ബുദ്ധി വികാസത്തിന് ഇന്റർനെറ്റ്; സർഫ് ചെയ്യുന്നത് തലച്ചോറിന്റെ കഴിവു സജീവമാക്കുമെന്ന് പഠനം

പഠിക്കേണ്ട സമയം മുഴുവൻ കംപ്യൂട്ടറിനു മുന്നിൽ കുത്തിയിരുന്നു കളിച്ചോ... ഇങ്ങനെ മക്കളെ ശകാരിക്കുന്ന രക്ഷിതാവാണോ നിങ്ങൾ? എങ്കിൽ ഇനി അതു വേണമെന്നില്ല. കാരണം ഇന്റർനെറ്റിൽ സർഫ് ചെയ്യുന്നതു വഴി ബുദ്ധി വികാസം സാധ്യമാണെന്നാണു യൂണിവേഴ്‌സിറ്റി ഓഫ് കലിഫോർണിയയിൽ നടത്തിയ പഠനം വ്യക്‌തമാക്കുന്നത്.

പ്രായം ചെല്ലുന്തോറും മാനസികമായ കഴിവുകൾ സംരക്ഷിച്ചുവയ്‌ക്കാനുള്ള മാർഗമാണ് ഇന്റർനെറ്റ് ഉപയോഗം. പ്രായം ചെന്നവർ ബ്രൗസ് ചെയ്യാൻ തുടങ്ങിയശേഷം തലച്ചോറിന്റെ പ്രവർത്തനത്തിൽ കാര്യമായ പുരോഗതി അനുഭവപ്പെട്ടെന്നാണു കണ്ടെത്തൽ. ചിന്തിക്കാനും തീരുമാനങ്ങളെടുക്കാനുമുള്ള തലച്ചോറിന്റെ കഴിവു സജീവമാക്കുന്നതാണ് ഈ മാറ്റം.

ഓൺലൈനിൽ സേർച്ച് ചെയ്യുമ്പോൾ പലവിധ തീരുമാനങ്ങളെടുക്കാൻ തലച്ചോറിൽ പ്രേരണയുണ്ടാവുന്നു. പസിലുകൾ, ചെസ്, മാനസികോല്ലാസത്തിനുള്ള എഴുത്ത് തുടങ്ങിയ ബൗദ്ധിക കാര്യങ്ങളിൽ ഏർപ്പെടുന്നവരുടെ തലച്ചോർ കൂടുതൽ കാര്യക്ഷമമായി പ്രവർത്തിക്കുമെന്നു സൂചിപ്പിക്കുന്ന പല പഠനങ്ങളും നേരത്തേ ഉണ്ടായിട്ടുണ്ട്. ആ കണ്ടെത്തലുകൾ അടിസ്‌ഥാനമാക്കിയാണു പുതിയ ഗവേഷണം നടത്തിയത്. നെറ്റ് ബ്രൗസിങ്ങും ഇത്തരം ബൗദ്ധിക വ്യായാമമായി കണക്കാക്കാം. എന്നാൽ ഓൺലൈൻ ഷോപ്പിങ്ങും ചൂതാട്ടവുമൊക്കെയാണു നിങ്ങളുടെ പരിപാടിയെങ്കിൽ ഫലം പോസിറ്റീവാകണമെന്നില്ലെന്ന മുന്നറിയിപ്പുമുണ്ട്.

English summary: Surfing the internet boosts aging brains study