാണ് ഇത്.മരത്തിന്റെ പരിസരങ്ങൾ സ്പ്രിംക്ലറുകൾ ഉപയോഗിച്ച് ഇടതടവില്ലാതെ നനയ്ക്കുന്നതും ഇവിടത്തെ രീതിയാണ്. 2021ൽ സെക്കോയ നാഷനൽ പാർക്കിൽ രണ്ടിടത്തായി ഇടിമിന്നൽ മൂലം കോളനി, പാരഡൈസ് എന്നീ പേരുകളിൽ കാട്ടുതീകൾ ഉടലെടുത്ത് വൻ അഗ്നിബാധയായി മാറിയിരുന്നു. 18000 ഏക്കറിൽ ഈ കാട്ടുതീ വ്യാപിച്ചു.കെഎൻപി കോംപ്ലക്സ് ഫയർ എന്നാണ് ഇപ്പോൾ ഈ അഗ്നിബാധ അറിയപ്പെടുന്നത്.
ലോകത്തിലെ ഏറ്റവും വലിയ മരങ്ങളിൽ പലതും സ്ഥിതി ചെയ്യുന്നത് കലിഫോർണിയയിലാണ്. 1905ൽ മറിഞ്ഞു വീണ ലിൻഡ്സേ ക്രീക്ക് ട്രീയാണ് ലോകത്തിൽ ഇതുവരെ രേഖപ്പെടുത്തിയിട്ടുള്ള ഏറ്റവും വലിയ മരം. വലുപ്പത്തിൽ രണ്ടാമനായ ക്രാനൽ ക്രീക്ക് ജയന്റ് എന്ന മരം 1940ൽ മരംവെട്ടുകാർ വെട്ടിനശിപ്പിച്ചു. തുടർന്നാണു ജനറൽ ഷെർമാൻ ലോകത്തിലെ ഏറ്റവും വലിയ മരമായി മാറിയത്. യുഎസ് ആഭ്യന്തരയുദ്ധത്തിലെ കമാൻഡറായിരുന്ന വില്യം ടെകുംസെ ഷെർമാന്റെ പേരാണ് ഈ മരത്തിനു കിട്ടിയത്.
1879ൽ ജെയിംസ് വോൾവർട്ടൺ എന്ന പ്രകൃതി സ്നേഹിയാണ് കാട്ടിൽ ഈ മരം കണ്ടെത്തിയത്. ജനറൽ ഷെർമാനു കീഴിൽ ലഫ്റ്റനന്റായി മുൻപ് ജോലി ചെയ്തിരുന്ന വോൾവെർട്ടൺ തന്റെ പ്രിയപ്പെട്ട ജനറലിന്റെ പേര് തന്നെ മരത്തിനു നൽകി. 1886ൽ കീവാ കോളനി എന്ന സോഷ്യലിസ്റ്റ് പ്രസ്ഥാനം മേഖലയിൽ ആധിപത്യം സ്ഥാപിച്ചു. ഇവർ മരത്തിനെ പുനർനാമകരണം ചെയ്തു കാൾ മാർക്സ് മരം എന്നു പേരു നൽകി. ആറു വർഷം ഇത് ആ പേരിൽ അറിയപ്പെട്ടു. 1892ൽ സെക്കോയ നാഷനൽ പാർക്ക് നിലവിൽ വന്നതോടെ ജനറൽ ഷെർമാൻ എന്ന പഴയ പേര് വീണ്ടും മരത്തിനു കിട്ടി. 2006 ജനുവരിയിൽ മരത്തിന്റെ ഏറ്റവും വലിയ ശാഖകളിലൊന്ന് ഒടിഞ്ഞു വീണിരുന്നു.2 മീറ്റർ വീതിയും 30 മീറ്റർ നീളവുമുള്ളതായിരുന്നു ഈ ശാഖ.