സന്തോഷമില്ലേ? മൂഡ്‌ മാറ്റും ഈ ചോക്ലേറ്റ്; വാങ്ങുമ്പോള്‍ ഇക്കാര്യങ്ങള്‍ ശ്രദ്ധിക്കൂ

മുതിര്‍ന്നവരാകട്ടെ കുട്ടികളാകട്ടെ, ചോക്ലേറ്റ് ഇഷ്ടമല്ലാത്ത ആളുകള്‍ ചുരുക്കമായിരിക്കും. വല്ലാതെ വിഷമിച്ചും ടെന്‍ഷനടിച്ചുമൊക്കെ ഇരിക്കുന്ന സമയത്ത് ഒരു കഷ്ണം ചോക്ലേറ്റ് കഴിച്ചാല്‍ പെട്ടെന്ന് സന്തോഷമാകുന്നത് ശ്രദ്ധിച്ചിട്ടുണ്ടോ? ഇതില്‍ അടങ്ങിയിട്ടുള്ള ഫ്ലേവനോയ്ഡുകൾക്ക് സെറോടോണിൻ, ഡോപാമൈൻ തുടങ്ങിയ ചില ന്യൂറോ ട്രാൻസ്മിറ്ററുകളുടെ ഉത്പാദനം നിയന്ത്രിച്ചുകൊണ്ട് മാനസികാവസ്ഥയെയും വികാരങ്ങളെയും നിയന്ത്രിക്കാന്‍ കഴിവുണ്ടെന്ന് പഠനങ്ങള്‍ തെളിയിച്ചിട്ടുണ്ട്. 

ഇത് കൂടാതെ, രക്തസമ്മർദ്ദം കുറയ്ക്കാനും നല്ല കൊളസ്ട്രോള്‍ കൂട്ടാനും ചോക്ലേറ്റിനു കഴിവുണ്ട്. എന്നാല്‍ എല്ലാ ചോക്ലേറ്റുകള്‍ക്കും ഈ ഗുണങ്ങള്‍ നല്‍കാന്‍ പറ്റില്ല. 

ഡാർക്ക് ചോക്ലേറ്റും മിൽക്ക് ചോക്ലേറ്റും

ഏറ്റവും സാധാരണയായി കിട്ടുന്ന രണ്ടു ചോക്ലേറ്റുകളാണ് ഡാർക്ക് ചോക്ലേറ്റും മിൽക്ക് ചോക്ലേറ്റും. ഇവ തമ്മിലുള്ള   പ്രധാന വ്യത്യാസം അവയുടെ ചേരുവകളിലാണ്. രണ്ട് ചോക്ലേറ്റുകളും കൊക്കോ മരങ്ങളിൽ നിന്ന് ഉരുത്തിരിഞ്ഞ ചേരുവകളിൽ നിന്നാണ് നിർമ്മിക്കുന്നത്. ഡാർക്ക് ചോക്ലേറ്റിൽ മില്‍ക്ക് ചോക്ലേറ്റിനേക്കാൾ വളരെ കൂടുതൽ കൊക്കോ അടങ്ങിയിട്ടുണ്ട്. ഡാർക്ക് ചോക്ലേറ്റുകളിൽ ഏകദേശം 50-90% കൊക്കോ അടങ്ങിയിരിക്കാം, അതേസമയം മില്‍ക്ക് ചോക്ലേറ്റുകളിൽ 10-50% കൊക്കോ മാത്രമേ അടങ്ങിയിട്ടുള്ളൂ. കൊക്കോയുടെ ശതമാനത്തിലെ വ്യത്യാസം രുചിയും നിർണ്ണയിക്കുന്ന ഘടകമാണ്. മധുരമുള്ള മിൽക്ക് ചോക്ലേറ്റിനേക്കാൾ ഡാർക്ക് ചോക്ലേറ്റ് സാധാരണയായി കയ്പേറിയതാണ്.

ചോക്ലേറ്റുകൾ തമ്മിലുള്ള മറ്റൊരു വ്യത്യാസം പാലിന്‍റെ അംശമാണ്. "മിൽക്ക് ചോക്ലേറ്റ്" എന്ന് ലേബൽ ചെയ്യുന്നതിന്  ചോക്ലേറ്റിൽ കുറഞ്ഞത് 12% പാൽ ഖരപദാർത്ഥങ്ങൾ അടങ്ങിയിരിക്കണം. പാൽ ദ്രാവക രൂപത്തിലോ, കൊഴുപ്പായോ, പൊടിയായോ ആകാം. മറുവശത്ത്, ഡാർക്ക് ചോക്ലേറ്റിൽ പാൽ ചേര്‍ക്കാതിരിക്കുകയോ വളരെ കുറഞ്ഞ അളവില്‍ മാത്രം ഉപയോഗിക്കുകയോ ചെയ്യുന്നു. പാലിന് പകരം, ചോക്ലേറ്റ് മിനുസമാർന്നതാക്കാൻ കൊക്കോ ബട്ടർ ഉപയോഗിക്കുന്നു. 

രണ്ട് ചോക്ലേറ്റുകളിലും പഞ്ചസാര ഒരു പ്രധാന ചേരുവയാണ്. സാധാരണയായി മിൽക്ക് ചോക്ലേറ്റിൽ ഡാർക്ക് ചോക്ലേറ്റിനേക്കാള്‍ കൂടുതൽ പഞ്ചസാര അടങ്ങിയിട്ടുണ്ട്.

ഡാർക്ക് ചോക്ലേറ്റ് ആരോഗ്യകരമാണോ?

അമിതമായി കഴിച്ചാല്‍ രണ്ടു ചോക്ലേറ്റും ആരോഗ്യകരമായ ഭക്ഷണമല്ല. എന്നാൽ, മില്‍ക്ക് ചോക്ലേറ്റുമായി താരതമ്യപ്പെടുത്തുമ്പോൾ, ഡാർക്ക് ചോക്ലേറ്റ് കുറച്ചുകൂടി ആരോഗ്യകരമാണെന്ന് പറയാം. ഇതിലുള്ള കൊക്കോ ആണ് ആരോഗ്യഗുണങ്ങള്‍ നല്‍കുന്നത്.

കൊക്കോ ഉൾപ്പെടെ നിരവധി സസ്യങ്ങളിൽ ഫ്ലേവനോൾ കാണപ്പെടുന്നു. ഡാർക്ക് ചോക്ലേറ്റിൽ ഉയർന്ന അളവിൽ കൊക്കോ ശതമാനം ഉള്ളതിനാൽ അതിൽ ഫ്ലേവനോൾ അടങ്ങിയിട്ടുണ്ട്. ഫ്ലേവനോളുകൾ നൈട്രിക് ഓക്സൈഡിന്‍റെ ഉത്പാദനവുമായി ബന്ധപ്പെട്ടിരിക്കുന്നു, ഇത് രക്തക്കുഴലുകളെ റിലാക്സ് ചെയ്യിക്കുകയും രക്തയോട്ടം മെച്ചപ്പെടുത്തുകയും അതുവഴി രക്തസമ്മർദ്ദം കുറയ്ക്കുകയും ചെയ്യുന്നു. ഇത് ഹൃദ്രോഗം, പക്ഷാഘാതം എന്നിവയിൽ നിന്ന് സംരക്ഷിക്കുകയും തലച്ചോറിലേക്കുള്ള രക്തയോട്ടം വർദ്ധിക്കുന്നതിനാൽ ബുദ്ധിശക്തി മെച്ചപ്പെടുത്തുകയും ചെയ്യും.

ഫ്ലേവനോൾ അടങ്ങിയ സസ്യങ്ങളിൽ കാണപ്പെടുന്ന സംയുക്തങ്ങളാണ് പോളിഫെനോളുകൾ. സമ്മർദ്ദ ഹോർമോണായ കോർട്ടിസോളിന്‍റെ അളവ് കുറയ്ക്കുന്ന ആന്‍റി ഓക്‌സിഡന്റുകളാണ് പോളിഫെനോളുകൾ. അതിനാൽ, ഡാർക്ക് ചോക്ലേറ്റ് കഴിക്കുന്നത് സമ്മർദ്ദം കുറയ്ക്കുകയും മൊത്തത്തിലുള്ള മാനസികാവസ്ഥ മെച്ചപ്പെടുത്താൻ സഹായിക്കുകയും ചെയ്യും.

കടയില്‍ നിന്നും നല്ല ചോക്ലേറ്റ് നോക്കി വാങ്ങിക്കാം

എല്ലാ ഡാര്‍ക്ക്‌ ചോക്ലേറ്റും ഒരുപോലെയല്ല. ആരോഗ്യഗുണങ്ങള്‍ കിട്ടണമെങ്കില്‍ ചോക്ലേറ്റ് വാങ്ങിക്കുമ്പോള്‍ ചില കാര്യങ്ങള്‍ ശ്രദ്ധിക്കണം. ഉയർന്ന അളവിൽ കൊക്കോ അടങ്ങിയ (കുറഞ്ഞത് 70%) ഡാർക്ക് ചോക്ലേറ്റ് തിരഞ്ഞെടുക്കുക. സസ്യ എണ്ണകൾ, കൃത്രിമ മധുരങ്ങൾ, അമിതമായ പാൽ ഖരവസ്തുക്കൾ എന്നീ ചേരുവകള്‍ ചേര്‍ത്തിട്ടുണ്ടോ എന്ന് നോക്കുക, ഉണ്ടെങ്കില്‍ അത് വാങ്ങാതിരിക്കുക. പഞ്ചസാര തീരെ ചേര്‍ക്കാത്ത ചോക്ലേറ്റ് വിപണിയില്‍ ലഭ്യമാണ്. ഇത് നോക്കി വാങ്ങുക.

ഡാര്‍ക്ക് ചോക്ലേറ്റ് വീട്ടില്‍ ഉണ്ടാക്കാം

ചേരുവകൾ

പൊടിച്ച പഞ്ചസാര - 1 ഗ്ലാസ്

കൊക്കോ പൌഡര്‍ - മുക്കാല്‍ ഗ്ലാസ്‌

പാല്‍പ്പൊടി - കാല്‍ ഗ്ലാസ് 

വെളിച്ചെണ്ണ അല്ലെങ്കില്‍ ബട്ടര്‍ - മുക്കാല്‍ ഗ്ലാസ്

വാനില എസ്സന്‍സ് - കാല്‍ ടീസ്പൂണ്‍ 

തയാറാക്കുന്ന വിധം

- ഒരു അരിപ്പയില്‍ പഞ്ചസാര, കൊക്കോ പൗഡര്‍, പാല്‍പ്പൊടി എന്നിവ ഇട്ട് നന്നായി അരിച്ചെടുക്കുക

- ഡബിള്‍ ബോയില്‍ രീതിയാണ് ചോക്ലേറ്റ് തയ്യാറാക്കാനായി ഉപയോഗിക്കുന്നത്. അതിനായി, ഒരു പാത്രത്തില്‍ വെള്ളം ചൂടാക്കാന്‍ വയ്ക്കുക. അതിനു മുകളില്‍ ഒരു ബൌള്‍ വച്ച് വെളിച്ചെണ്ണ ഒഴിക്കുക. വെളിച്ചെണ്ണ ചൂടായി വരുമ്പോള്‍ ഇതിലേക്ക് പൊടികള്‍ കുറച്ചുകുറച്ചായി ഇട്ടു കൊടുത്ത് നന്നായി മിക്സ് ചെയ്യുക. ഇതിലേക്ക് കാല്‍ ടീസ്പൂണ്‍ വാനില എസ്സന്‍സ് കൂടി ചേര്‍ത്ത് ഇളക്കുക.

- ഈ ദ്രാവകം ഒരു ചോക്ലേറ്റ് മോള്‍ഡ് അല്ലെങ്കില്‍ ഐസ് ട്രെയിലേക്ക് കുറച്ചു കുറച്ചായി ഒഴിച്ച് കൊടുക്കുക. ആവശ്യമെങ്കില്‍ പൊടിച്ച ഡ്രൈ ഫ്രൂട്സ് കൂടി മുകളില്‍ വിതറാം.

- ഇത് രണ്ടു മണിക്കൂര്‍ ഫ്രീസറില്‍ വച്ച് സെറ്റ് ചെയ്തെടുക്കുക. രുചികരമായ ചോക്ലേറ്റ് റെഡി!